អន្តរជាតិ
ហេតុអ្វីកូរ៉េខាងត្បូងមិនប្រថុយជាមួយអាមេរិកនិងជប៉ុនក្នុងប្រតិបត្តិការសមុទ្រចិនខាងត្បូង?
× សកម្មភាពវាតទីក្នុងតំបន់ជម្លោះសមុទ្រចិនខាងត្បូងដោយរដ្ឋាភិបាលក្រុងបេកាំង បានក្លាយជាការគំរាមកំហែងមួយនៅក្នុងតំបន់ទាំងផ្នែកសន្តិសុខ និង ផ្នែកពាណិជ្ជកម្មដែនសមុទ្រ។ បញ្ហានេះ បានធ្វើឲ្យរដ្ឋខាងក្រៅដែលរួមមានទាំងអាមេរិកនិង សម្ពន្ធ័មិត្តរបស់ខ្លួន ចាប់ផ្តើមលូកដៃចូលជ្រៅដើម្បីអន្តរាគមន៍ក្រោមស្លាកនៃការការពារ និង អនុវត្តតាមច្បាប់អន្តរជាតិ។ ដោយឡែក កូរ៉េខាងត្បូងដែលជាសម្ពន្ធ័មិត្តយ៉ាងជិតស្និទរបស់អាមេរិក បែរជារក្សាភាពស្ងៀមស្ងាត់ក្នុងប្រតិបត្តិការក្នុងដែនសមុទ្រជម្លោះ ចិនខាងត្បូងទៅវិញ។ តើមានកត្តាអ្វីខ្លះដែលធ្វើឲ្យកូរ៉េខាងត្បូងស្ទាក់ស្ទើរមិនចូលរួមក្នុងប្រតិបត្តិការនេះ?
មកទល់ពេលនេះ កូរ៉េខាងត្បូងដែលជាសម្ពន្ធ័មិត្តអាមេរិកនៅក្នុងតំបន់អាស៊ីប៉ាស៊ីហ្វិក នៅតែរក្សាគោលជំហស្ងប់ស្ងាត់ចំពោះប្រតិបត្តិការរក្សាសន្តិភាព និង ការពារសិទ្ធិសេរីភាពនៃការចរាចរតាមដែនសមុទ្រចិន ខាងត្បូងដែលកំពុងតែដឹកនាំដោយអាមេរិក។ យ៉ាងណាក៏ដោយ ភាពស្ងប់ស្ងាត់នេះ មិនមែនមកពីកូរ៉េ ខាងត្បូងមិនមានសមត្ថភាពដើម្បីបញ្ជូននាវារបស់ខ្លួននោះទេ តែនោះក៏ព្រោះ ការលូកដៃរបស់កូរ៉េ ខាងត្បូង នឹងធ្វើឲ្យកូរ៉េខាងត្បូងនឹងត្រូវខាតបង់នូវផលប្រយោជន៍។
ក្នុងជំនួបលើកដំបូងរវាងមេដឹកនាំកំពូលកូរ៉េខាងត្បូង និង ជប៉ុន កាលពីប៉ុន្មានថ្ងៃកន្លងទៅនេះ លោក នាយករដ្ឋមន្ត្រី ស្ហ៊ិនហ្សូ អាបេ បានស្នើទៅកាន់លោកស្រីប្រធានធិបតី ផាក ហ្គនហេ ដើម្បីចូលរួម ប្រតិបត្តិការរក្សាសន្តិភាព និង សេរីភាពនៃការធ្វើនាវាចរណ៍នៅក្នុងដែនសមុទ្រចិនខាងត្បូង។ ក៏ប៉ុន្តែ សំណើនេះ មិនមានការឆ្លើយតបនោះទេ ពោលគឺកូរ៉េខាងត្បូង គ្មានហេតុផលអ្វីដែលត្រូវរួមក្នុងប្រតិប ត្តិការនេះ ទោះបីជាអាមេរិកជាអ្នកដឹកនាំក៏ដោយ។ ហើយ វាមានហេតុផលមួយចំនួនជុំវិញអវត្តមាន កូរ៉េខាងត្បូងលើប្រតិបត្តិការនេះដែរ។
១. ទំនាក់ទំនងពាណិជ្ជកម្ម
កូរ៉េខាងត្បូង គឺជាដៃគូពាណិជ្ជកម្មមួយដ៏ធំ និង ជិតស្និទរបស់ចិននៅក្នុងតំបន់អាស៊ីប៉ាស៊ីហ្វិក។ បើយោងតាមសារព័ត៌មាន The Diplomat ទំហំពាណិជ្ជកម្មប្រចាំឆ្នាំរវាងប្រទេសទាំងពីរបានកើនឡើងជាបន្តបន្ទាប់ពោលគឺចំនួនបានកើនឡើងពីប្រមាណ២០០ពាន់លាន មកដល់ជាង៣០០ពាន់លានដុល្លាសហរដ្ឋអាមេរិក។ អ្វីដែលគួរឲ្យកត់សម្គាល់ និង ធ្វើឲ្យប្រទេសទាំងពីរកាន់តែស្អិតល្មួតនឹងគ្នានោះគឺ កាលពីខែមិថុនាកន្លងទៅនេះ កូរ៉េខាងត្បូង និង ចិន បានចុះកិច្ចព្រមព្រៀងពាណិជ្ជកម្មសេរីជាមួយនឹង គ្នា និង ថែមទាំងសន្យានឹងបន្តចរចាលើការលុបរបាំងពាណិជ្ជកម្មលើវិស័យមួយចំនួននៅឆ្នាំ២០១៧ ផងដែរ។ មួយវិញទៀតនោះគឺ ភាគីទាំងពីរ ក៏ជាហត្ថលេខីនៃកិច្ចព្រមព្រៀងពាណិជ្ជកម្មនៃភាពជាដៃគូ សេដ្ឋកិច្ចគ្រប់ជ្រុងជ្រោយក្នុងតំបន់ដែលផ្តួចផ្តើមដោយចិនផងដែរ។
ក្នុងចំណុចនេះ មានន័យថា បើកូរ៉េខាងត្បូង ចូលរួមប្រតិបត្តិការដែលដឹកនាំដោយអាមេរិកក្នុងតំបន់ ជម្លោះសមុទ្រចិនខាងត្បូងដែលស្មើនឹងសកម្មភាពប្រឆាំងចិននោះ គឺហាក់ដូចជាកូរ៉េខាងត្បូងបំផ្លាញ លើទំនាក់ទំនងដែលខ្លួនបានព្យាយាមកសាងតែម្តង។
២. ការគំរាមលើបញ្ហានសន្តិសុខ
កត្តាសំខាន់មួយវិញទៀត គឺទាក់ទងនឹងបញ្ហាសន្តិសុខ។ ថ្វីដ្បិតកូរ៉េខាងត្បូង និង ចិន មិនមានភាព រង្គោះរង្គើរខ្លាំងជាមួយគ្នាលើបញ្ហាសន្តិសុខក៏ដោយ គេមិនអាចមើលរំលងចិន គឺជាសម្ពន្ធ័មិត្តដ៏ធំរបស់កូរ៉េខាងជើងនោះទេ។ នេះ មានន័យថាប្រសិនកូរ៉េខាងត្បូង ហ៊ានចេញមុខប្រឆាំងចិនខ្លាំងក្លាដូចទៅនឹង ជប៉ុននិងអាមេរិកនោះ ចិន អាចវាយបកទៅកាន់កូរ៉េខាងត្បូងវិញតាមរយៈកូរ៉េខាងជើងជាក់ ជាពុំខាន៕
© រក្សាសិទ្ធិដោយ thmeythmey.com