លោក សម រង្ស៊ី នឹងមកដល់កម្ពុជានៅម៉ោង ១១ យប់ថ្ងៃស្អែកនៅព្រលានយន្តហោះខេត្តសៀមរាប

ជាតិ

នយោបាយជាតិ

លោក សម រង្ស៊ី នឹងមកដល់កម្ពុជានៅម៉ោង ១១ យប់ថ្ងៃស្អែកនៅព្រលានយន្តហោះខេត្តសៀមរាប

15, Nov 2015 , 12:43 pm

រូបភាព

ដោយ:

មន្ត្រីជាន់ខ្ពស់គណបក្សសង្គ្រោះជាតិលោក អេង ឆៃអ៊ាង បានអះអាងថា លោក សម រង្ស៊ី ប្រធានកណបក្សសង្គ្រោះជាតិ នឹងមកដល់ប្រទេសកម្ពុយជានៅថ្ងៃទី ១៦ ខែ វិច្ឆិកា ស្អែកនេះ។

លោក អេង ឆៃអ៊ាង មន្ត្រីស្និទ្ធនឹងលោក សម រង្ស៊ី បានបញ្ជាក់ប្រាប់សារព័ត៌មានថ្មីៗ យ៉ាងនេះថា៖« តាមគម្រោង ហើយអាចនឹងមិនផ្លាស់ប្តូរទេ លោក សម រង្ស៊ី នឹងត្រឡប់មកកម្ពុជានៅថ្ងៃស្អែក។ តាមគម្រោងគាត់មកដល់ព្រលានយន្តហោះអន្តរជាតិខេត្តសៀមរាប នៅម៉ោង ១១ យប់ថ្ងៃទី ១៦ ខែវិច្ឆិកា»។

ចំណែកលោក កឹម សុខា មិនទាន់ត្រឡប់មកកម្ពុជាវិញទេ លោកអនុប្រធានគណបក្សប្រឆាំងរូបនេះ នឹងបន្តដំណើរទៅកាន់ប្រទេសមួយចំនួននៅអ៊ឺរ៉ុប។ នេះបើតាមមន្ត្រីខាងលើ។

កាលពីថ្ងៃទី ១៤ ខែ វិច្ឆិកា លោក សម រង្ស៊ី បានថ្លែងប្រាប់ពលករនៅប្រទេសកូរ៉េថា រូបលោកនឹងត្រឡប់មកកាន់ប្រទេសកម្ពុជាវិញ បើទោះបីជាមានការចាប់ចងពីសំណាក់អាជ្ញាធរខ្មែរក៏ដោយ។ លោក សម រង្ស៊ី បានបញ្ជាក់យ៉ាងនេះថា៖« សម រង្ស៊ី អត់ខ្លាចទេ។ សម រង្ស៊ី កឹម សុខា ដូចកូនខ្មែរទាំងអស់ សុខចិត្តបូជាជីវិត ឲ្យតែជាតិបានរស់។ ដូច្នេះខ្ញុំអត់ខ្លាចទេ យកខ្ញុំទៅណា យកទៅ តែព្រលឹងខ្ញុំនៅតែស្រឡាញ់ខ្មែរ ការពារខ្មែរ..។ ចង់ចាប់សម រង្ស៊ី ចាប់ចុះ »។

លោក ផៃ ស៊ីផាន អ្នកនាំពាក្យទីស្តីការគណរដ្ឋមន្ត្រី បានអះអាងប្រាប់សារព័ត៌មានថ្មីៗថា រដ្ឋាភិបាលកម្ពុជាស្វាគមន៍ដំណើរមកកាន់កម្ពុជារបស់លោក សម រង្ស៊ី ដើម្បីទទួលទោសរបស់ខ្លួន។

សូមបញ្ជាក់ថា កាលពីថ្ងៃទី១៣ ខែវិច្ឆិកា លោក ស៊ឺ វណ្ណនី ព្រះរាជអជ្ញារងសាលារាជធានីភ្នំពេញ បានចេញដីកាចាប់ខ្លួនលោក សម រង្ស៊ី តាមអំណាចសាលដីកាស្ថាពរ ចុះថ្ងៃទី១២ ខែមីនា ឆ្នាំ២០១៣ របស់សាលាឧទ្ធរណ៍។ លោក សម រង្ស៊ី ត្រូវចោទប្រកាន់ពីបទ បរិហារកេរ្តិ៍ជាសាធារណៈ និងញុះញង់ឲ្យមានការរើសអើង ប្រព្រឹត្តទៅនៅសារមន្ទីរជើងឯក កាលពីថ្ងៃទី១៧ ខែមេសា ឆ្នាំ២០០៨ ដែលត្រូវជាប់ពន្ធនាគាររយៈពេល ២ ឆ្នាំ និងពិន័យជាប្រាក់ ៨ លានរៀល។