អន្តរជាតិ
នយោបាយអន្តរជាតិ
មេ ISIS ជាប់លេខ២សម្រាប់ពាន Person of the Year បន្ទាប់ពីអធិការបតីអាល្លឺម៉ង់
×
មេដឹកនាំក្រុមជ្រុលនិយមរដ្ឋឥស្លាមឬក្រុមដែស្ហ (Daesh) លោក Abu Bakr al-Baghdadi ស្ថិតនៅលំដាប់លេខរៀងទី២ បន្ទាប់អធិការបតីអាល្លឺម៉ង់លោកស្រី អែនជែឡា មឺហ្កែល (Angela Merkel) សម្រាប់ពានមនុស្សសំខាន់ប្រចាំឆ្នាំ( Person of the Year) ប្រចាំទស្សនាវដ្ដី Time។ នេះគឺជាលើកដំបូងក្នុងរយៈពេល២៩ឆ្នាំ ដែលមានស្ត្រីទទួលបានពាននេះ។
ទស្សនាវដ្ដី Time បានជ្រើសរើសអធិការបតីអាល្លឺម៉ង់លោកស្រី អែនជែឡា មឺហ្កែល (Angela Merkel) ជាជ័យលាភីលេខមួយសម្រាប់តំណែង Person of the Year ប្រចាំឆ្នាំ២០១៥នេះ។ មេដឹកនាំរូបនេះបានឈ្នះគូប្រជែងផ្សេងទៀតដូចជា ប្រធានាធិបតីរុស្សី វ្ល៉ាឌីមៀ ពូទីន និងបេក្ខជនប្រធានាធិបតីអាមេរិកមកពីបក្សសាធារណរដ្ឋលោក ដូណាល់ ត្រាំ ជាដើម។ តែអ្វីដែលចម្លែកនោះ មេដឹកនាំក្រុមភេរវជនដែស្ហ លោក Abu Bakr al-Baghdadi បែរជាស្ថិតនៅចំណាត់លេខរៀងទី២ បន្ទាប់ពីលោកស្រី Merkel គឺនៅលើឥស្សរជនល្បីផ្សេងៗទៅទៀត។
ការជ្រើសរើសលោក al-Baghdadi ស្ថិតក្នុងលំដាប់ទី២ សម្រាប់តំណែង Person of the Year បានធ្វើឲ្យមនុស្សជាច្រើនស្រឡាំងកាំង ដោយសារតែអំពើសាហាវឃោរឃៅរបស់ក្រុមជ្រុលនិយមដែស្ហ នាពេលកន្លងមក។ ទស្សនាវដ្ដី Time បានសរសេរក្នុងអត្ថបទខ្លួនថា យុវជនជីហាដបានមកប្រមូលផ្ដុំគ្នាតាមការហៅរបស់គាត់ (al-Baghdadi) និងប្រកាសខ្លួនជាសម្ព័ន្ធភាពនឹង al-Baghdadi ទៀតផង។ ត្រង់នេះប្រហែលមានន័យថា មេដឹកនាំក្រុមជ្រុលនិយមរូបនេះ មានសមត្ថភាពអស្ចារ្យដែលអាចប្រមូលមនុស្សជាច្រើននៅជុំវិញពិភពលោកឲ្យដើរតាមខ្លួននិងបង្កជាព្យុះភ្លៀងដែលនាំឲ្យប្រទេសមហាអំណាចវិលមុខយ៉ាងខ្លាំង។
យ៉ាងណាក៏ដោយ នេះក៏មិនមែនជាលើកទីមួយទេដែលទស្សនាវដ្ដី Time បានរើសបុគ្គលមានបុគ្គលិកលក្ខណៈសាហាវបែបនេះទេ។ កាលពីឆ្នាំ១៩៣៨ ទស្សនាវដ្ដីនេះបានជ្រើសមេដឹកនាំណាស៊ីផ្ដាច់ការអាល្លឺម៉ង់លោក អាដុហ្វ ហ៊ីត្លែ (Adolf Hitler) សម្រាប់តំណែងម្ចាស់ពាន់មនុស្សសំខាន់ប្រចាំឆ្នាំ១៩៣៨ ។
ចំណែកឯ លោកស្រី Merkel ត្រូវបានទស្សនាវដ្ដី Time លើកសរសើចំពោះការដោះស្រាយវិបត្តិនៅអឺរ៉ុបដូចជា វិបត្តជនភៀសខ្លួន បញ្ហាបំណុលក្រិច ក៏ដូចជាការប្រឆាំងក្រុមជ្រុលនិយមរដ្ឋឥស្លាម។ លោកស្រី Nancy Gibbs ដែលជាប្រធានការីនិពន្ធប្រចាំទស្សនាវដ្តី Time បាននិយាយថា ៖« លោកស្រី មឺហ្កែល មានលក្ខណៈពិសេសជាច្រើនដូចជា មនុស្សធម៌ ចិត្តទូលាយ និងអត់ធ្មត់ខ្ពស់ ដែលនេះបានបង្ហាញពីភាពខ្លាំងរបស់លោកស្រីដើម្បីជួយអ្នកដទៃ ច្រើនជាងការបំផ្លាញអ្នកដទៃ»។
គួរបញ្ជាក់ថា ចាប់តាំងពីឆ្នាំ១៩២៧មកទស្សនាវដ្ដី Time បានសម្លឹងមើលបុគ្គលជុំវិញពិភពលោកដើម្បីផ្តល់ចំណាត់ថ្នាក់ជាមនុស្សសំខាន់ប្រចាំឆ្នាំ ហើយចាប់ពីពេលនោះមក មានតែស្ត្រី៤នាក់ប៉ុណ្ណោះដែលត្រូវបានជ្រើសរើស៕
Tag:
Person of the Year
Abu Bakr al-Baghdadi
Angela Merkel
© រក្សាសិទ្ធិដោយ thmeythmey.com