កីឡាជាតិ
ជាតិ
E-Sport: តំបន់ទី៣ និង៤ រកឃើញក្រុមខ្លាំងទៅប្រកួតផ្តាច់ព្រ័ត្រនៅបុណ្យសមុទ្រ ការប្រកួតជ្រើសរើសជើងឯកកីឡាអេឡិចត្រូនិកប្រចាំឆ្នាំ២០១៥ (Cambodian Cyber Championship, CCC 2015) លើវិញ្ញាសា AK2 រកឃើញក្រុមខ្លាំងក្នុងតំបន់ទី៣ និងតំបន់៤ ហើយ ដើម្បីប្រកួតផ្តាច់ព្រ័ត្រនៅក្នុងពិធីបុណ្យសមុទ្រថ្ងៃទី១១, ១២ ខែឆ្នូខាងមុខ។ ដោយតំបន់៣ មានក្រុម Team Orn70, ក្រុម FiveDragon និងក្រុម The Chance ចំណែកតំបន់៤ មានក្រុមNeverCare, Will Show U និងក្រុម G-Mission ។
តំបន់ទី៣នៃការប្រកួតកីឡាអេឡិចត្រូនិកជ្រើសរើសជើងឯកប្រចាំឆ្នាំ២០១៥ បានបញ្ចប់កាលពីសប្តាហ៍មុន ដោយមានក្រុមចូលរួមប្រកួតមកពី ខេត្តសៀមរាប ឧត្តរមានជ័យ ព្រះវិហារ និងខេត្តកំពង់ធំ។ បន្ទាប់ពីធ្វើការប្រកួតប្រជែងគ្នាអស់រយៈពេលមួយសបា្តហ៍ តាំងពីថ្ងៃទី២ ខែវិច្ឆិកា ដល់ ថ្ងៃទី៨ ខែវិច្ឆិកា បានរកឃើញក្រុមខ្លាំងចំនួន៣ ដែលមានសិទ្ធប្រកួតវគ្គផ្តាច់ព្រ័ត្រនៅបុណ្យសមុទ្រក្នុងនោះមានក្រុម Team Orn70 មកពីខេត្តកំពង់ធំ និងក្រុម FiveDragon មកពីខេត្តសៀមរាប ក្រុមទាំងពីរត្រូវឡើងទៅជួបគ្នាវគ្គផ្តាច់ព្រ័ត្រ ខណៈក្រុម The Chance មកពីខេត្តសៀមរាបជាប់លេខ៣ប្រចាំតំបន់នេះ។
ការឡើងទៅប្រកួតវគ្គផ្តាច់ព្រ័ត្រនេះដែរបន្ទាប់ពីក្រុម Team Orn70 បានយកឈ្នះក្រុម The MarShai ដោយលទ្ធផល ៥-២ នៅវគ្គពាក់កណ្តាលផ្តាច់ព្រ័ត្រ ខណៈក្រុម Five Dragon បានយកឈ្នះក្រុម The Chance ដោយលទ្ធផល ៥-២។ ចំណែក The Chance បានយកឈ្នះ The MarShai ដោយលទ្ធផល ៥-២ ដើម្បីបានចំណាត់ថ្នាក់លេខ៣ សម្រាប់ការប្រកួតជម្រុះប្រចាំតំបន់ទី៣នេះ។
ការប្រកួតជម្រុះស្វែងរកក្រុមខ្លាំងប្រចាំតំបន់ទី៤ ដែលមានក្រុមជាច្រើនតំណាងឲ្យខេត្តបាត់ដំបង បន្ទាយមានជ័យ ប៉ៃលិន កំពង់ឆ្នាំង និងពោធិ៍សាត់ បានចូលរួមប្រកួត ចាប់ផ្តើមពីថ្ងៃទី៩ វិច្ឆិកា ដល់ ថ្ងៃទី១៤ វិច្ឆិកា នោះ ក្រុម NeverCare មកពីខេត្តកំពង់ឆ្នាំង និងក្រុម Will Show U មកពីខេត្តបាត់ដំបង នឹងត្រូវឡើងទៅប្រកួតផ្តាច់ព្រ័ត្រ ដើម្បីស្វែងរកក្រុមម្ចាស់ជើងឯកប្រចាំតំបន់នេះ ដែលនឹងធ្វើនៅបុណ្យសមុទ្រ។
ការមានសិទ្ធទៅវគ្គផ្តាច់ព្រ័ត្រនេះបន្ទាប់ពីក្រុម Never Care បានយកឈ្នះ Naga Five ដោយលទ្ធផល ៥-០ ហើយក្រុម Will Show U បានយកឈ្នះ G-Mission ដោយលទ្ធផល ៥-៣។ ចំណែកក្រុម G-Mission បានយកឈ្នះ Naga Five ដោយលទ្ធផល ៥-២ ដើម្បីទទួលបានចំណាត់ថ្នាក់លេខ៣ នឹងមានសិទ្ធិរួមដំណើរជាមួយ NeverCare និង Will Show U ទៅលេងនៅបុណ្យសមុទ្រ។
ទោះជាយ៉ាងណា មានតែក្រុម Never Care និង Will Show U តែប៉ុណ្ណោះដែលត្រូវប្រកួតគ្នាវគ្គផ្តាច់ព្រ័ត្រនៅបុណ្យសមុទ្រ ដើម្បីស្វែងរកក្រុមលេខ១ ប្រចាំតំបន់ទី៤នេះ ដោយក្រុមលេខ១នឹងទទួលបានប្រាក់រង្វាន់១៥០០ដុល្លារ ខណៈលេខ២ ទទួលបាន ១០០០ដុល្លារ។ ចំណែក G-Mission ជាក្រុមលេខ៣ប្រចាំតំបន់ទី៤ មានសិទ្ធិចូលរួមប្រកួតវគ្គផ្តាច់ព្រ័ត្រជ្រើសរើសជើងឯកថ្នាក់ជាតិ ទូទាំងប្រទេសនៅបុណ្យសមុទ្រ។
ការប្រកួតកីឡាអេឡិចត្រូនិកថ្នាក់ជាតិ ប្រចាំឆ្នាំ២០១៥ បានរកឃើញក្រុមខ្លាំងចំនួន៦ទៀត មកពីតំបន់ទី៣ និងតំបន់ទី៤ ដែលបានបញ្ចប់ កាលពីថ្ងៃសៅរ៍ ហើយលទ្ធផលនេះ ដោយលទ្ធផលសហព័ន្ធ E-Sport ទើបបង្កើតថ្មីមួយនេះ រកបានក្រុមខ្លាំងសរុបចំនួន១០ហើយ សម្រាប់យកទៅប្រកួតផ្តាច់ព្រ័ត្រ ក្នុងពិធីបុណ្យសមុទ្រ ខេត្តកំពត នាខែធ្នូ ឆ្នាំ២០១៥ ខាងមុខនេះ គឺខ្វះតែ៦ក្រុមទៀតប៉ុណ្ណោះ។
ក្រុមទាំង១០ ដែលត្រូវឡើងទៅប្រកួតនៅវគ្គផ្តាច់ព្រ័ត្រ ក្នុងពិធីបុណ្យសមុទ្រ គឺតំបន់ទី១ រកបាន២ក្រុម តំបន់ទី២ រកបាន២ក្រុម តំបន់ទី៣រកបាន៣ក្រុម និងតំបន់ទី៤រកបាន៣ក្រុម ខណៈការប្រកួតស្វែងរកក្រុមចំនួន៦ទៀត នឹងត្រូវធ្វើនៅតំបន់ទី៥ ក្នុងរាជធានីភ្នំពេញ និងតំបន់ទី៦ នៅខេត្តព្រះសីហនុ កំពត កោះកុង កំពង់ស្ពឺ និងតាកែវ។
បន្ទាប់ពីបញ្ចប់ការប្រកួតទាំង៦តំបន់ ក្រុមឈ្នះកៅអីទាំងទាំង១៦ នឹងធ្វើដំណើរទៅប្រកួតវគ្គផ្តាច់ព្រ័ត្រ ក្នុងកម្មវិធីបុណ្យសមុទ្រ នៅខេត្តកំពត ចាប់ពីថ្ងៃទី១១-១២ ខែធ្នូ ដើម្បីឈ្នះជើងឯកជាតិ ដែលលេខ១ទទួលប្រាក់រង្វាន់១៥០០ដុល្លារ លេខ២ទទួលបាន១០០០ដុល្លារ និងលេខ៣ទទួលបាន៥០០ដុល្លារ។ ជាពិសេសក្រុមជើងឯកថ្នាក់ជាតិលេខ១ និងលេខ២ នឹងតំណាងឲ្យកម្ពុជាទៅប្រកួតកីឡាអេឡិចត្រូនិកអន្តរជាតិ MATIC ឆ្នាំ២០១៦នៅប្រទេសឥណ្ឌូណេស៊ី៕
© រក្សាសិទ្ធិដោយ thmeythmey.com