ជាតិ
តើទំព័រហ្វេសប៊ុក អ្នកនយោបាយកម្ពុជារូបណា ដែលមានប្រជាប្រិយភាពជាងគេ?
× ភ្នំពេញ៖ ក្នុងមួយរយៈពេលចុងក្រោយនេះ អ្នកនយោបាយបានបង្កើតទំព័រហ្វេសប៊ុកជាបន្តបន្ទាប់។ ការប្រើប្រាស់ហ្វេសប៊ុក សម្រាប់ទាក់ទាញប្រជាប្រិយភាពរបស់អ្នកនយោបាយកម្ពុជា គឺជារឿងពេញនិយមខ្លាំងណាស់ នៅក្នុងដំណាក់កាលនៃសម័យរីកចម្រើនផ្នែកបច្ចេកវិទ្យានេះ។ ទំព័រហ្វេសប៊ុក បានក្លាយជាទីលាននយោបាយ ដ៏មានសារៈសំខាន់ ដើម្បីស្វែងរកការគាំទ្រពីម្ចាស់ឆ្នោត។ តើទំព័រហ្វេសប៊ុកអ្នកនយោបាយខ្មែរល្បីៗរូបណា មានអ្នកចូលចិត្តច្រើនជាងគេ?
នៅក្នុងចំណោម ទំព័រហ្វេសប៊ុក អ្នកនយោបាយកម្ពុជាទាំងអស់ ទំព័រហ្វេសប៊ុក ដែលមានចំនួនអ្នកចូលចិត្ត(Like)ច្រើនជាងគេនៅថ្ងៃនេះ។ គិតមកត្រឹមម៉ោង ៩ និង០៥នាទី ថ្ងៃទី២៦វិច្ឆិកា ឆ្នាំ២០១៥នេះ ទំព័រហ្វេសប៊ុក របស់លោក សម រង្ស៊ី ប្រធានគណបក្សសង្គ្រោះជាតិ ដែលមានឈ្មោះថា «Sam Rainsy» គឺមានចំនួន ១,៨៦៣,៦០៧នាក់។
បើប្រៀបធៀបនឹងទំព័រហ្វេសប៊ុករបស់ លោកនាយករដ្ឋមន្ត្រី ហ៊ុន សែន ដែលមាន ឈ្មោះថា «Samdech Hun Sen, Cambodian Prime Minister» ដែលមានអ្នកចូលចិត្តចំនួន ១,៣៦៧,៨៩០ នាក់ គឺទំព័រហ្វេសប៊ុក លោក សម រង្ស៊ី មានអ្នកចូលចិត្ត ច្រើនជាង ទំព័រហ្វេសប៊ុក លោក ហ៊ុន សែន ជិតកន្លះលាននាក់។
ដោយឡែកទំព័រហ្វេសប៊ុកអ្នកនយោបាយកម្ពុជាល្បីៗដទៃទៀត ដូចជា ទំព័រហ្វេសប៊ុកលោក កឹម សុខា អនុប្រធានគណបក្សសង្គ្រោះជាតិ ដែលមានឈ្មោះថា «Kem Sokha» មានអ្នកចូលចិត្ត ៥៣០,០៧២ នាក់។ ចំណែកឯទំព័រហ្វេសប៊ុក លោក យ៉ែម បុញ្ញឬទ្ធិ តំណាងរាស្ត្រមកពីគណបក្សសង្គ្រោះជាតិដែលមានឈ្មោះថា «Yem Ponhearith»មានអ្នកចូលចិត្តចំនួន ២២៣,៩៩៩នាក់។ ចំណែកទំព័រហ្វេសប៊ុក លោក អេង ឆៃអ៊ាង តំណាងរាស្ត្រមកពីគណបក្សសង្គ្រោះជាតិ ដែលមានឈ្មោះថា «Eang Chhai Eang» មាន Follower ចំនួន១៩,៧១៥ នាក់។ រីឯទំព័រហ្វេសប៊ុក លោក អ៊ូ ច័ន្ទឬទ្ធិ តំណាងរាស្ត្រគណបក្សសង្គ្រោះជាតិ ដែលមានថា «Ou Chanrith page» មានអ្នកចូលចិត្តចំនួន ២១,៧៧០នាក់។ រីឯគណនីហ្វេសប៊ុកកូនស្រី លោក កឹម សុខា គឺកញ្ញា កឹម មនោវិទ្យា ដែលមានឈ្មោះថា «Monovithya Kem» មានFollower ចំនួន១២,២៨៨នាក់។
រីឯគណនីហ្វេសប៊ុក លោកបណ្ឌិត ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា ដែលមានឈ្មោះថា «Hang Chuon Naron» មាន Follower ចំនួន២៨,៦០៦ នាក់។ ឯទំព័រហ្វេសប៊ុក លោក ហ៊ុន ម៉ានី ជាតំណាងរាស្ត្រ មកពីគណបក្សប្រជាជនកម្ពុជា និងជាកូនប្រុសរបស់ លោក ហ៊ុន សែន ដែលមានឈ្មោះថា «Hun Many» មានអ្នកចូលចិត្តចំនួន ៨៦,៤៣២នាក់។ រីឯ លោក ជា ចំរើន ដែលគ្រោងបង្កើតគណបក្សថ្មី មានឈ្មោះថា គណបក្សកម្ពុជាសេរីភាព ទំព័រហ្វេសប៊ុករបស់លោកមានឈ្មោះថា«Chea Chamroeun» មានអ្នកចូលចិត្តចំនួន៤៥៩,៥៥១នាក់។
គួរបញ្ជាក់ថា មកដល់ពេលបច្ចុប្បន្ននេះ ទំព័រហ្វេសប៊ុកអ្នកនយោបាយកម្ពុជា បានដើរតួនាទីសំខាន់ ក្នុងការផ្តល់ព័ត៌មាន ដល់អ្នកសារព័ត៌មាន ផ្សព្វផ្សាយពីសកម្មភាពនយោបាយរបស់ខ្លួនដល់ប្រជាពលរដ្ឋទូទៅ ព្រមទាំងជាសារឆ្លើយឆ្លងគ្នា យ៉ាងមានប្រសិទ្ធភាព៕
© រក្សាសិទ្ធិដោយ thmeythmey.com