អន្តរជាតិ
ញូវយ៉ក ៖ អ្នកសុំទានម្នាក់រកប្រាក់បាន ២០០ ដុល្លារក្នុងមួយម៉ោង ដោយសារសត្វឆ្កែ
×
អ្នកសុំទានម្នាក់ដែលអង្គុយរង់ចាំការដាក់ទាននៅស្ថានីយ៍អ្នកដំណើរមួយ ( Grand Central Terminal ) នៅទីក្រុងញូវយ៉ក អាចរកប្រាក់បាន ២០០ ដុល្លារក្នុងមួយម៉ោង ដោយសារតែទឹកចិត្តសន្តោសរបស់ពលរដ្ឋក្នុងទីក្រុងនេះ។
លោក Will Andersen អាយុ ៤៣ ឆ្នាំធ្លាប់បម្រើការជាអ្នកកាន់ខាងម៉ាស៊ីននៅរោងល្ខោនមួយ អាចចិញ្ចឹមជីវិតដោយងាយស្រួល ដោយសារតែអ្នកដំណើរអាណិតស្រឡាញ់សត្វឆ្កែរបស់គាត់ឈ្មោះ Rizzo ។ ពេលនេះ សត្វឆ្កែនេះមានអាយុ ៩ ឆ្នាំហើយ។ លោកបានអះអាងប្រាប់ New Yourk Post ថា៖ « នៅព្រឹកថ្ងៃសុក្រមួយនោះ ត្រឹមតែ២ ម៉ោងសោះ រកបានប្រាក់ដល់ទៅ ៤០០ ដុល្លារ »។ ជាមួយនឹងប្រាក់ដែលគាត់អាចរកបានដោយងាយស្រួលនោះ គាត់មានលទ្ធភាពជួលបន្ទប់មួយក្នុងតម្លៃ ៣០០ ដុល្លារក្នុងមួយខែ បន្ទាប់ពីរស់នៅដោយគ្មានផ្ទះសម្បែងអស់រយៈពេល ៣ ឆ្នាំមក។ ពេលនេះ គាត់នៅតាមផ្លូវ តែពេលត្រូវសុំទានគេប៉ុណ្ណោះ។
នៅពេលដែលជួបអ្នកចិត្តទូលាយ បុរសរូបនេះទទួលបានប្រាក់ពី ៨០ ទៅ ១០០ ដុល្លារ ហើយជាទូទៅ ពួកគេតែងតែនិយាយថា « យកលុយនេះ ទៅសម្រាកឲ្យស្រួលខ្លួនចុះយប់នេះ » ។ ពួកគេចង់មានន័យថា ឲ្យលោក Andersen ទៅសម្រាកនៅសណ្ឋាគារឲ្យបានស្រួលខ្លួនម្តង។ លោកបានអះអាងបន្តទៀតថា អ្នកខ្លះឲ្យប្រាក់លោកត្រឹមតែ ៥ ដុល្លារប៉ុណ្ណោះក្នុងមួយថ្ងៃ ប៉ុន្តែ ពួកគេឲ្យ ៥ ថ្ងៃក្នុងមួយសប្តាហ៍។ អ្នកខ្លះទៀតឲ្យតែ ១ ដុល្លារទេ។ សម្រាប់អ្នកដែលឲ្យប្រាក់តិចៗទាំងនេះតែងតែនិយាយថា៖ « នេះសម្រាប់សត្វឆ្កែ »។
អាជីពនេះមិនមែនសុទ្ធតែកាក់កបសម្រាប់អ្នកសុំទានគ្រប់រូបនោះទេ អ្វីៗវាអាស្រ័យនៅលើទីតាំងដែរ។ ប៉ុន្តែ វាជារឿងគួរឲ្យសោកស្តាយណាស់សម្រាប់លោក Andersen ដែលបានបោះបង់ចោលកន្លែងរកស៊ីចាស់ដ៏ល្អបែបនេះ បន្ទាប់ពីគាត់ល្បីល្បាញយ៉ាងខ្លាំងក្នុងបណ្តាញព័ត៌មានមក។ ពេលនេះ គេមិនដឹងថា តើគាត់ត្រូវផ្លាស់ប្តូរទីកន្លែងសុំទាន ឬប្តូរមុខរបរនោះទេ៕
© រក្សាសិទ្ធិដោយ thmeythmey.com