សុខភាព៖ ការមានផ្ទៃពោះ នៅសប្តាហ៍ទី ២ (លម្អិត)

ព័ត៍មានសុខភាព

សុខភាព៖ ការមានផ្ទៃពោះ នៅសប្តាហ៍ទី ២ (លម្អិត)

17, Nov 2015 , 6:59 am

រូបភាព

ដោយ: ថ្មីៗ

ការលូតលាស់ របស់ទារក

មុនពេលកូន ចាប់ផ្តើមលូតលាស់ អ្នកបានបង្កើតដំណាក់កាលជាច្រើន ឲ្យគេរួចទៅហើយ។ នៅសប្តាហ៍ចុងក្រោយ មានការកើនឡើងនៃចំនួនអ័រម៉ូន អឹសស្ត្រូហ្សែន (Estrogen) និងប្រូហ្សេសស្តេរ៉ូន (Progesterone) ចូលទៅក្នុងចរន្តឈាម និងជំរុញឲ្យស្បូន បង្កើតជាលិកា ដែលពោរពេញទៅដោយឈាម សម្រាប់ទ្រទ្រង់ពងកូន ដែលនឹងត្រូវចាប់កំណើត។ ក្នុងពេលចាប់ផ្តើមសប្តាហ៍មួយនេះ (ច្រើនតែនៅជុំវិញថ្ងៃទី ១៤ នៃរដ្តរដូវ ២៨ ថ្ងៃ) អ្នកនឹងមានការផ្ទុះអូវុល (ការបែកចេញនៃមេជីវិតញីមួយ ពីក្នុងក្រពេញអូវ៉ែ ចូលទៅក្នុងបំពង់ដៃស្បូន)។

រយៈពេល ១២ ទៅ ២៤ ម៉ោងក្រោយ មេជីវិតញីនោះ នឹងត្រូវរលាយ ឬបង្កកំណើតជាមួយមេជីវិតឈ្មោល បើសិនជាមេជីវិតឈ្មោលមួយនោះ ស្ថិតក្នុងចំណោមមេជីវិតឈ្មោលចំនួន ២៥០លានក្បាល (ជាមធ្យម) ដែលដៃគូខាងប្រុស បានបាញ់ទឹកកាម ចូលទៅក្នុងទ្វារមាស ឆ្ពោះទៅកាន់មាត់ស្បូនទាំងអស់ ដើម្បីអាចធ្វើដំណើរ ទៅកាន់បំពង់ដៃស្បូន ហើយជួបមេជីវិតញី។

មានតែមេជីវិតឈ្មោលប្រហែល ៤០០ ក្បាលប៉ុណ្ណោះ ដែលនៅមានជីវិត ហើយអាចធ្វើដំណើរលើផ្លូវដ៏លំបាកចំនួន ១០ ម៉ោង ដើម្បីទៅជួបមេជីវិតញីបាន។ ហើយចុងក្រោយ សល់មេជីវិតឈ្មោលតែមួយគត់ ដែលអាចទម្លុះរណាំងការពារ ភ្នាសខាងក្រៅរបស់មេជីវិតញី ដើម្បីបង្កកំណើត (ដំណើរការណ៍មួយនេះ ប្រហែលជាចំណាយពេលប្រហែល ២០ នាទី)។

នៅរយៈពេល ១០ ទៅ ៣០ ម៉ោងក្រោយ ណៃយ៉ូរបស់មេជីវិតឈ្មោល នឹងរលាយជាមួយណៃយ៉ូរបស់មេជីវិតញី ដើម្បីច្របល់ចូលគ្នា នៃរូមមន្តហ្សែន ឬដំណរពូជរបស់ពួកគេ។ បើសិនជាមេជីវិតឈ្មោល ផ្ទុកក្រូម៉ូសូម អ៊ីក្រិច (Y) អ្នកនឹងបានកូនប្រុស តែបើវាផ្ទុកក្រូម៉ូសូមអ៊ិច (X) នោះអ្នកនឹងបានកូនស្រី។

ក្នុងរយៈពេលធ្វើដំណើរ បីទៅបួនថ្ងៃ ក្នុងបំពង់ដៃស្បូន ឆ្ពោះទៅកាន់ស្បូន ពងកូន ឬស៊ីហ្គូត (Zygote) នឹងបំបែកខ្លួនទៅជា ១៦ កោសិកា។ នៅពេលវាចូលដល់ស្បូនហើយ ឈ្មោះស៊ីហ្គូតនេះត្រូវប្តូរមកជា ម៉ូរ៉ូឡា (Morula) វិញ។ រយៈពេលពីរ ឬបីថ្ងៃក្រោយទៀត វានឹងចាប់ផ្តើមកាច់សំបុក នៅក្នុងជាលិកាដ៏ត្រឈឹងត្រឈៃ ដែលត្រូវបានរៀបចំរួចជាស្រេច នៅភ្នាសខាងក្នុងរបស់ស្បូន ដើម្បីធ្វើការលូតលាស់ និងផ្លាស់ប្តូររូបរាងកាយ ដ៏អស្ចារ្យបន្តទៀត។

នៅពេលនេះ ការលូតលាស់របស់កូន មានលក្ខណៈដូចកូនបាល់កោសិកាដ៏តូច ដែលអ្នកវិទ្យាសាស្ត្រឲ្យឈ្មោះវាថា ប្លាសស្តូសាយ (Blastocyst) មានន័យថា វាមានដុំកោសិកាខាងក្នុងមួយ ដែលនឹងក្លាយទៅជាអំប្រ៊ីយ៉ុងដោយខ្លួនឯង ប្រហោងទឹកពេញ សម្រាប់ក្លាយទៅជាទឹកភ្លោះ និងដុំកោសិកាខាងក្រៅ សម្រាប់ក្លាយទៅជាសុក ដែលមានតួនាទី ដឹកជញ្ជូនអុកស៊ីសែន និងសារធាតុចិញ្ចឹមទៅឲ្យកូន រួចបញ្ចូនកាកសំណល់ចេញមកវិញ។

ការផ្លាស់ប្តូរ ជីវិតរបស់អ្នក

រដូវចុងក្រោយរបស់អ្នក បានចាប់ផ្តើមបាត់ រយៈពេល ១២ ទៅ ១៦ ថ្ងៃរួចទៅហើយ ដូច្នេះ ឥឡូវនេះ អ្នកប្រហែលជាកំពុងតែផ្ទុះអូវុល ឬជិតផ្ទុះផងមើលទៅ។ អ្វីដែលចម្លែកនោះ ប្រហែលជាកើតមានត្រង់ថា គ្រូពេទ្យនឹងគុណគូរ ទៅលើអាយុគភ៌របស់អ្នក ដោយគិតចាប់ពីថ្ងៃទីមួយ នៃការបាត់រដូវចុងក្រោយ។

ដូច្នេះ ការមានផ្ទៃពោះនេះ ប្រហែលជាមានអាយុ ៣៨ អាទិត្យ ដោយគិតចាប់ពីពេលរលាយចូលគ្នា នៃមេជីវិតញី និងឈ្មោលមក ប៉ុន្តែ ដោយសារតែវាច្រើនតែពិបាក ក្នុងការចង្អុលបង្ហាញ នូវពេលវេលាជាក់លាក់ ទើបគ្រូពេទ្យ និងឆ្មប រាប់ចំនួនអាយុគភ៌ជា ៤០ អាទិត្យតែម្តងទៅ ដោយគិតចាប់ពីថ្ងៃចាប់ផ្តើមបាត់រដូវចុងក្រោយ។ នេះគឺជាមូលហេតុ ដែលគេគិតថា អ្នកមានផ្ទៃពោះ ២ សប្តាហ៍រួចទៅហើយ៕

ត្រួតពិនិត្យដោយ www.health.com.kh