បទវិភាគ
ប្រើយន្តការតុលាការធ្វើបាបបក្សប្រឆាំងមិនបានធ្វើឲ្យក្រុមនេះបាត់ប្រជាប្រិយភាពឡើយ!
×
ភ្នំពេញ៖ ពីរបីអាណត្តិចុងក្រោយនេះ ការប្រកួតប្រជែងខាងនយោបាយនៅកម្ពុជា បានបង្ហាញឱ្យឃើញថា មានភាពសកម្មនិងតានតឹងគួរឱ្យកត់សម្គាល់។ ដើម្បីប្រឈមនឹងភាពតានតឹងនេះ គូប្រជែងនីមួយៗ បានប្រើប្រាស់អស់លទ្ធភាពនិងសក្ដានុពលដែលខ្លួនមាន ទោះបីជាល្អ ឬ មិនល្អក៏ដោយ។ ចំពោះបក្សប្រឆាំង ជារឿយៗ ត្រូវគេចោទថា បានញុះញង់ឱ្យមានចលាចលតាមរយៈរូបភាពបាតុកម្ម ឬ កុបកម្ម និង រារាំងមិនឱ្យមានការផ្ដល់ជំនួយមកកម្ពុជា ដើម្បីដាក់សម្ពាធលើរដ្ឋាភិបាល ឬ បក្សកាន់អំណាច។ ចំណែកឯបក្សកាន់អំណាចវិញ ក៏ត្រូវគេចោទថា បានប្រើប្រាស់អំណាចរដ្ឋ អាជ្ញាធរ នគរបាល យោធា និង ជាពិសេស តុលការ ដើម្បីពង្រឹងអំណាចរបស់ខ្លួន និង ទប់ស្កាត់ប្រជាប្រិយភាពរបស់បក្សប្រឆាំង ឬ អ្នកតវ៉ាផ្សេងៗ។ តើការប្រើប្រាស់យន្តការតុលាការនេះ ពិតជាបានកាត់បន្ថយប្រជាប្រិយភាពរបស់បក្សប្រឆាំងមែន ឬ យ៉ាងណា?
ការប្រើប្រាស់យន្តការតុលាការដើម្បីទប់ស្កាត់សកម្មភាពលេចធ្លោ ឬ កាត់បន្ថយប្រជាប្រិយភាពរបស់បក្សប្រឆាំងនេះ ត្រូវបានគេមើលឃើញថា រដ្ឋាភិបាល ឬ បក្សកាន់អំណាច បានប្រើប្រាស់ជាបន្តបន្ទាប់មកហើយរហូតមកដល់ពេលនេះ ប៉ុន្តែ វាហាក់ដូចជា គ្មានប្រសិទ្ធទេ។ ផ្ទុយទៅវិញ ទង្វើនេះ ត្រូវរងការរិះគន់យ៉ាងដំណំពីសាធារណមតិជាតិនិងអន្តរជាតិ ទាំងកម្រិតរដ្ឋាភិបាលនិងសង្គមស៊ីវិល។ ទីបំផុត ប្រជាប្រិយភាពរបស់បក្សកាន់អំណាចចេះតែបន្តថយចុះឥតឈប់ឈរ ឯប្រជាប្រិយភាពរបស់បក្សប្រឆាំងវិញចេះតែកើនឡើងជាបន្តបន្ទាប់។ ជាក់ស្ដែង ក្នុងអាណត្តិទី៥នេះ បក្សកាន់អំណាច បានបាត់បង់ការគាំទ្ររបស់ខ្លួនរហូតដល់ជាង២០អាសនៈក្នុងរដ្ឋសភាបើប្រៀបធៀបនឹងអាណត្តិមុន។
ដូច្នេះ គេអាចសន្និដ្ឋានបានថា ការប្រើប្រាស់យន្តការតុលាការដើម្បីរារាំង ឬ ទប់ស្កាត់សកម្មភាពលេចធ្លោ ឬ កាត់បន្ថយប្រជាប្រិយភាពរបស់បក្សប្រឆាំងនោះ បក្សកាន់អំណាច ហាក់ដូចជាមិនទទួលបានផលវិជ្ជមានទេ។ ថ្វីបើបក្សកាន់អំណាចទអាចប់ស្កាត់ ឬ រារាំង មេបក្ស ឬ សកម្មជនមួយចំនួនតូចរបស់បក្សប្រឆាំងបានមែន ប៉ុន្តែ រូបភាពនេះ វាកាន់តែដុតរោលនិងជំរុញឆន្ទៈអ្នកគាំទ្របក្សប្រឆាំងឱ្យកាន់តែមោះមុតថែមទៀតក្នុងការតស៊ូមតិ ឬ ការតវ៉ាផ្សេងៗ។ លើសពីនេះទៀត ឆ្លងតាមឥទ្ធិពរាលដាល ប្រជាពលរដ្ឋខ្មែរជាច្រើននាក់ ដែលធ្លាប់រងគ្រោះដោយសារអំពើអយុត្តិធម៌របស់តុលាការនោះ ក៏កាន់តែមិនពេញចិត្តរដ្ឋាភិបាល ឬ បក្សកាន់អំណាចដែរ។ មូលហេតុនេះហើយ ដែលរួមចំណែកយ៉ាងសំខាន់ក្នុងការធ្វើឱ្យប្រជាប្រិយភាពរបស់រដ្ឋាភិបាល ឬ បក្សកាន់អំណាចចេះតែបន្តធ្លាក់ចុះឥតឈប់ឈរ។
បើទោះបីជាយ៉ាងនេះក៏ដោយ ក៏គេនៅតែសង្កេតឃើញថា ការប្រើប្រាស់យន្តការតុលាការដើម្បីរារាំង ឬ ទប់ស្កាត់សកម្មភាពលេចធ្លោ ឬ កាត់បន្ថយប្រជាប្រិយភាពរបស់បក្សប្រឆាំង នៅតែត្រូវបានរដ្ឋាភិបាល កំពុងប្រើយ៉ាងពេញនិយមនៅឡើយ។ ហេតុផលដែលរដ្ឋាភិបាល ឬ បក្សកាន់អំណាច នៅតែបន្តប្រើយន្តការនេះ អាចបណ្ដាលមកពី ការមិនបានសិក្សាស្រាវជ្រាវពីផលអវិជ្ជមានរបស់វា, គ្មានជម្រើសផ្សេង ឬ វាជាវិធីដែលងាយស្រួលប្រើជាងគេ។
ជាការឆ្លើយតបទៅនឹងការលើកឡើងខាងលើ ជារឿយៗ គេតែងតែឮមន្ត្រីរដ្ឋាភិបាល ឬ បក្សកាន់អំណាចបានប្រតិកម្មថា ការចោទប្រកាន់នានាទាក់ទងនឹងការប្រើប្រាស់យន្តការតុលាការដើម្បីរារាំង ឬ ទប់ស្កាត់សកម្មភាពលេចធ្លោ ឬ កាត់បន្ថយប្រជាប្រិយភាពរបស់បក្សប្រឆាំងនោះ គឺជាការចោទប្រកាន់ដោយគ្មានភស្តុតាងគ្រប់គ្រាន់ ដោយអគតិ និង មានទំនោរទៅរកទឡ្ហីកម្មបែបនយោបាយ។ ផ្ទុយទៅវិញ ពួកគេបានអះអាងថា រឿងរ៉ាវទាក់ទងនឹងការចាប់ខ្លួនសកម្មជនរបស់បក្សប្រឆាំងកន្លងមក សុទ្ធតែបានធ្វើឡើងក្នុងយុត្តាធិការរបស់តុលាការ ព្រមទាំងសុទ្ធតែស្របតាមអង្គហេតុ អង្គច្បាប់ និង នីតិវិធីច្បាប់របស់តុលាការ វាមិនទាក់ទងនឹងអំណាចនីតិប្រតិបត្តិទេ។
ទោះបីជាយ៉ាងណាក៏ដោយ ក៏ប្រព័ន្ធយុត្តិធម៌ ឬ តុលាការកម្ពុជា ត្រូវបានគេចោទថា មិនឯករាជ្យ ធ្វើអ្វីៗតែតាមការបញ្ជារបស់អ្នកនយោបាយ ហើយការកាត់ក្ដីលម្អៀងទៅរកអ្នកធំនិងអ្នកមានលុយ។ លើសពីនេះទៅទៀត ប្រព័ន្ធច្បាប់របស់កម្ពុជា ក៏មិនទាន់បានបែងចែកច្បាស់លាស់អំពីទោសនយោបាយនិងទោសដទៃដែរ។ ហេតុនេះ ប្រសិនបើ រដ្ឋាភិបាល ឬ បក្សកាន់អំណាចនៅតែបន្តប្រើប្រាស់យន្តការតុលាការដើម្បីដាក់សម្ពាធ រារាំង ឬ ទប់ស្កាត់សកម្មភាពលេចធ្លោ ឬ កាត់បន្ថយប្រជាប្រិយភាពរបស់បក្សប្រឆាំងនោះ មានន័យថា ប្រជាប្រិយភាព និង ការគាំទ្ររបស់ខ្លួននៅតែបន្តធ្លាក់ចុះបន្ថែមទៀត៕
© រក្សាសិទ្ធិដោយ thmeythmey.com