ជាតិ
នយោបាយជាតិ
×![]()
ដោយ: ថ្មីៗ
អ្នកនាំពាក្យគណបក្សប្រជាជនកម្ពុជាប្រចាំរដ្ឋសភា លោក ឈាង វុន អះអាងថា សមាជិកសភាតំបន់អាស៊ី២២ប្រទេស ជាសមាជិក APA ជាច្រើនរូប ដែលបានចូលរួមកិច្ចប្រជុំក្រុមប្រឹក្សាប្រតិបត្តិលើកទី២ នៃមហាសន្និបាត APA មិនបាននិយាយសួររកគណបក្សប្រឆាំងនៅកម្ពុជានោះទេ។ លោក ឈាង វុន បញ្ជាក់ថា ការមិនសួររកនេះប្រហែលជាពួកគេ ភ្លេចមុខគណបក្សប្រឆាំងហើយ។
ថ្លែងចំពោះមុខអ្នកកាសែត លោក ឈាន វុន បានបញ្ជាក់យ៉ាងដូច្នេះថា៖« ប្រទេសយើងមានសន្តិសុខ សណ្តាប់ធ្នាប់សង្គមច្បាស់លាស់ បានប្រធានសភាគេនីមួយៗហ៊ានមកប្រទេសយើង ។ ដូចនេះហើយមិនមានពាក់ព័ន្ធទេ រឿងសង្គ្រោះជាតិ ។ ខ្ញុំយល់ថា ប្រហែលជាគេភ្លេច(គណបក្សសង្គ្រោះជាតិ)ហើយ ព្រោះអត់ឮសូរគេនិយាយផង»។
លោក ឈាង វុន បន្ថែមថា បើទោះជាគណបក្សប្រឆាំងពហិការ មិនចូលរួមក្នុងមហាសន្និបាតសភាតំបន់អាស៊ី APA នេះក៏ដោយ ក៏មិនមានបញ្ហាអ្វីដែលធ្វើឲ្យប៉ះពាល់ដល់ដំណើរការរៀបចំកិច្ចប្រជុំនេះឡើយ ព្រោះរដ្ឋសភាកម្ពុជាបានត្រៀមរៀបចំមហាសន្និបាតនេះ ចំនួន៣ឆ្នាំមកហើយដើម្បីឲ្យមានដំណើរការបានល្អ។ បើតាមលោក ឈាង វុន បញ្ហាដែលសំខាន់ជាងនេះ គឺកម្ពុជាត្រូវរៀបចំសន្ដិសុខ និងសណ្ដាប់ធ្នាប់ឲ្យបានល្អដល់តំណាងសភាដែលចូលរួមមហាសន្និបាតសភាតំបន់អាស៊ី APAនេះទៅវិញទេ។
កន្លងមកមន្ត្រីគណបក្សសង្គ្រោះជាតិ ធ្លាប់អះអាងថា ពួកគេនឹងមិនចូលរួមកិច្ចប្រជុំមហាសន្និបាតសភាតំបន់អាស៊ី APA នេះឡើយ ដោយសារតែមិនមានដំណោះស្រាយនយោបាយរវាងគណបក្សទាំងពីរ។
គួរបញ្ជាក់ថា មហាសន្និបាតលើកទី៨ តំបន់អាស៊ី APA ដែលកម្ពុជាធ្វើជាម្ចាស់ផ្ទះនេះ គឺរៀបចំឡើងចាប់ពីថ្ងៃទី៧ -១២ ខែធ្នូ នៅសណ្ឋាគារសុខា និងរ៉េស៊ីដង់៕
Tag:
ឈាង វុន
© រក្សាសិទ្ធិដោយ thmeythmey.com
