ជាតិ
មន្ត្រីជាន់ខ្ពស់CNRP គាំទ្រការព្រមានចាត់វិធានការមន្ត្រីពុករលួយរបស់លោកនាយករដ្ឋមន្ត្រី
× លោក អេង ឆៃអ៊ាង អនុប្រធានគណៈកម្មការនាយករបស់គណបក្សសង្គ្រោះជាតិ បានចេញមុខគាំទ្រការព្រមានចាត់វិធានការទៅលើមន្ត្រីពុករលួយ ដែលបណ្តោយឲ្យមានសំណង់អនាធិបតេយ្យ ប៉ះពាល់សោភណភាពក្នុងរាជធានីភ្នំពេញ។ លោកបានសរសេរនៅលើគណនេយ្យហ្វេសប៊ុករបស់ខ្លួនយ៉ាងដូច្នេះថា៖«មន្ត្រីមានអំណាច ពុករលួយ ស៊ីលុយក្រុមហ៊ុន NAGA World & Casino ទើបបើកដៃឲ្យក្រុមហ៊ុនសង់សំណង់យ៉ាងអានាធិបតេយ្យ។ គាំទ្រការចាត់វិធានការជាក់ស្តែងចំពោះមន្ត្រីពុករលួយទាំងនោះ»។
ជុំវិញសារគាំទ្រនេះ លោក អេង ឆៃអ៊ាង បានថ្លែងប្រាប់សារព័ត៌មានថ្មីៗនៅថ្ងៃទី៨ខែវិច្ឆិកាថា រូបលោកគាំទ្រគ្រប់ចំណាត់ការដែលផ្តល់ផលប្រយោជន៍ទៅប្រជាពលរដ្ឋ និងសង្គមជាតិ។ លោកថា៖«យើងគាំឲ្យតែវាផ្តល់ប្រយោជន៍ដល់ប្រជាពលរដ្ឋ និងសង្គមជាតិ ប៉ុន្តែបើចេះតែនិយាយ យើងទុកចោលមិនចាត់វិធានការ នោះយើងក៏មិនគាំទ្រដែរ»។
តែយ៉ាងណាក៏ដោយ មន្ត្រីជាន់ខ្ពស់គណបក្សប្រឆាំងរូបនេះ មិនមែនចង់ឃើញតែការចាត់វិធានការតែលើមន្ត្រីពុករលួយក្នុងវិស័យសំណង់នេះទេ លោកក៏ចង់ឃើញចំណាត់ការរបស់ រដ្ឋាភិបាល ទៅលើមន្ត្រីពុករលួយក្នុងវិស័យផ្សេងៗទៀតដែរ។ លោក ក៏បន្តឃ្លាំមើលចំណាត់ការនេះបន្តទៀតដែរ។
នៅថ្ងៃអាទិត្យ ទី៨ខែវិច្ឆិកា លោកនាយករដ្ឋមន្ត្រី ហ៊ុន សែន បានព្រមានចាត់វិធានការលើមន្ត្រីខិលខូច និងក្រុមហ៊ុនឯកជនដែលបានឃុបឃិតគ្នាសាងសង់សំណង់ហួសពីច្បាប់បានកំណត់ សាងសង់រំលោភលើផ្លូវសាធារណៈ និងសួនច្បារសាធារណៈជាដើម។
នៅក្នុងសារព្រមានដែលបានសរសេរនៅលើទំព័រហ្វេសប៊ុកផ្លូវការរបស់លោកមានខ្លឹមសារថា៖«បើធ្វើនៅទីតាំងកន្លែងណា គឺអាជ្ញាធរមានសមត្ថកិច្ច និងក្រសួងពាក់ព័ន្ឋត្រូវតែទទួលខុសត្រូវ។ ចំពោះក្រុមហ៊ុនឯកជនក៏ដូច្នោះដែរ គឺមិនមែនបានទទួលច្បាប់ធ្វើប៉ុណ្ណេះ ដល់ពេលសាងសង់ធ្វើហួសពីច្បាប់បានកំណត់ ដោយឃុបឃិតជាមួយមន្ត្រីខិលខូចក៏មានទោសដែរ»។
សូមបញ្ជាក់ថា កាលពីថ្ងៃទី៥ខែវិច្ឆិកាកន្លងទៅ លោកនាយករដ្ឋមន្ត្រីបានធ្វើដំណើរថ្មើរជើងទៅចុះត្រួតពិនិត្យដោយផ្ទាល់ នូវការដ្ឋានសំណង់របស់ក្រុមហ៊ុនNaga world ដែលបានសាងសង់ខុសច្បាប់អនុញ្ញាត និងធ្វើឱ្យមានការប៉ះពាល់ដល់សោភណភាពរាជធានីភ្នំពេញ។ ជាមួយគ្នានោះ លោក ហ៊ុន សែន ក៏បញ្ជាឲ្យអាជ្ញាធរមានសមត្ថកិច្ច និងអ្នកជំនាញពាក់ព័ន្ធទាំងអស់ ប្រជុំពិភាក្សា និងមានវិធានការកែលម្អជាបន្ទាន់ ធ្វើយ៉ាងណារក្សាឲ្យបាននូវសោភណភាពសាធារណៈ។ មួយថ្ងៃក្រោយការបញ្ជារបស់លោក នាយករដ្ឋមន្ត្រី ក្រសួងរៀបចំដែនដី នគរូបនីយកម្ម និងសំណង់ និងសាលារាជធានីភ្នំពេញ បានសម្រេចឲ្យក្រុមហ៊ុនណាហ្គាវើល ផ្អាក និងរុះរើសំណង់ជាបន្ទាន់ ក្រោមហេតុផលថា សាងសង់ខុសពីច្បាប់អនុញ្ញាត៕
Tag:
អេង ឆៃអ៊ាង
ហ៊ុន សែន
សំណង់អនាធិបតេយ្យ
© រក្សាសិទ្ធិដោយ thmeythmey.com