អន្តរជាតិ
នយោបាយអន្តរជាតិ
អ៊ីស្រាអែល ជឿថាដូណាល់ត្រាំអាចក្លាយជា ប្រធានាធិបតីអាមេរិក?
× បេក្ខជនប្រធានាធិបតីបក្សសាធារណរដ្ឋលោក ដូណាល់ ត្រាំ (Donald Trump) គ្រោងនឹងជួបនាយករដ្ឋមន្ត្រីអ៊ីស្រាអែលលោក បេនចាមិន ណេតាន់ យ៉ាហ៊ូ (Benjamin Netanyahu) នៅថ្ងៃ២៨ខាងមុខ។ អ៊ីស្រាអែលជួប បេក្ខជនរូបនេះ អាចដោយសារលោកមានសក្តានុពលក្នុងការដណ្តើមតំណែងប្រធានាធិបតី។ តែប្រធានបទនៃជំនួបរវាងអ្នកនយោបាយអាមេរិកនិងមេដឹកនាំអ៊ីស្រាអែលមិនត្រូវគេទម្លាយឲ្យដឹងមុនទេ។
លោក មុំ ពិទូរ្យ លម្អិតព័ត៌មាននេះ
បើយោងតាមសេចក្តីប្រកាសព័ត៌មានការិយាល័យនាយករដ្ឋមន្ត្រីអ៊ីស្រាអែលដែលចេញកាលពីថ្ងៃពុធ ទី០៩ បេក្ខជនប្រធានាធិបតីនាំមុខគេនៃបក្សសាធារណរដ្ឋលោក ដូណាល់ត្រាំ នឹងជួបជជែកពិភាក្សាជាមួយនាយករដ្ឋមន្ត្រីអ៊ីស្រាអែល បេនចាមិន ណេតាន់យ៉ាហ៊ូ នៅថ្ងៃទី ២៨ខែធ្នូខាងមុខ។ គេសន្និដ្ឋានថា ជំនួបនេះអាចមានលក្ខណៈពិសេសដោយសារតែអ៊ីស្រាអែលមើលឃើញពីសក្តានុពលរបស់បេក្ខជនរូបនេះ ដែលអាចត្រូវគណបក្សចាត់តាំងទៅប្រកួតយកតំណែងប្រធានាធិបតីនៅឆ្នាំក្រោយផង។
ជំនួបនេះត្រូវបានគេប្រកាសឡើងស្របពេលដែលគ្រប់គ្នាចាប់ផ្តើមទិតៀនបេក្ខជនប្រធានាធិបតី ដូណាល់ត្រាំ ក្រោយពេលលោកប្រកាសស្នើឲ្យមានការហាមប្រាមរាល់ប្រជាជនម៉ូស្លីមចូលក្នុងទឹកដីអាមេរិកកាលពីដើមសប្តាហ៍កន្លងទៅ។ ប៉ុន្តែមន្ត្រីអ៊ីស្រាអែលអះអាងថា កាលវិភាគនៃជំនួបនេះត្រូវបានគេរៀបចំទុកមុនពីរសប្តាហ៍ឯណោះ។
គេសង្កេតឃើញមានការថ្កោលទោសចំពោះសុន្ទរកថាដែលប៉ះពាល់ដល់សេរីភាពសាសនាដែលថ្លែងឡើងដោយមហាសេដ្ឋីអាមេរិកខាងលើ ពីខាងភាគីអ៊ីស្រាអែលដែរ។ អ៊ីស្រាអែលសង្កត់ធ្ងន់ថាខ្លួនគោរពរាល់សាសនាទាំងអស់ និងខិតខំប្រឹងប្រែងធានារាល់សិទ្ធិសេរីភាពប្រជាជនទាំងអស់រួមទាំងសេរីភាពសាសនាផង។
ការរៀបចំជំនួបរវាងមេដឹកនាំអ៊ីស្រាអែលជាមួយបេក្ខជនប្រធានាធិបតីរូបនេះមានមូលហេតុសំខាន់នៅពីក្រោយដែរ។ អ្វីដែលគ្រប់គ្នាមើលឃើញ លោក ដូណាល់ ត្រាំ បានក្លាយបេក្ខជនដែលមានប្រជាប្រិយភាពខ្ពស់ជាងគេក្នុងបក្សសាធារណរដ្ឋ ថ្វីបើអ្នកនយោបាយរូបនេះនិយាយស្តីមិនចេះគិតក៏ដោយ។ បើសិនគ្មានការថ្លែងសុន្ទរកថា និងបង្កើតគោលនយោបាយចម្រូងចម្រាស់រើសអើងសាសនានោះទេ លោកអាចនឹងមានលទ្ធភាពច្រើនដើម្បីទទួលបានការតែងតាំងសម្រាប់ការប្រកួតប្រជែងជាមួយបេក្ខជនបក្សប្រជាធិបតេយ្យថែមទៀត។
ទោះជាយ៉ាង ក៏ដោយ អ៊ីស្រាអែលបានថ្លែងការពារជាមុនថា ការរៀបចំជំនួបបែបនេះជាទម្លាប់ ហើយអ៊ីស្រាអែលអញ្ជើញរាល់បេក្ខជនទាំងអស់មកពីបក្សទាំងពីរ ដោយមិនសំដៅលើបេក្ខជនណាមួយឬបក្សណាមួយនោះទេ។
ប៉ុន្តែខាងអ៊ីស្រាអែលមានទំនោរទៅរកបេក្ខជនបក្សសាធារណរដ្ឋ ហើយរដ្ឋមួយនេះក៏លួចរំពឹងចង់ឲ្យបក្សសាធារណរដ្ឋឈ្នះឆ្នោតប្រធានាធិបតីនៅពេលខាងមុខផងដែរ។ ទំនាក់ទំនងអាមេរិក និងអ៊ីស្រាអែល ដែលជាសម្ព័ន្ធមិត្តចាក់ទឹកមិនលិចរបស់អាមេរិកដែរនោះ ធ្លាក់ចុះខ្លាំងក្នុងអាណត្តិរបស់លោក បារ៉ាក់ អូបាម៉ា។ អ៊ីស្រាអែល ទើសចិត្តខ្លាំងនៅពេលដែលរដ្ឋបាលលោក បារ៉ាក់ អូបាម៉ា ទាមទារឲ្យខ្លួនទទួលយកដំណោះស្រាយរដ្ឋពីរដើម្បីបញ្ចប់ជម្លោះអ៊ីស្រាអែល-ប៉ាឡេស្ទីន។ រដ្ឋជ្វីវមួយនេះ មិនដែលចង់ឲ្យមានការទទួលស្គាល់ប៉ាឡេស្ទីន ជារដ្ឋផ្លូវការនោះឡើយព្រោះវាអាចប៉ះពាល់ដល់សន្តិសុខរបស់ខ្លួននៅពេលអនាគតទៀត។
ហើយរឿងដែលអ៊ីស្រាអែលមិនចង់ឃើញនោះ គឺបេក្ខជននាំមុខបក្សប្រជាធិបតេយ្យលោកស្រីហ៊ីឡារី គ្លីនតុនឈ្នះឆ្នោតជាប្រធានាធិបតី ព្រោះនិយាយជារួម លោកស្រី ដែលធ្លាប់ជារដ្ឋមន្ត្រីការបរទេសនោះ មិនមានជំហរខុសគ្នាពីលោក អូបាម៉ា នោះឡើយជុំវិញការដោះស្រាយបញ្ហាអ៊ីស្រាអែលប៉ាឡេស្ទីន៕
Tag:
ដូណាល់ ត្រាំ
អ៊ីស្រាអែល
© រក្សាសិទ្ធិដោយ thmeythmey.com