វិធានការក្តៅប្រឆាំងអ្នកល្មើសចរាចរណ៍ចាប់ផ្តើមនៅដើមឆ្នាំ២០១៦

ជាតិ

សុវត្តិភាព ចរាចរណ៍

វិធានការក្តៅប្រឆាំងអ្នកល្មើសចរាចរណ៍ចាប់ផ្តើមនៅដើមឆ្នាំ២០១៦

29, Dec 2015 , 11:19 am

រូបភាព

លោក នេត សាវឿន អគ្គស្នងការនគរបាលជាតិនៃក្រសួងមហាផ្ទៃ

ដោយ: រួបរួម

តាមរយៈសេចក្តីជូនដំណឹងរបស់ខ្លួនចុះថ្ងៃទី៧ ខែធ្នូ លោក នេត សាវឿន អគ្គស្នងការនគរបាលជាតិ បានប្រកាសថា ចាប់ពីថ្ងៃទី១ ខែមករា ឆ្នាំ២០១៦ កម្លាំងសមត្ថកិច្ចនគរបាលចរាចរណ៍ផ្លូវគោកនឹងបើកយុទ្ធនាការត្រួតពិនិត្យព្រមៗគ្នានៅគ្រប់ទីកន្លែងទូទាំងប្រទេសដើម្បីធ្វើការផាកពិន័យយ៉ាងម៉ឺងម៉ាត់ចំពោះករណីបើកបរដោយគ្មានប័ណ្ណបើកបរ បើកបរលើសល្បឿនកំណត់ មិនគោរពផ្លាកសញ្ញាចរាចរណ៍ បើកបរក្រោមឥទ្ធិពលជាតិស្រវឹង មិនពាក់មួក ខ្សែក្រវាត់ ការផ្ទុកទំនិញសំពីងសំពោង យានយន្តមិនគ្រប់លក្ខណៈបច្ចេកទេសជាដើម។

ទីតាំងដែលធ្វើយុទ្ធនាការរួមមាន តាមគោលដៅដើមទី ចំណតយានយន្ត កំពង់ផែ ផែស្ងួត កំពង់ចម្លង ស្ថានីយ៍ជញ្ជីង សាលាបង្រៀនបើកបរ យានដ្ឋាន ជួសជុលកែច្នែ និងតាមដងផ្លូវនានា។ លោក នេត សាវឿន មើលឃើញពីភាពល្អប្រសើរជាបន្តបន្ទាប់ស្តីពីស្ថានភាពចរាចរណ៍ ដោយមានការចូលរួមគាំទ្រពីបណ្តាស្ថាប័ន អាជ្ញាធរមូលដ្ឋាន អង្គការសង្គមស៊ីវិលនានា តាមរយៈការជំរុញការឃោសនាអប់រំប្រជាជន មហាជនឲ្យយល់ដឹង និងចូលរួមគោរពច្បាប់។

អគ្គស្នងការនគរបាលជាតិ បានលើកឡើងថា៖ «រយៈពេលនៃការផ្សព្វផ្សាយអប់រំ លើកកំពស់ការយល់ដឹងខ្លឹមសារច្បាប់ និងបទដ្ឋានគតិយុត្តិនានាដែលពាក់ព័ន្ធការធ្វើចរាចរណ៍ផ្លូវគោក សមល្មមឈានដល់ពេលវេលាមួយតម្រូវឲ្យអនុវត្តច្បាប់ សំដៅធ្វើឲ្យសភាពការណ៍សណ្តាប់ធ្នាប់ចរាចរណ៍ផ្លូវគោក និងសណ្តាប់ធ្នាប់សាធារណៈមានការវិវត្តន៍ប្រែប្រួលថ្មី ជាពិសេសការកាត់បន្ថយគ្រោះថ្នាក់ និងភាពកកស្ទះចរាចរណ៍»។

លោក នេត សាវឿន រំពឹងថា សាធារណជននឹងមានការយោគយល់ចូលរួមអនុវត្តច្បាប់ចរាចរណ៍ផ្លូវគោកសំដៅរក្សាសុវត្ថិភាព និងជួយធ្វើឲ្យស្ថានភាពសណ្តាប់ធ្នាប់ ចរាចរណ៍នៅកម្ពុជា បានល្អប្រសើរ៕