គីមជុងអ៊ុន៖ កូរ៉េខាងជើងក្លាយជាមហាអំណាចនុយក្លេអ៊ែរដ៏ខ្លាំងក្លា ព្រោះមានគ្រាប់បែកអ៊ីដ្រូសែន

អន្តរជាតិ

នយោបាយអន្តរជាតិ

គីមជុងអ៊ុន៖ កូរ៉េខាងជើងក្លាយជាមហាអំណាចនុយក្លេអ៊ែរដ៏ខ្លាំងក្លា ព្រោះមានគ្រាប់បែកអ៊ីដ្រូសែន

10, Dec 2015 , 12:16 pm

រូបភាព

ដោយ: ថ្មីៗ

មេដឹកនាំកំពូលរបស់កូរ៉េខាងជើងលោក គីម ជុងអ៊ុន បានប្រកាសជាផ្លូវការថា កូរ៉េខាងជើងមានគ្រាប់បែកអ៊ីដ្រូសែន ដែលនេះបញ្ជាក់ថា រដ្ឋឯកោមួយនេះក្លាយជាមហាអំណាចនុយក្លេអ៊ែរដ៏ខ្លាំងក្លាមួយលើលោក។ មេដឹកនាំរូបនេះក៏បញ្ជាក់ផងដែរថា គ្រាប់បែកនេះអាចប្រើប្រាស់ដោយបំពាក់ជាមួយក្បាលគ្រាប់នុយក្លេអ៊ែរផង។ នេះបើយោងតាមសារព័ត៌មានរដ្ឋរុស្ស៊ីដែលបានស្រង់សម្តី ទីភ្នាក់ងារព័ត៌មានមជ្ឈិមកូរ៉េខាងជើង។

លោក គីម ជុងអ៊ុន បានប្រកាសជាផ្លូវការថា ប្រទេសកូរ៉េខាងជើងបានសម្រេចជោគជ័យផលិតគ្រាប់បែកអ៊ីដ្រូសែន។ ហើយលោក សង្កត់ធ្ងន់ថា ប្រទេសលោកក៏អាចប្រើប្រាស់គ្រាប់បែកនេះបំពាក់ជាមួយក្បាលគ្រាប់នុយក្លេអ៊ែរ ដើម្បីការពារអធិបតេយ្យខ្លួន ប្រឆាំងរាល់ការឈ្លានពានពីបរទេស។ កូរ៉េខាងជើងចាត់ទុកថា ជោគជ័យនេះជួយឲ្យខ្លួនក្លាយជាមហាអំណាចនុយក្លេអ៊ែរដ៏ខ្លាំងក្លាមួយលើលោក។

យោងតាមទីភ្នាក់ងារព័ត៌មានកូរ៉េខាងជើង លោក គីម ជុងអ៊ុន ប្រកាសបែបនេះក្នុងពេលដែលលោកទៅទស្សនកិច្ចនិងត្រួតពិនិត្យរោងចក្រផលិតអាវុធមួយកន្លែងដែលទើបត្រូវគេបង្កើនសមត្ថភាពនិងកែលម្អរដែលមានទីតាំងនៅរដ្ឋធានីព្យុងយ៉ាងនៅថ្ងៃព្រហស្បតិ៍នេះ។ លោក គីម ជុងអ៊ុន ថ្លែងថា៖« យើងអាចមានលទ្ធភាពសម្រេចបានជោគជ័យដោយប្រែក្លាយប្រទេសយើងជាមហាអំណាចនុយក្លេអ៊ែរ ដែលអាចការពារឯករាជ្យ និងបូរណភាពដែនដីប្រទេសយើងដោយប្រើប្រាស់អំណាចនុយក្លេអ៊ែរនិងគ្រាប់បែកអ៊ីដ្រូសែន»។

ទោះជាភាគីកូរ៉េខាងជើងបានប្រកាសបែបនេះក៏ដោយ កន្លងមកមិនទាន់មានការទទួលស្គាល់ជាផ្លូវការទេ ថារដ្ឋឯកោមួយនេះពិតជាមានសមត្ថភាពផលិតគ្រាប់បែកអ៊ីដ្រូសែននេះពិតឬអត់ទេ។ របបដឹកនាំក្រុងព្យុងយ៉ាងបានប្រកាសតាំងពីឆ្នាំ ២០០៥ ថាខ្លួនផលិតបានអាវុធនុយក្លេអ៊ែរ ហើយជាបន្តបន្ទាប់រដ្ឋមួយនេះបានបាញ់សាកល្បងអាវុធរបស់ខ្លួន ពោលគឺក្នុងឆ្នាំ ២០០៦ , ២០០៩ និង ២០១៣ ។ សហគមន៍អន្តរជាតិ បានថ្កោលទោសការបាញ់សាកល្បងអាវុធនុយក្លេអ៊ែរនេះ ហើយបានដាក់ទណ្ឌកម្មប្រឆាំងប្រទេសនេះជាបន្តបន្ទាប់៕