អន្តរជាតិ
នយោបាយអន្តរជាតិ
ថៃ ធ្វើពិព័រណ៍បង្អួតពីសមត្ថភាពបង្កើតសព្វាវុធដោយខ្លួនឯង
× ក្រសួងការពារជាតិថៃ បានរៀបចំពិព័រណ៍មួយដើម្បីបង្ហាញពីសមិទ្ធផល និង គម្រោងនៃការអភិវឌ្ឍន៍សព្វាវុធដែលផលិតដោយរោងចក្រការពារជាតិថៃ និង ក្រុមហ៊ុនឯកជនបរទេសនៅក្នុងប្រទេសថៃ។ ពិព័រណ៍នេះ បានបង្ហាញឲ្យឃើញថា ថៃ បានក្លាយជារដ្ឋមួយដែលមានសមត្ថភាពក្នុងការផលិតអាវុធដោយខ្លួនឯងនៅក្នុងតំបន់។ នេះបើយោងតាមសារព័ត៌មានបាងកកប៉ុស្តិ។
លម្អិតព័ត៌មាននេះដោយ លោក រ៉ឹម ភារី៖
ឧបនាយករដ្ឋមន្ត្រីទទួលកិច្ចការសន្តិសុខថៃ លោក Prawit Wongsuwon បានអះអាងថា រោងចក្រការពារជាតិថៃ អាចមានសមត្ថភាពគ្រប់គ្រាន់ក្នុងការអភិវឌ្ឍន៍សព្វាវុធនៅក្នុងប្រទេសតាមរយៈការចាប់គូ ជាមួយនឹងក្រុមហ៊ុនឯកជនបរទេស។
ថ្លែងនៅក្នុងការបើកពិព័រណ៍ការពារ និង សន្តិសុខប្រចាំឆ្នាំ២០១៥ លោកឧត្តមសេនីយ៍ Prawit បានអះអាងថា ក្រសួងការពារជាតិថៃ មានតួនាទីក្នុងការស្រាវជ្រាវ និង អភិវឌ្ឍន៍លើសព្វាវុធសម្រាប់កងកម្លាំងប្រដាប់អាវុធ និង ដឹកនាំឲ្យមានការផលិតអាវុធដោយខ្លួនឯងផងដែរ។
ក្នុងឱកាសនោះដែរ លោកបានបង្ហាញនូវគម្រោងចំនួន២០នៃការអភិវឌ្ឍន៍បច្ចេកវិទ្យា លើវិស័យការពារជាតិ ទាំងផ្នែកទ័ពជើងគោក ទ័ពអាកាស និង ទ័ពជើងទឹកផងដែរ។ ក្នុងនោះ ក៏មានសព្វាវុធមួយចំនួន ដែលថៃបានសម្រេចហើយផងដែរ។ ជាក់ស្តែងនោះគឺ ថៃបានដាក់បង្ហាញរថគ្រោះដែលមានឈ្មោះថា «Black Widow Spider « ជាផលិតផលលើកដំបូង ដែលថៃបានធ្វើឡើងនៅក្នុងប្រទេសខ្លួន តាំងពីពីរឆ្នាំមុនមកម្ល៉េះ។
ដោយសារតែសមត្ថភាព និង ថវិកា សម្រាប់ការអភិវឌ្ឍន៍សព្វាវុធនៅមានកម្រិត លោក Prawit ក៏បានស្នើឲ្យមានកិច្ចសហការជាមួយនឹងរដ្ឋរបស់អាស៊ានមួយចំនួន ក៏ដូចជាក្រុមហ៊ុនផលិតសព្វាវុធបរទេស ដើម្បីមកវិនិយោគនៅក្នុងប្រទេសថៃផងដែរ។
ថ្វីដ្បិត ការសម្រេចរបស់ថៃលើការផលិតសព្វាវុធ មិនទាន់លក្ខណៈល្អប្រសើរនៅឡើយបើប្រៀបធៀប ជាមួយនឹងការវិវត្តបចេ្ចកវិទ្យាសព្វាវុធបច្ចុប្បន្ន សមិទ្ធផលនេះ នៅតែបង្ហាញថាថៃមានលក្ខណៈល្អប្រសើរជាងប្រទេសមួយចំនួននៅក្នុងតំបន់ផងដែរ៕
© រក្សាសិទ្ធិដោយ thmeythmey.com