កីឡាជាតិ
ជាតិ
ចិន៖ ជម្រើសជាតិកម្ពុជាចាញ់ក្លិបវៀតណាម Hanoi T&T ៣-១
× ក្រុមកីឡាបាល់ទាត់ជម្រើសជាតិកម្ពុជា បានប្រកួតចាញ់ក្លិប Hanoi T&T របស់វៀតណាមក្នុងលទ្ធផល ៣-១ នាជំនួបក្នុងពូល A នៃព្រឹត្តិការណ៍ 2015 Yunnan-ASEAN International Football Open Tournament លើទីលានកីឡដ្ឋាន Mangshi Stadium ក្រុង Mangshi ខេត្តយូណាន ប្រទេសចិន នារសៀលថ្ងៃចន្ទទី ២៣ ខែ វិច្ឆិកា ឆ្នាំ ២០១៥ នេះ។
នេះជាបរាជ័យក្នុងពូលលើកដំបូងរបស់កម្ពុជា បន្ទាប់ពីបានយកឈ្នះក្រុម Baotau Nanjiao របស់ចិន ៣-១ និងបំបាក់ក្រុមឡាវ Lao Champa រហូតដល់ទៅ ២១-០ ។ ប្រាក់ មុន្នីឧត្តម ដែលរកបាន៣គ្រាប់នាជំនួបជាមួយ Baotau Nanjiao និង៨គ្រាប់នាជំនួបជាមួយ Lao Champa រកបានបន្ថែម១គ្រាប់ទៀតក្នុងការប្រកួតជាមួយ Hanoi T&T ថ្ងៃនេះ។
ក្រុមជម្រើសជាតិកម្ពុជាស្ថិតក្នុងចំណោមក្រុមជម្រើស និងក្លិបចំនួន៩ ដែលត្រូវបានអញ្ជើញឲ្យចូលរួមក្នុងការប្រកួតដណ្តើមពានរង្វាន់ មិត្តភាព 2015 Yunnan, Asean International Football Open Tournament នៅក្នុងយូណាន ប្រទេសចិន។ កម្ពុជា បង់ក្លាដែស និងមីយ៉ាន់ម៉ា តំណាងដោយក្រុមជម្រើសជាតិ ខណៈឡាវ វៀតណាម និងម្ចាស់ផ្ទះ តំណាងដោយក្លិប។
កម្ពុជានៅសល់ការប្រកួតមួយទៀតជាមួយក្លិប Yunnan របស់ម្ចាស់ផ្ទះចិន៕
Tag:
បាល់ទាត់
ជម្រើសជាតិកម្ពុជា
© រក្សាសិទ្ធិដោយ thmeythmey.com