អន្តរជាតិ
សំណង់អគារស្នាក់នៅសិង្ហបុរីជាប់ឈ្មោះជាស្ថាបត្យកម្មពិភពលោកដ៏អស្ចារ្យឆ្នាំ ២០១៥
× សំណង់អគារស្នាក់នៅមួយនៅសិង្ហបុរី ត្រូវបានជាប់ជាសំណង់ស្ថាបត្យកម្មពិភពលោកដ៏អស្ចារ្យប្រចាំឆ្នាំ ២០១៥ កាលពីសប្តាហ៍មុន នៅក្នុងពិធីមហោស្រពស្ថាបត្យកម្មពិភពលោក ដែលបានប្រារព្ធធើ្វឡើងក្នុងប្រទេសនេះ ពីថ្ងៃទី ៤ ដល់ទី ៦ ខែវិច្ឆិកា។ សំណង់ដែលជាអគារច្រើនជាន់ត្រួតលើគ្នានោះ មានឈ្មោះថា The Interlace ។
សំណង់ដ៏អស្ចារ្យនេះត្រូវបានសាងសង់រួចកាលពីឆ្នាំ ២០១៣ មានអគារចំនួន ៣១ ដែលមានរាងជាចតុកោណកែង និងដាក់ត្រួតលើគ្នាបញ្ឆិតៗ ពីមួយទៅមួយ។ ស្ថាបត្យករដែលរចនាម៉ូដសំណង់អគារនេះ គឺជាជនជាតិអាល្លឺម៉ង់ឈ្មោះថា Ole Scheeren ។ គោលបំណងនៃការរចនាម៉ូដនេះ គឺដើម្បីបង្កើតអគារស្នាក់នៅក្នុងដង់ស៊ីតេប្រជាជនដ៏ខ្ពស់ ដោយមិនចាំបាច់រកទីតាំងខុសៗគ្នាក្នុងការសាងសង់តួអគារនោះទេ។ The Interlace មានទំហំ ១៧០ ០០០ ម៉ែត្រការេ សាងសង់លើផ្ទៃដីទំហំ ៨ ហិចតា។ អគារនីមួយៗមាន ៦ ជាន់ និងបណ្តោយប្រវែង ៧០ ម៉ែត្រ។
សំណង់នេះត្រូវបានជាប់ជាសំណង់ស្ថាបត្យកម្មពិភពលោក ដោយសារតែវាជាសំណង់គំរូបង្ហាញពីភាពអង់អាច ដែលជាគោលគំនិតនៃស្ថាបត្យកម្មសម័យទំនើប។ ម្យ៉ាងទៀត ស្ថាបត្យកម្មនេះរចនាឡើងដោយធ្វើឲ្យការរស់នៅរបស់មនុស្ស មានការប្រាស័យទាក់ទងគ្នា ដោយផ្សារភ្ជាប់នឹងធម្មជាតិផងដែរ។ សំណង់នេះគឺជាសំណង់អគារដ៏ធំសម្បើមបំផុតមួយក្នុងប្រវត្តិសាស្ត្រនៃការអភិវឌ្ឍន៍កន្លែងរស់នៅក្នុងប្រទេសសិង្ហបុរី៕
© រក្សាសិទ្ធិដោយ thmeythmey.com