ជាតិ
នយោបាយជាតិ
រូបពីហ្វេសប៊ុកលោក គង់ សភា
×![]()
ដោយ: ម៉ៅ សុផា
លោក គង់ សភា ដែលទទួលនូវការវាយប្រហារដ៏ធ្ងន់ធ្ងរ ជាមួយ លោក ញ៉យ ចំរើន តំណាងរាស្ត្របក្សសង្គ្រោះជាតិ នៅក្បែរវិមានរដ្ឋសភា កាលពីចុងខែតុលាកន្លងទៅ បានត្អូញត្អែរពីវិធានការររបស់សមត្ថកិច្ច ក្នុងការចាប់ជនដៃដល់ដែលបានវាយដំមកលើពួកលោកទាំងពីរ។ លោក គង់ សភា បានលើកឡើងថា តើពេលណាទៅ ទើបពួកលោក រួមទាំងប្រជាពលរដ្ឋរងគ្រោះដទៃទៀតទទួលបានយុត្តិធម៌ពិតប្រាកដ?
តាមរយៈទំព័រហ្វេសប៊ុករបស់ខ្លួន នៅថ្ងៃទី១១វិច្ឆិកានេះ លោក គង់ សភា បានចាតុទុកអំពើហិង្សា កាលពីថ្ងៃទី២៦ តុលា ឆ្នាំ២០១៥ កន្លងទៅ ថាជាព្រឹត្តិការណ៍ដ៏សាហាវយង់ឃ្នង ដោយមិនអាចបំភ្លេចបានក្នុងប្រវត្តិសាស្ត្រ ដែលជនដៃដល់មួយក្រុម បានរៀបចំផែនការប៉ុនប៉ងវាយសម្លាប់រូបលោក និងលោក ញ៉យ ចំរើន។ ជាងនេះទៅទៀត អ្នកតំណាងរាស្ត្រជាជនរងគ្រោះរូបនេះ ក៏បានសម្តែងពីភាពមិនប្រាកដប្រជារបស់អាជ្ញាធរមានសមត្ថកិច្ច ក្នុងការចាត់វិធានការ ដើម្បីចាប់ជនល្មើសមកផ្តន្ទាទោស។
លោកបានលើកឡើងយ៉ាងនេះថា៖ «តើនៅពេលណាទៅ ទើបអាជ្ញាធរមានសមត្ថកិច្ចចាប់ជនដៃដល់រផ្សេងទៀតបាន ក្រៅពីជនសង្ស័យ ៣នាក់ ចេញមុខមកសារភាពនោះ? តើពេលណា ទើបពួកខ្ញុំទាំងពីរនាក់ និងប្រជាពលរដ្ឋខ្មែរដែលរងគ្រោះផ្សេងទៀត ទទួលបានយុត្តិធម៌ពិតប្រាកដ?»
ទាក់ទងនឹងអំពើហិង្សានេះផងដែរ កាលពីថ្ងៃទី១០ វិច្ឆិកា ម្សិលមិញ លោក គង់ សភា និងលោក ញ៉យ ចំរើន បានសម្រេចចិត្តដាក់ពាក្យបណ្តឹងទៅកាន់សាលាដំបូងរាជធានីភ្នំពេញ ដើម្បីប្តឹងជនល្មើសពីបទ «ប៉ុនប៉ងឃាតកម្មគិតទុកជាមុន និងធ្វើឲ្យខូចខាតដោយចេតនាមានស្ថានទម្ងន់ទោស» ហើយនិងទាមទារសំណងពីជនល្មើសក្នុងម្នាក់ៗចំនួន១០០លានរៀល។
សូមរម្លឹកថា លោក គង់ សភា និងលោក ញ៉យ ចំរើន ត្រូវបានជនមិនស្គាល់អត្តសញ្ញាណមួយក្រុមវាយដំ បណ្តាលឲ្យរងរបួសធ្ងន់ នៅក្បែរវិមានរដ្ឋសភា កាលពីថ្ងៃទី២៦ ខែតុលា ឆ្នាំ២០១៥ ហើយបច្ចុប្បន្ន អ្នកតំណាងរាស្ត្រទាំងពីររូបនេះ កំពុងតែសម្រាកព្យាបាលជំងីនៅប្រទេសថៃ។ កាលពីថ្ងៃទី៣ ខែវិច្ឆិកា ឆ្នាំ២០១៥ ជនដៃដល់បីនាក់ ចូលបង្ហាញខ្លួនចំពោះមុខសមត្ថកិច្ច និងត្រូវបានសាលាដំបូងរាជធានីភ្នំពេញ សម្រេចបញ្ជូនពួកគេ ទៅឃុំខ្លួនបណ្តោះអាសន្ន ក្នុងពន្ធនាគារព្រៃស ក្រោយការចោទប្រកាន់ពីបទបង្កហិង្សាដោយចេតនា និងធ្វើឲ្យខូចខាតទ្រព្យសម្បត្តិមានស្ថានទម្ងន់ទោស៕
Tag:
គង់ សភា
ញ៉យ ចំរើន
© រក្សាសិទ្ធិដោយ thmeythmey.com
