អន្តរជាតិ
នយោបាយអន្តរជាតិ
បក្សកាន់អំណាចបារាំងប្រើយុទ្ធសាស្ត្រទប់បក្សស្តាំនិយមជ្រុលមិនឲ្យឈ្នះឆ្នោតជុំទី២
× ក្នុងការបោះឆ្នោតជុំទី២ នៅបារាំងថ្ងៃអាទិត្យម្សិលមិញនេះ គណបក្សស្តាំនិយមជ្រុលរណសិរ្សជាតិមិនអាចឈ្នះបានសូម្បីតែមួយតំបន់ ទោះបីជាបក្សនេះបានសំឡេងគាំទ្រច្រើនក្នុងជុំទីមួយក៏ដោយ។ បរាជ័យរបស់បក្សរណសិរ្សជាតិធ្វើឲ្យលោកស្រី Marine Le Pen ខកចិត្តយ៉ាងខ្លាំង។ គណបក្សកាន់អំណាចសង្គមនិយមឈ្នះបានប្រហែល៦តំបន់ ស្របពេលគណបក្សសាធារណរដ្ឋរបស់អតីតប្រធានាធីបតីនីកូឡា សាកូហ្ស៊ី ឈ្នះបានចំនួន ៧ តំបន់។
យោងតាមសារព័ត៌មាន France 24 ក្នុងការបោះឆ្នោតតំបន់លើកទី២នៅបារាំង លទ្ធផលបង្ហាញថា គណបក្សស្តាំនិយមជ្រុល រណសិរ្សជាតិ មិនអាចរកជ័យជម្នះបានសូម្បីតែ ១ តំបន់ក្នុងចំណោមតំបន់ទាំង ១៣ ។ លទ្ធផលបោះឆ្នោតជុំទីពីរ ទំនងជាធ្វើឲ្យលោកស្រី Marine Le Pen ប្រធានបក្សរណសិរ្សនេះខកចិត្តខ្លាំង ព្រោះការបោះឆ្នោតជុំទីមួយសំឡេងគាំទ្របក្សទូទាំងប្រទេសមានរហូតដល់២៨ភាគរយឯណោះ។ យ៉ាងណាមិញប្រមុខបក្សនេះ បានអះអាងថា លោកស្រីនៅតែមានសង្ឃឹមខ្ពស់សម្រាប់ការបោះឆ្នោតសកល និងបោះឆ្នោតប្រធានាធិបតីនៅឆ្នាំ ២០១៧ខាងមុខ។
ស្របពេលដែលគណបក្សស្តាំនិយមជ្រុលធ្លាក់កូតរកជ័យជម្នះមិនបានសូម្បីតែមួយតំបន់ គេឃើញគណបក្សកាន់អំណាចសង្គមនិយមរបស់លោក ហ្វ្រង់ស្វ័រ ហូឡង់ នៅអាចរក្សាបានការគាំទ្រនៅតំបន់ចំនួន៦ ។ ឯគណក្សបក្សស្តាំនិយមរបស់អតីតប្រធានាធិបតីលោក នីកូឡា សាកូហ្ស៊ីឈ្នះបាន ៧តំបន់ឯណោះ។
វាជារឿងគួរឲ្យភ្ញាក់ផ្អើលដែល ព្រោះក្នុងការបោះឆ្នោតជុំទី ១ គណបក្សស្តាំនិយមជ្រុលរបស់លោកស្រី Marine Le Pen រកបានសំឡេងគាំទ្របានច្រើន រហូតដល់គណបក្សកាន់អំណាចនិងគណបក្សស្តាំនិយមព្រួយបារម្ភខ្លាំងដែរ។ តាមពិតទៅ គណបក្សស្តាំនិយមជ្រុល អាចឆក់ឱកាសដណ្តើមបានការគាំទ្រច្រើននៅជុំទី១ ក៏ព្រោះបញ្ហាមួយចំនួនមានទាំង អត្រាប្រជាជនគ្មានការងារនៅតែខ្ពស់ និងភេរវកម្មក្រុងប៉ារីសកន្លងមក។ ប៉ុន្តែនយោបាយរើសអើងសាសនា និងប្រឆាំងជនអន្តោរប្រវេសន៍របស់បក្សស្តាំនិយមជ្រុលនេះ ក៏ក្លាយជាមូលហេតុដែលរុញទឹកចិត្តប្រជាពលរដ្ឋបារាំងឲ្យបោះឆ្នោតគាំទ្របក្សផ្សេងដូចគ្នា។ ការចាញ់ឆ្នោតរបស់បក្សស្តាំនិយមជ្រុលនេះ ក៏ដោយសារយុទ្ធសាស្ត្ររបស់បក្សកាន់អំណាចដែរ។
មុនបោះឆ្នោតជុំទី២ គណបក្សកាន់អំណាចរបស់លោក ហ្វ្រង់ស្វ័រ ហូឡង់ បានសម្រេចដកបេក្ខជនរបស់ខ្លួនចេញពីតំបន់ Nord-Pas-de-Calais Picardie ដែលមានបេក្ខជនសំខាន់ជាក្មួយបង្កើតលោកស្រី Marine Le Pen ឈរឈ្មោះ។ ហើយគណបក្សកាន់អំណាចក៏អំពាវនាវឲ្យអ្នកគាំទ្រខ្លួនបោះឆ្នោតឲ្យគណបក្សលោក នីកូឡា សាកូហ្ស៊ីថែមទៀត។
យុទ្ធសាស្ត្របែបនេះ គេធ្លាប់ឃើញគណបក្សខាងលើប្រើប្រាស់ម្តងដែរក្នុងការបោះឆ្នោតឆ្នាំ ២០០២ នៅពេលដែលគណបក្សខាងលើអំពាវនាវឲ្យអ្នកបោះឆ្នោតងាកទៅគាំទ្រលោក Jacques Chirac ប្រឆាំងលោក Jean-Marie Le Pen ដែលឈរឈ្មោះជាប្រធានាធិបតីកាលនោះ។
ទោះជាបក្សស្តាំនិយមជ្រុលចាញ់ឆ្នោតពេលនេះក៏ដោយ នាយករដ្ឋមន្ត្រីបារាំងលោក Manuel Valls បានព្រមានថា គ្រោះថ្នាក់បង្កដោយបក្សស្តាំនិយមជ្រុលមិនទាន់ផុតឡើយ ហើយលោកបានអះអាងថា បក្សសង្គមនិយមលោកមិនស្ទាក់ស្ទើរចំពោះការអំពាវនាវឲអ្នកគាំទ្របោះឆ្នោតឲ្យគណបក្សលោក សាកូហ្ស៊ី ដើម្បីប្រឆាំងបក្សស្តាំនិយមជ្រុលឡើយ៕
Tag:
Marine Le Pen
បារាំង
© រក្សាសិទ្ធិដោយ thmeythmey.com