អន្តរជាតិ
នយោបាយអន្តរជាតិ
×![]()
ដោយ: តន ចាន់រិទ្ធារ៉ា
សម្ព័ន្ធយោធាណាតូបានយល់ព្រមទទួលប្រទេសម៉ុងតេណេក្រូជាសមាជិកថ្មីរបស់ខ្លួនហើយ ។ ការយល់ព្រមនេះបានធ្វើឡើងក្នុងកិច្ចប្រជុំរបស់ណាតូនៅទីស្នាក់ការរបស់ខ្លួនក្នុងទីក្រុងព្រុចសែលនៅថ្ងៃពុធនេះ។ 
បក្សសម្ព័ន្ធយោធាណាតូដែលមានអាមេរិកនៅពីក្រោយបានព្រមស្នើឲ្យម៉ុងតេណេក្រូចូលជាសមាជិកថ្មីរបស់ខ្លួន។ ម៉ុងតេណេក្រូដែលធ្លាប់ជាផ្នែកមួយរបស់អតីតយូហ្គោស្លាវី បានព្យាយាមចូលជាសមាជិកអង្គការណាតូតាំងពីឆ្នាំ២០០៩មកម្ល៉េះ។ ហើយកាលពីខែកញ្ញានេះ សភាម៉ុងតេណេក្រូបានអនុម័តយល់ព្រមឲ្យចូលរួមក្នុងអង្គការណាតូផងដែរ បើទោះជាមានការមិនយល់ព្រមពីក្រុមប្រឆាំងដែលទាមទារឲ្យមានប្រជាមតិជាមុនសិនក៏ដោយ។
ថ្លែងទៅកាន់កិច្ចប្រជុំនៅទីស្នាក់ការក្នុងទីក្រុងព្រុចសែល អគ្គលេខាធិការណាតូលោក Jens Stoltenberg បាននិយាយថា៖ «យើងសូមអបអរប្រទេសម៉ុងតេណេក្រូ។ នេះគឺជាការចាប់ផ្ដើមនូវសម្ព័ន្ធភាពដ៏ល្អមួយ»។ ការចូលជាសមាជិកណាតូរបស់ម៉ុងតេណេក្រូក៏ត្រូវបានទទួលការគាំទ្រអាមេរិកដែលជាបងធំរបស់ណាតូដែរ។
យ៉ាងណាមិញ បំណងចូលជាសមាជិកបក្សសម្ព័ន្ធណាតូរបស់លោកនាយករដ្ឋមន្ត្រី Milo Djukanovic បានបង្កឲ្យមានការតវ៉ាយ៉ាងខ្លាំងក្នុងប្រទេសកាលពីខែតុលាកន្លងមក។ ក្រុមបាតុករបានទាមទារឲ្យលោក Djukanovic ចុះចេញពីតំណែង ខណៈលោកបានកាន់តំណែងនេះអស់រយៈពេលពីរទសវត្សរ៍មកហើយ ពោលគឺទាំងមុននិងក្រោយពេលដែលម៉ុងតេណេក្រូបានឯករាជ្យពីស៊ែប៊ីទៅទៀត៕
Tag:
ណាតូ
© រក្សាសិទ្ធិដោយ thmeythmey.com
