ពីនេះ ពីនោះ
គំនិត «វាយបំបាក់ដើម្បីត្រួតត្រា» ពិតជានៅមានប្រសិទ្ធភាពនៅក្នុងសង្គម!
× តាំងតែពីបុរាណកាលមកអ្នកដឹកនាំខ្មែរ ព្រះរាជខ្មែរបានប្រើយុទ្ធសាស្ត្រមួយគឺ «វាយបំបាក់ដើម្បីត្រួតត្រា» ក្នុងបុព្វហេតុពង្រីកវិសាលភាពទឹកដី។ ហើយគំនិតនេះត្រូវបានអនុវត្តន៍តាំងពីរជ្ជកាលព្រះបាទហ៊ុនទៀន ចំណែកអ្នកដឹកនាំសម័យក្រោយៗ ព្រះអង្គក៏បន្តអនុវត្តគំនិតនយោបាយនេះដូចគ្នា។ ចំណែកបច្ចុប្បន្នភាពនេះនៅតែបន្តអនុវត្តន៍គោលគំនិតនេះយ៉ាងពេញនិយម។
ដើម្បីប្រតិបត្តិគំនិត ឬយុទ្ធសាស្ត្រមួយនេះបាន គឺគេត្រូវពឹងផ្អែកលើរបស់បីយ៉ាងដែលមានសារសំខាន់បំផុតដើម្បីកិច្ចការនេះទទួលបានជោគជ័យ។ របស់ទាំងអស់នោះគឺ ទីមួយ. មានបុគ្គលមួយរូបដែលជាអ្នកចម្បាំងដ៏ខ្លាំងក្លា ទីពីរ. មានកម្លាំងកងទ័ពខ្លាំងក្លា និងទីបី. មានមនុស្សជំនិតជាទីទុកចិត្តរបស់អ្នកដឹកនាំ ដើម្បីទៅគ្រប់គ្រងនគរចំណុះទើបមិនមានបញ្ហា។
រហូតមកដល់សម័យបច្ចេកវិទ្យា សម័យវិទ្យាសាស្ត្រ សម័យទំនើបនេះ គេឃើញថាប្រទេសណាក៏បានអនុវត្តន៍ដែរ តែវាមិនមែនមានទិដ្ឋភាពជាការត្រួតត្រាប្រទេសចំណុះដូចសម័យមុននោះទេ។ ហើយប្រទេសមហាអំណាចធំក៏នៅតែមានការអនុវត្តគោលគំនិតមួយនេះដដែល។ តែប្រទេសទាំងនោះបានប្រើរូបភាពផ្ទុយពីសម័យមុន ដែលតែងតែធ្វើសង្គ្រាមអាវុធដើម្បីវាយបំបាក់សត្រូវរបស់ខ្លួនដើម្បីត្រួតត្រា តែសម័យថ្មីនេះគេប្រើរូបភាពជាការធ្វើសង្គ្រាមសេដ្ឋកិច្ច សង្គ្រាមមនោគមន៍វិជ្ជានយោបាយ និងការបង្ហាញនូវសាច់ដុំអាវុធទំនើបកម្ម។
និយាយជារូបភាពប្រទេសមួយជាមួយប្រទេសមួយគឺជារឿងមួយដែលដាច់ខាតត្រូវតែមាន។ ចំណែកនៅក្នុងប្រទេសក្នុងស្រុក ក៏គេពេញនិយមប្រើប្រាស់គោលគំនិតនេះផងដែរទាំងនៅក្នុងវិស័យពាណិជ្ជកម្ម និងនយោបាយ។ ជាពិសេសនៅក្នុងវិស័យនយោបាយបច្ចុប្បន្ននេះ អ្នកនយោបាយគឺកំពុងតែប្រើយុទ្ធសាស្ត្រមួយនេះដើម្បីបំបាក់ស្មារតីដៃគូរប្រកួត និងអ្នកគាំទ្រនយោបាយបក្សផ្សេងដែលមិនមែណជាបក្សរបស់ខ្លួន។ ហើយគេឃើញថាវានៅតែមានប្រសិទ្ធភាពដដែលចំពោះអ្នកដែលទទួលរងឥទ្ធិពលយុទ្ធសាស្ត្រមួយនេះ៕
© រក្សាសិទ្ធិដោយ thmeythmey.com