ជាតិ
សង្គមជាតិ
ប្រញាប់ចុះឈ្មោះ ដើម្បីជួបជុំជាមួយបញ្ញវន្តខ្មែរពីបរទស
× បញ្ញវន្តខ្មែរដែលបញ្ចប់ការសិក្សាពីកម្ពុជា និងជាពិសេសពីបរទេស ហើយដែលពួកគេកំពុងបំពេញការងារនៅក្នុងរដ្ឋាភិបាល និងក្នុងវិស័យឯកជន នឹងជួបមកជួបជុំគ្នានៅថ្ងៃទី២៩ និង៣០ខែមករាឆ្នាំ២០១៦ នៅសណ្ឋាគារ Intercontinental ក្នុងរាជធានីភ្នំពេញ។ វាគឺជាការជួបជុំទ្រង់ទ្រាយធំលើកទី២ នៅក្នុងព្រឹត្តិការណ៍ សន្និបាតបញ្ញវន្តពិភពលោក (Global Alumni Convention) ដែលនឹងត្រូវរៀបចំដោយ idp Education។ នេះគឺជាវេទិកានៃការកសាងទំនាក់ទំនង និងការចែករំលែកពិសោធន៍ ចំណេះដឹងនានាដែលទាក់ទងទៅនឹងការធ្វើអាជីវកម្ម និងទស្សនវិស័យនៃការអភិវឌ្ឍរបស់កម្ពុជានៅពេលអនាគត។
សន្និបាតបញ្ញវន្តពិភពលោកនេះ នឹងត្រូវចូលរួមដោយនិស្សិតដែលបញ្ចប់ការសិក្សានៅក្នុងប្រទេសកម្ពុជា អូស្ត្រាលី សហរដ្ឋអាមេរិក កាណាដា ចក្រភពអង់គ្លេស ណូវែលហ្សេឡង់ បារាំង រុស្ស៊ី កូរ៉េ ជប៉ុន ចិន ម៉ាឡេស៊ី សិង្ហបុរី។ លើសពីនេះ សន្និបាតនេះក៏នឹងត្រូវចូលរួមពីសំណាក់ឥស្សរជននៅក្នុងរដ្ឋាភិបាល តំណាងស្ថានទូតបរទេសនៅកម្ពុជា និងប្រធានក្រុមហ៊ុននៅក្នុងវិស័យឯកជនសំខាន់ៗផងដែរ។
ការចូលរួមត្រូវបង់ថ្លៃ។ គេត្រូវចុះឈ្មោះឲ្យបានមុនថ្ងៃ៣០ខែវិច្ឆិកានេះ ដែលតម្លៃនៃការចុះឈ្មោះមានតម្លៃទាបជាងគេ។
ការចុះឈ្មោះពីថ្ងៃទី១តុលាដល់ថ្ងៃទី៣០វិច្ឆិកា មានតម្លៃ ៧០ដុល្លារ
ការចុះឈ្មោះពីថ្ងៃទី ១ខែធ្នូ ដល់ថ្ងៃទី៣០ខែធ្នូ មានតម្លៃ ៨០ដុល្លារ
ការចុះឈ្មោះពីថ្ងៃទី ១ខែមករាដល់ថ្ងៃទី ២៨ខែមករា មានតម្លៃ ៩០ ដុល្លារ
និងការចុះឈ្មោះថ្ងៃប្រារព្ធកម្មវិធីនៅថ្ងៃទី២៩ និង៣០ ខែមករា មានតម្លៃ ១០០ ដុល្លារ
អ្នកចាប់អារម្មណ៍ចូលរួមក្នុងវេទិកាប្រជុំបញ្ញវន្តដ៏ធំនេះ អាចចុះឈ្មោះអនឡាញតាមរយៈគេហទំព័រ
www.cambodiaga.org ។
រដ្ឋមន្ត្រីក្រសួងអប់រំ លោក ហង់ ជួនណារ៉ុន គឺជាអធិបតីក្នុងពិធីបើកសន្និបាតបញ្ញវន្តពិភពលោកឆ្នាំ២០១៦នេះ។ តាមរយៈសេចក្តីជូនដំណឹងមួយស្តីពីការរៀបចំសន្និបាតបញ្ញវន្តពិភពលោក លោករដ្ឋមន្ត្រីក្រសួងអប់រំបានថ្លែងយ៉ាងដូច្នេះថា៖«សន្និបាតបញ្ញវន្តពិភពលោក គឺជាព្រឹត្តិការណ៍តែមួយដែលប្រមូលផ្តុំអតីតនិស្សិត មន្ត្រីរដ្ឋាភិបាល និងវិស័យឯកជន ដើម្បីពួកគេអាចជជែកអំពីប្រធានបទសំខាន់ៗ ផ្លាស់ប្តូរពិសោធន៍ និងបង្កើតទំនាក់ទំនងគ្នា។ ព្រឹត្តិការណ៍នេះ និមិត្តរូបដ៏សំខាន់នៃការរីកចម្រើននៃធនធានមនុស្សរបស់កម្ពុជា ហើយខ្ញុំសូមលើកទឹកចិត្តអតីតនិស្សិតទាំងអស់ និងថ្នាក់ដឹកនាំក្នុងវិស័យឯកជនទទួលបានប្រយោជន៍ពីឱកាសនេះ»។
សន្និបាតបញ្ញវន្តពិភពលោក (GAC) ឆ្នាំ២០១៦ គឺជាវេទិកាលើកទី២ហើយដែលត្រូវបានរៀបចំដោយ idp Education។ កាលពីឆ្នាំកន្លងទៅ សន្និបាតបញ្ញវន្តពិភពលោកត្រូវបានរៀបចំឡើងដោយមានការចូលរួមលោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រី ក្រសួងពាណិជ្ជកម្ម តំណាងស្ថានទូត អ្នកជំនាញ និងអតីតនិស្សិតមកពីប្រទេសជឿនលឿនទាំង៥ ដូចជា អូស្ត្រាលី ណូវែលហ្សេឡង់ ចក្រភពអង់គ្លេស សហរដ្ឋអាមេរិក និងកាណាដា។៕
© រក្សាសិទ្ធិដោយ thmeythmey.com