អន្តរជាតិ
នយោបាយអន្តរជាតិ
អាមេរិក ទទូចឱ្យកែរដ្ឋធម្មនុញ្ញបើកផ្លូវដល់លោកស្រី ស៊ូជី ធ្វើជាប្រធានាធិបតី
×![]()
ដោយ: តន ចាន់រិទ្ធារ៉ា
សហរដ្ឋអាមេរិក បានទទូចឱ្យមានការធ្វើវិសោធនកម្មរដ្ឋធម្មនុញ្ញ ដែលបានរារាំងការឡើងធ្វើជាប្រធានាធិបតីរបស់ប្រធានគណបក្សប្រឆាំងលោកស្រី អ៊ុងសាន ស៊ូជី។ ។ អាមេរិកបានលើកឡើងថា នេះជារឿងចាំបាច់សម្រាប់ដំណើរការទៅមុខនៃលទ្ធិប្រជាធិបតេយ្យក្មេងខ្ចីមីយ៉ាន់ម៉ា បន្ទាប់ពីការបោះឆ្នោតជាប្រវត្តិសាស្ត្រកាលពីថ្ងៃអាទិត្យទី០៨ សប្ដាហ៍មុន។
កាលពីម្សិលមិញ លោកប្រធានាធិបតី បារ៉ាក់ អូបាម៉ា បានទូរសព្ទទៅកាន់លោកស្រី អ៊ុងសាន ស៊ូជី ដើម្បីអបអរសាទរជ័យជម្នះលោកស្រីក្នុងការបោះឆ្នោតនៅថ្ងៃទី៨ខែវិច្ឆិកាកន្លងទៅ។ បន្ទាប់មកទៀត សេតវិមាន ក៏បានលើកឡើងពីជំហានចាំបាច់ផ្សេងទៀតសម្រាប់លទ្ធិប្រជាធិបតេយ្យនៅមីយ៉ាន់ម៉ា ជាពិសេសបញ្ហាទាក់ទងនឹងការធ្វើវិសោធនកម្មរដ្ឋធម្មនុញ្ញ។
លោក Ben Rhodes ទីប្រឹក្សាទទួលបន្ទុកកិច្ចការបរទេសរបស់ប្រធានាធិបតី អូបាម៉ា បានថា ដំណើរការផ្លាស់ប្ដូរទៅកាន់លទ្ធិប្រជាធិបតេយ្យនៅក្នុងមីយ៉ាន់ម៉ា គឺចាំបាច់ត្រូវតែមានកំណែទម្រង់រដ្ឋធម្មនុញ្ញ។ លោកបន្តថា បើទោះបីជាមានការបោះឆ្នោតក៏ដោយ យោធាក៏ត្រូវគ្រប់គ្រងអាសនៈចំនួន២៥ភាគរយនៃសភាជាន់ទាប និងសភាជាន់ខ្ពស់នៃប្រទេសមីយ៉ានម៉ាដែរ។
ទាក់ទងនឹងតំណែងប្រធានាធិបតីនេះ លោកស្រី អ៊ុងសាន ស៊ូជី ត្រូវបានរដ្ឋធម្មនុញ្ញនៃមីយ៉ានម៉ា រារាំងមិនឲ្យលោកស្រីកាន់តំណែងនេះបានទេ ព្រោះតែស្វាមីរបស់អ្នកស្រីជាជនជាតិបរទេស (ជនជាតិអង់គ្លេស)។ មាន័យថាលោកស្រី គឺមិនមានឱកាសដឹកនាំប្រទេសក្នុងតំណែងជាប្រធានាធិបតីស្រប់ច្បាប់នោះទេ ប្រសិនបើក្រុមយោធាមិនព្រម។ តែបើមានភ្លើងខៀវពីក្រុមយោធា ពេលនោះ លោកស្រី អ៊ុងសាន ស៊ូជី អាចមានឱកាសស្របច្បាប់ក្នុងការដឹកនាំប្រទេសបាន។
យ៉ាងណាក៏ដោយ បើសិនជាមិនអាចក្លាយជាប្រធានាធិបតី លោកស្រី អ៊ុងសាន ស៊ូជី នឹងដើរផ្លូវមួយទៀត ពីព្រោះលោកស្រីធ្លាប់បានប្រាប់អ្នកសារព័ត៌មានថា លោកកស្រីនឹងទទួលបានតំណែងខ្ពស់ជាងតំណែងប្រធានាធិបតីទៅទៀត៕
Tag:
មីយ៉ាន់ម៉ា
© រក្សាសិទ្ធិដោយ thmeythmey.com
