ជាតិ
វិទ្យាល័យតូគុស៊ីម៉ាជប៉ុន និងវិទ្យាល័យមិត្តភាពខ្មែរ-ជប៉ុនចុះកិច្ចព្រមព្រៀងមិត្តភាព
×![]()
ភ្នំពេញ៖ នាយកវិទ្យាល័យពាណិជ្ជសាស្ត្រតូគុស៊ីម៉ា នៃប្រទេសជប៉ុន និងតំណាងក្រុមប្រឹក្សាភិបាលគ្រប់គ្រងវិទ្យាល័យមិត្តភាពខ្មែរ-ជប៉ុន នៃប្រទេសកម្ពុជា បានចុះកិច្ចព្រមព្រៀងរឹតចំណងមិត្តភាព ដើម្បីផ្លាស់ប្តូរបទពិសោធន៍សិក្សា រវាងសិស្សានុសិស្ស និងគ្រូបង្រៀនភាគទាំងពីរលើផ្នែកបច្ចេកវិទ្យា វប្បធម៌ ប្រវត្តិសាស្ត្រ និងអក្សរសាស្ត្រ ជាដើម។
ពិធីនេះ បានប្រព្រឹត្តឡើងក្នុងស្ថានទូតជប៉ុនប្រចាំកម្ពុជា នៅថ្ងៃទី១៤ ធ្នូនេះ ក្រោមអធិបតីភាពលោក Yuji Kumamaru ឯកអគ្គរដ្ឋទូតជប៉ុនប្រចាំកម្ពុជា និងលោក អ៊ឹម កុច រដ្ឋលេខាធិការក្រសួងអប់រំ យុវជន និងកីឡា និងលោក ហោ មុនីរ័ត្ន អនុរដ្ឋលេខាធិការក្រសួងទេសចរណ៍។
លោក គង់ វន ប្រធានអង្គការមូលនិធិខ្មែរជំនួយការសិក្សា (Cambodia Education Assistance Fund) និងជាតំណាងក្រុមប្រឹក្សាគ្រប់គ្រងវិទ្យាល័យមិត្តភាពខ្មែរ-ជប៉ុន បានរីករាយសាទរជាខ្លាំង ចំពោះពិធីចុះកិច្ចព្រមព្រៀងមិត្តភាពរវាងវិទ្យាល័យមិត្តភាពខ្មែរ-ជប៉ុន និងវិទ្យាល័យ ពាណិជ្ជសាស្ត្រតូគឹស៊ីម៉ា។ លោកនិយាយថា ចាប់តាំងពីវិទ្យាល័យមិត្តភាពខ្មែរ-ជប៉ុន ស្ថិតក្នុងស្រុកព្រះស្តេច ខេត្តព្រៃវែង ត្រូវបានបង្កើតឡើងមក សាលានេះ មានតួនាទីតែមួយមុខប៉ុណ្ណោះ គឺ ការបណ្តុះបណ្តាលចំណេះទូទៅដល់សិស្សានុសិស្សពីមួយឆ្នាំទៅមួយឆ្នាំ។ តែក្រោយពីសាលានេះ បានចាប់ផ្តើមចងសម្ព័ន្ធភាពសហការគ្នាជាបណ្តើរៗ ជាមួយវិទ្យាល័យ ពាណិជ្ជសាស្ត្រតូគឹស៊ីម៉ាចាប់ពីឆ្នាំ ២០១២មក ភាគីទាំងពីរបានផ្លាស់ប្តូរជំនាញបច្ចេកទេសកែច្នៃផលិតផល អក្សរសាស្ត្រ វប្បធម៌ ជាបន្តបន្ទាប់។
លោកបញ្ជាក់យ៉ាងដូច្នេះថា៖«ជាក់ស្តែងគ្រូ និងសិស្សវិទ្យាល័យមិត្តភាពខ្មែរ-ជប៉ុន បានទៅសិក្សារៀនសូត្របទពិសោធន៍នៅវិទ្យាល័យពាណិជ្ជសាស្ត្រតុតឹស៊ីម៉ា និងនៅរោងចក្រ ព្រមទាំងកន្លែងជាច្រើន នៅប្រទេសជប៉ុនបានចំនួនពីរលើកហើយ គឺ នៅឆ្នាំ ២០១៤ និង ឆ្នាំ ២០១៥នេះ»។
ជាមួយគ្នាដែរ លោក Sumi Chikara នាយកវិទ្យាល័យពាណិជ្ជសាស្ត្រតូគុស៊ីម៉ា បានលើកឡើងថា នៅក្នុងឆ្នាំ ២០១៥នេះ ក្រសួងអប់រំ វប្បធម៌ កីឡា វិទ្យាសាស្ត្រ និងបច្ចេកវិទ្យាជប៉ុន បានប្រសិទ្ធិនាមវិទ្យាល័យពាណិជ្ជសាស្ត្រតូគុស៊ីម៉ា ជា Super Professional High School ដែលបាន និងកំពុងផ្តោតការបណ្តុះបណ្តាលលើវិស័យពាណិជ្ជសាស្ត្រ ជំនាញវិជ្ជាជីវៈ កាងារអាជីពកម្រិតខ្ពស់ នៅប្រទេសជប៉ុន។
វិទ្យាល័យពាណិជ្ជសាស្ត្រតូគុស៊ីម៉ាស្ថិតក្នុងខេត្តតូគុស៊ីម៉ា ដែលជាខេត្តមួយ ស្ថិតនៅមជ្ឈមណ្ឌលសេដ្ឋកិច្ចឈានមុខ និងជាមជ្ឈមណ្ឌលបណ្តុំវប្បធម៌ប្រទេសជប៉ុន។
លោក Sumi Chikara រំពឹងទុកថា កិច្ចព្រមព្រៀងមិត្តភាពនៅថ្ងៃនេះ នឹងនាំឲ្យទំនាក់ទំនងមិត្ត ភាពរវាងភាគីទាំងពីរកាន់តែរឹងមាំ និងបន្តកិច្ចសហការផ្នែកបណ្តុះបណ្តាលយុវជនកាន់តែមានប្រសិទ្ធភាពជាងមុនបន្ថែមទៀត។ លោកថ្លែងបញ្ជាក់ថា៖«កំលាំងថាមពលរបស់យុវជន គឺគ្មានដែនកំណត់ សម្រាប់ការកសាងនូវអនាគតដ៏ត្រចះត្រចង់។ ខ្ញុំជឿជាក់ថាកម្លាំងសាមគ្គី ការចេះជួយគ្នា ទៅវិញទៅមក ការខិតខំសិក្សារៀនសូត្រក្រេបយកចំណេះដឹងរបស់សិស្សានុសិស្សនៃវិទ្យាល័យទាំងពីរ នឹងធ្វើឲ្យមានវឌ្ឍនភាពទាំងសងខាង ហើយអាចរួមចំណែកក្នុងការលើកស្ទួយអភិវឌ្ឍសកលថែមទៀតផង»៕
Tag:
មិត្តភាពខ្មែរ-ជប៉ុន
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 6 ថ្ងៃ
