អន្តរជាតិ
នយោបាយអន្តរជាតិ
អឺរ៉ុបផ្ដល់ប្រាក់៣ពាន់លានអឺរ៉ូដល់តួកគីជាថ្នូរការទប់លំហូរជនភៀសខ្លួនស៊ីរី
×![]()
ដោយ: តន ចាន់រិទ្ធារ៉ា
អឺរ៉ុបនឹងផ្ដល់កញ្ចប់លុយ ៣ពាន់លានអឺរ៉ូដល់តួកគីសម្រាប់ការដោះស្រាយវិបត្តិជនភៀសខ្លួនស៊ីរីក្នុងប្រទេសតួកគី។ នេះបើយោងតាមការបញ្ជាក់របស់អធិការបតីអាល្លឺម៉ង់លោកស្រីអែនជែលឡា មឺហ្កែល (Angela Merkel) ក្រោយពីបញ្ចប់ជំនួបកំពូលអឺរ៉ុប-តួកគី ដែលបានធ្វើឡើងនៅទីក្រុងព្រុចសែលកាលពីថ្ងៃអាទិត្យម្សិលមិញ។ 
ក្រុមមេដឹកនាំប្រទេសអឺរ៉ុបបានជួបជាមួយនាយករដ្ឋមន្ត្រីតួកគីលោក អាមេដ ដាវូទូគ្លូ (Ahmed Davutoglu) នៅទីក្រុងព្រុចសែល ដើម្បីពិភាក្សាបញ្ចប់កិច្ចព្រមព្រៀងមួយស្ដីបញ្ហាជនភៀសខ្លួនស៊ីរីដែលកំពុងតែស្ថិតនៅក្នុងប្រទេសតួកគី។ តាមរយៈកិច្ចព្រមព្រៀងនេះ អឺរ៉ុបនឹងផ្ដល់ប្រាក់៣ពាន់លានអឺរ៉ូដល់តួកគីសម្រាប់ការទប់ស្កាត់លំហូរជនភៀសខ្លួនពីតួកគីទៅកាន់អឺរ៉ុបក៏ដូចជាការលើកកម្ពស់ស្ថានភាពរស់នៅរបស់ជនភៀសខ្លួនស៊ីរី។
ជាមួយគ្នានេះដែរ ក្រៅពីការទទួលលុយ ៣ពាន់លានអឺរ៉ូ តួកគីក៏នឹងទទួលបានផលប្រយោជន៏ផ្សេងទៀតជាពិសេសបញ្ហាស្ដីទិដ្ឋាការរវាងអឺរ៉ុបនិងតួកគីដែលបានជាប់គាំងកន្លងមក។ ការចរចាពីកិច្ចព្រមព្រៀងទិដ្ឋាការដែលនឹងអនុញ្ញាតឲ្យមានការធ្វើដំណើរដោយសេរីរវាងតួកគីនិងបណ្ដាប្រទេសអឺរ៉ុប នឹងត្រូវបានពន្លឿនប្រសិនបើកិច្ចព្រមព្រៀងជនភៀសខ្លួនបានជោគជ័យ។ នេះបើយោងតាមការប្រាប់របស់លោកស្រី មឺហ្កែល ។
ថ្លែងទៅកាន់អ្នកយកព័ត៌មានបន្ទាប់ពីកិច្ចប្រជុំ នាយករដ្ឋមន្ត្រីតួកគីលោក អាមេដ ដាវូទូគ្លូ បានអរគុណមេដឹកនាំអឺរ៉ុបចំពោះកិច្ចព្រមព្រៀងនេះ ដោយបានលើកឡើងថា វាគឺជាថ្ងៃប្រវត្តិសាស្ត្រមួយ។ លោក ដាវូទូគ្លូ បន្តទៀតថា លុយចំនួន៣ពាន់លានដុល្លារនេះ គឺមិនមែនសម្រាប់តួកគីនោះទេ តែសម្រាប់ជនភៀសខ្លួនស៊ីរីទៅវិញ។
ចំណែកឯអធិការបតីអាល្លឺម៉ង់លោកស្រី អង់ហ្គែឡា មើគែល ក៏បានបញ្ជាក់ដែរថា តួកគីបានទទួលជំនួយតិចតួចពីសហគមន៍អន្តរជាតិ ហើយអឺរ៉ុបគួរតែជួយសម្រាលបន្ទុកនេះ។ ហើយនៅមុនកិច្ចប្រជុំបន្តិច លោកស្រី មឺហ្កែល បានលើកឡើងដែរថា កិច្ចព្រមព្រៀងរវាងអឺរ៉ុបនិងតួកគីក្លាយជាក្របខណ្ឌគតិយុត្តិសម្រាប់លំហូរជនភៀសខ្លួន។
គួររម្លឹកផងដែរថា ជនភៀសខ្លួនរាប់លាននាក់បានឆ្លងកាត់ទៅកាន់តំបន់អឺរ៉ុបតាមរយៈប្រទេសតួកគីដែលបានក្លាយជាចំណុចឆ្លងកាត់ដ៏សំខាន់របស់ជនភៀសខ្លួនមកពីមជ្ឈិមបូព៌ាដែលកំពុងតែហែកហួរដោយភ្លើងសង្គ្រាម។ ឯតួកគីខ្លួនឯងក៏បានក្លាយជាជុំរំជនភៀសខ្លួនប្រហែលពីរលាននាក់ផងដែរ៕
Tag:
ជនភៀសខ្លួន
© រក្សាសិទ្ធិដោយ thmeythmey.com
