កីឡាជាតិ
ជាតិ
កីឡាករ កែវ រំចង់ ប៉ះជាមួយកីឡាករ មីយ៉ាន់ម៉ា នៅ THAI FIGHT ប្រទេសថៃ
×
អ្នកប្រដាល់ជើងខ្លាំងចិត្តសឿងរបស់កម្ពុជា កែវ រំចង់ មកពីក្លិបដំបងក្រញូងកីឡាខេត្តបាត់ដំបង នឹងធ្វើដំណើរឆ្លងប្រទេស ដើម្បីទៅចួលរួមប្រកួតក្នុងកម្មវិធី THAI FIGHT នៅប្រទេសថៃ ថ្ងៃទី២១ ខែវិច្ឆិកា ខាងមុខនេះ។
នៅក្នុងដំណើរឆ្លងដែននេះកីឡាករ កែវ រំចង់ នឹងត្រូវជួបប្រកួតជាមួយកីឡាករដែលខ្លួនមិនធ្លាប់ជួប មិនធ្លាប់ស្គាល់ប្រវត្តិប្រកួតច្បស់លាស់ MAUNG JOR ជនជាតិ មីយ៉ាន់ម៉ា ក្នុងប្រភេទទម្ងន់៦៩គីឡូក្រាម។ នេះបើតាមការឱ្យដឹងរបស់ លោក កែវ សំអាង ដែលជាគ្រូបង្វឹក និងជាឪពុករបស់កីឡាករ កែវ រំចង់។
លោក កែវ សំអាង បានឱ្យដឹងទៀតថា នៅក្នុងជំនួបជាមួយកីឡាករ មីយ៉ាន់ម៉ា គ្រាន់តែជាការប្រកួតលក្ខណៈមិត្តភាពអន្តរជាតិកំដៅសាច់ដុំតែប៉ុណ្ណោះ ហើយជាការប្រកួតមួយដើម្បីពង្រឹងសមត្ថភាពត្រៀមប្រកួតសងសឹកជាមួយកីឡាករថៃ IQUEZANG KOR RUNGTHANAKEAT នៅថ្ងៃទី៣១ ខែធ្នូ ចុងឆ្នាំនេះ បន្ទាប់ពីចាញ់ដោយមិនអស់ចិត្តនៅក្នុងការប្រកួត THAI FIGHT ប្រទេសវៀតណាម កាលពីពេលថ្មីៗកន្លងទៅនេះ។
គួរបញ្ជាក់ផងដែរថា កីឡាករ កែវ រំចង់ ធ្លាប់ឡើងសង្វៀន THAI FIGHT ២ដងរួចមកហើយ ប៉ុន្តែមិនធ្លាប់ស្គាល់ជ័យជម្នះឡើយ ដោយលើកទី១ កាលដើមឆ្នាំ២០១៤ កែវ រំចង់ បានសន្លប់ក្រោមដៃ YUDSANKLAI ក្នុងទឹកទី២។ ចំណែកលើកទី២ ការប្រកួតនៅប្រទេសវៀតណាម ជាមួយកីឡាករ IQUEZANG KOR RUNGTHANAKEAT ចាញ់ដោយពិន្ទុកាលពីថ្ងៃ២៤ ខែតុលាកន្លងទៅ៕
© រក្សាសិទ្ធិដោយ thmeythmey.com