អន្តរជាតិ
នយោបាយអន្តរជាតិ
លោកស្រី អ៊ុងសាន ស៊ូជី បានការសាទរពីមេដឹកនាំកំពូលអស់ហើយ
×
ចុងក្រោយ មេដឹកនាំបក្សប្រឆាំងសម្ពន្ធ័ជាតិដើម្បីប្រជាធិបតេយ្យលោកស្រី អ៊ុងសាន ស៊ូជី បាន ទទួលទាំងការសាទរ និង ការទទួលយល់ព្រមដើម្បីជួបពិភាក្សាលើការផ្សះផ្សារជាតិ និង ផ្ទេរអំណាចពីមេដឹកនាំកំពូលបីរូបដែលរូមមានលោកប្រធានាធិបតីថេន សេន ប្រធានសភាលោកស្វេ ម៉ាន់ និង មេយោធាលោក Min Aung Hlaing។
ក្រោយពីការផ្ញើលិខិតបីដាច់ដោយឡែកពីគ្នារបស់មេដឹកនាំបក្សប្រឆាំងលោកស្រីអ៊ុងសាន ស៊ូជី ទៅកាន់មេដឹកនាំកំពូលបីរូបកាលពីថ្ងៃម្សិលមិញ លោកស្រី បានទទួលបានការសាទរចំពោះលទ្ធផលបោះឆ្នោត និង ជំនួបលើការផ្សះផ្សារជាតិ និង ផ្ទេរអំណាច។
អ្នកនាំពាក្យប្រធានាធិបតីមីយ៉ាន់ម៉ាលោក Ye Htut បានថ្លែងប្រាប់សារព័ត៌មានអូស្ត្រាលី ABC ថា លោក ថេន សេន បានយល់ព្រមតាមសំណើសុំជួបពីសំណាក់លោកស្រីស៊ូជី ដើម្បីពិភាក្សាពីដើម្បីពិភាក្សារឿងផ្ទេរអំណាច ប៉ុន្តែមិនទាន់កំណត់ពេលវេលាច្បាស់លាស់ឡើយពោលគឺអាចរហូតដល់លទ្ធផលនៃការបោះឆ្នោតផ្លូវការត្រូវបានបង្ហាញ។
មិនខុសពីលោកថេន សេន ប្រធានរដ្ឋសភា ស្វេ ម៉ាន់ និង ជាបេក្ខភាពតំណាងរាស្ត្របក្សកាន់អំណាច ក៏បានយល់ព្រមជួបជាមួយនឹងលោកស្រីអ៊ុងសាន ស៊ូជីផងដែរ។ តាមរយៈសេចក្តីថ្លែងការណ៍អនឡាញមួយ លោកស្វេ ម៉ាន់ បានបញ្ជាក់ថា លោក នឹងរៀបចំនូវជំនួបជាមួយនឹងលោកស្រី ស៊ូជី ក្នុងរយៈពេល១សបា្តហ៍ ដោយមិនត្រឹមតែពិភាក្សាលើការផ្សះផ្សារជាតិនោះទេ តែក្នុងគោលបំណងផ្សេងទៀតផងដែរ។ ហើយ លោក សង្កត់ធ្ងន់ថា៖ ខ្ញុំ សង្ឃឹមថា ខ្ញុំអាចចូលរួមក្នុងការកសាងសន្តិភាព និងការអភិវឌ្ឍន៍សម្រាប់ជាតិដ៏ល្អមួយ។ លោក ស្វេ ម៉ាន់ នឹងបន្តតំណែងជាប្រធានសភារហូតដល់ខែមករា ពោលគឺរហូតដល់មានការជ្រើសរើសប្រធានាធិបតីថ្មី និង ការបង្កើតរដ្ឋាភិបាលថ្មីនៅខែមិនា។
បុគ្គលចុងក្រោយដែលទើបតែទទួលសំណើរបស់លោកស្រីស៊ូជីនោះ គឺលោកឧត្តមសេនីយ៍ Min Aung Hlaing។ ប្រមុខកងទ័ពមីយ៉ាន់ម៉ាលោក Min Aung Hlaing បានសាទរគណបក្សសម្ព័ន្ធជាតិដើម្បីប្រជាធិបតេយ្យរបស់លោកស្រី ស៊ូជី ដែលបានទទួលសំឡេងភាគច្រើនក្នុងការបោះឆ្នោតកាលពីថ្ងៃអាទិត្យ ទី៨វិច្ឆិកា។ ប្រមុខកងទ័ពដ៏មានអំណាចរូបនេះ ក៏បានយល់ព្រមជួបជាមួយលោកស្រី ស៊ូជីផងដែរ នៅពេលដែលលទ្ធផលបោះឆ្នោតផ្លូវការត្រូវបានប្រកាសរួចរាល់។
សូមបញ្ជាក់ផងដែរថា ការបោះឆ្នោតមីយ៉ាន់ម៉ា ដែលប្រព្រឹត្តឡើងកាលពីថ្ងៃទី០៨ ខែវិច្ឆិកា បានបញ្ចប់ ទៅដោយរលូន សន្តិសុខ និង តម្លាភាព។ ការបោះឆ្នោតនេះ ទទួលបានសាទរពីសហគមន៍អន្តរជាតិ ។ យ៉ាងណាមិញ ការព្រមចូលតុពិភាក្សាជាមួយគ្នារវាងមេដឹកនាំកំពូលមីយ៉ាន់ម៉ា គឺជាសារនយោបាយ មួយដ៏វិជ្ជមានសម្រាប់ប្រទេសលទ្ធិប្រជាធិបតេយ្យវ័យក្មេង និង សុភមង្គលរបស់ប្រជាជនមីយ៉ាន់ម៉ា តែម្តង៕
© រក្សាសិទ្ធិដោយ thmeythmey.com