អន្តរជាតិ
នយោបាយអន្តរជាតិ
លោកអូបាម៉ានឹងវេតូការសម្រេចរបស់សភាអាមេរិកលើករណីច្បាប់កាត់បន្ថយឧស្ម័នផ្ទាំងកញ្ចក់
×![]()
ដោយ: តន ចាន់រិទ្ធារ៉ា
រដ្ឋសភារបស់អាមេរិកបានបោះឆ្នោតបដិសេធច្បាប់មួយរបស់រដ្ឋបាលអូបាម៉ាដែលសំដៅដល់ការកាត់បន្ថយការបញ្ចេញឧស្ម័នផ្ទាំងកញ្ចក់។ តែលោក អូបាម៉ា នឹងប្រើសិទ្ធិវេតូជំទាស់ការសម្រេចចិត្តនេះ។ 
រដ្ឋសភាអាមេរិកដែលគ្របដណ្ដប់ដោយក្រុមសាធារណរដ្ឋបានបោះឆ្នោតទាត់ចោលច្បាប់ស្ដីពីការកាត់បន្ថយការបញ្ចេញឧស្ម័នផ្ទាំងកញ្ចក់ដែលតាក់តែងដោយរដ្ឋាភិបាលលោកប្រធានាធិបតី បារ៉ាក់ អូបាម៉ា។ ការសម្រេចចិត្តនេះគឺចំពេលដែលមេដឹកនាំពិភពលោកកំពុងស្ថិតនៅទីក្រុងប៉ារីសដើម្បីចរចារកដំណោះស្រាយចំពោះបម្រែបម្រួលអាកាសធាតុពិភពលោក។
ការទាត់ចោលច្បាប់នេះប្រៀបដូចជាការវាយសំពងទៅលើលោក អូបាម៉ា ដែលទើបតែត្រលប់មកពីចូលរួមបើកការប្រជុំកំពូលស្ដីពីបម្រែបម្រួលអាកាសធាតុនៅបារាំង។ តាមពិតទៅច្បាប់ដដែលនេះត្រូវបានអនុម័តដោយព្រឹទ្ធសភាអាមេរិករួចទៅហើយ តែបែរជាជាប់គាំងត្រឹមរដ្ឋសភាទៅវិញ។
យ៉ាងណាមិញ បើយោងតាមសេតវិមានបានបញ្ជាក់ថា ប្រធានាធិបតី អូបាម៉ា នឹងប្រើសិទ្ធិវេតូដើម្បីជំទាស់ការសម្រេចចិត្តនេះ។ ហើយសមាជិកគណបក្សសាធារណរដ្ឋក្នុងរដ្ឋសភាអាមេរិកមិនមានសំឡេងគ្រប់គ្រាន់ដើម្បីបដិសេធអំណាចវេតូនោះទេ។
ជុំវិញការទាត់ចោលនេះ សមាជិកសភាជាច្រើនបានអះអាងថា បម្រែបម្រួលអាកាសធាតុគឺមិនមែនជាស្នាដៃមនុស្សឬក៏បណ្ដាលមកពីការរីកចម្រើនខាងឧស្សាហកម្មនិងកសិកម្មនោះទេ។ ហើយពួកគេតែងប្រឆាំងរាល់ការត្រួតពិនិត្យការបញ្ចេញឧស្ម័នផ្ទាំងកញ្ចក់ដែលសំដៅកាត់បន្ថយកម្ដៅពិភពលោក។
យ៉ាងណាក៏ដោយ មិនមែនក្រុមសមាជិកសភាគណបក្សសាធារណរដ្ឋបានសុទ្ធតែបដិសេធច្បាប់នេះទេ។ សមាជិកម្នាក់របស់បក្សសាធារណរដ្ឋ លោក Ed Whitfield និយាយនៅមុនពេលបោះឆ្នោតថា យើងចង់ឲ្យសភាអនុម័តច្បាប់នេះដើម្បីបង្ហាញពិភពលោកថា នៅអាមេរិកក៏មានការមិនយល់ស្របលើការទាញយកថាមពលដោយជ្រុលហួសដែរ៕
© រក្សាសិទ្ធិដោយ thmeythmey.com
