ជនជាតិភាគតិចជ័ងនៅចិន បង្ហាញអត្តសញ្ញាណជាង២០០០ឆ្នាំមុនដល់ភ្ញៀវទេសចរ

ពីនេះ ពីនោះ

ជនជាតិភាគតិចជ័ងនៅចិន បង្ហាញអត្តសញ្ញាណជាង២០០០ឆ្នាំមុនដល់ភ្ញៀវទេសចរ

08, Nov 2015 , 6:39 pm

រូបភាព

ដោយ:

ខេត្តក្វាងស៊ី-ចិន៖ ចម្រៀងស្រាថ្វាយភ្ញៀវ ច្រៀងដោយយុវតីជនជាតិជ័ងព្រមៗគ្នា បានបន្លឺឡើងយ៉ាងពីរោះនៅពីមុខក្លោងទ្វារមណីយដ្ឋានភ្នំប៉ាយ៉ាសាតាគូ នៅស្រុកអ៊ូឈាន ខេត្តក្វាងស៊ី។ នារីវ័យក្មេងជាច្រើនដែលស្លៀកសម្លៀកបំពាក់ពណ៌ក្រហមឆើតឆាយ បានលើកស្រាជូនភ្ញៀវដោយទឹកមុខញញឹម និងបង្ហាញកាយវិការយ៉ាងរួសរាយរាក់ទាក់ដល់ភ្ញៀវទេសចរ ដែលឈានជើងដល់តំបន់រមណីយដ្ឋានខាងលើ។ នេះជាការទទួលស្វាគមន៍ភ្ញៀវទេសចរជាតិ និងអន្តរជាតិជាង២៣ម៉ឺននាក់ក្នុងមួយឆ្នាំៗ ដែលពួកគេមកកម្សាន្តនៅលើភ្នំប៉ាយ៉ាសាតាគូ ដែលមានទឹកធ្លាក់កំពស់១៣ជាន់។

នៅតាមផ្លូវឡើងភ្នំកំពស់១២០០ម៉ែត្រ ដែលត្រូវធ្វើដំណើរដោយថ្មើរជើង នារីៗស្រស់ស្អាតជនជាតិភាគតិចជ័ងទាំងនេះច្រៀងចម្រៀងព្រៃភ្នំអមដំណើរ និងនាំផ្លូវភ្ញៀវទេសចរឡើងទៅកន្លែងទឹកធ្លាក់ពីមួយជាន់ទៅមួយជាន់។ នៅតាមជ្រលងភ្នំក្បែរទឹកធ្លាក់មានកន្លែងសម្រាប់ភ្ញៀវទេសចរសម្រាកពិសាតែ, ស្តាប់ពិនបុរាណជនជាតិជ័ង លាយឡំនឹងសំឡេងសន្ធឹកទឹកធ្លាក់ពីលើភ្នំ បូកផ្សំជាមួយនឹងសំឡេងសត្វយំ។ល។ ទាំងនេះហើយដែលអន្ទងអារម្មណ៍ភ្ញៀវទេសចរឲ្យមកលេងនៅលើកំពូលភ្នំដែលមានមនុស្សរស់នៅតាំងពីជាង២០០០ឆ្នាំមុន ក្នុងរជ្ជកាល ឈីង។

នៅពេលដែលភ្ញៀវទេសចរទៅដល់កន្លែងទឹកធ្លាក់ពីមួយដំណាក់ទៅមួយដំណាក់ គេឃើញមានក្រុមរបាំឫស្សីរបស់យុវជន-យុវតីជនជាតិភាគតិចជ័ង ស្វះស្វែងកៀងគរភ្ញៀវទេសចរឲ្យចូលរាំ-ច្រៀងរបាំឫស្សីជាមួយពួកគេ ដើម្បីបង្ហាញពីការស្វាគមន៍យ៉ាងរួសរាយរាក់ទាក់ ដែលភ្ញៀវទេសចរទាំងនេះបានមកដល់កន្លែងរបស់ពួកគេ៕

តទៅនេះ សូមអញ្ជើញទស្សនាទិដ្ឋភាព ចម្រៀងស្រាថ្វាយភ្ញៀវ, ចម្រៀងព្រៃភ្នំ, របាំឫស្សី និងមានចម្រៀង និងរបាំជាច្រើនទៀត នៅលើភ្នំប៉ាយ៉ាសាតាគូ ដែលជាអត្តសញ្ញាណ វប្បធម៌ និងប្រពៃណីរបស់ជនជាតិដើមភាគតិចជ័ងរបស់ចិនបានបន្សល់ទុកនៅក្នុងរជ្ជកាល ឈីង កាលពីជាង២០០០ឆ្នាំមុនមកម្ល៉េះ៖