ជាតិ
អន្តរជាតិ
១ ខែហើយ ដែលឯកឧត្តម សម រង្ស៊ី ពន្យារពេលចូលស្រុក!
× ថ្ងៃទី ១៦ ខែវិច្ឆិកា ឆ្នាំ ២០១៥ ជាថ្ងៃកំណត់ដែលប្រធានគណបក្សសង្គ្រោះជាតិឯកឧត្តម សម រង្ស៊ី ប្រកាសពីប្រទេសកូរ៉េមកថា ខ្លួននឹងត្រឡប់មកកម្ពុជាវិញ បើទោះបីអាជ្ញាធរត្រៀមចាប់ខ្លួនមេដឹកនាំបក្សប្រឆាំងរូបនេះ ពាក់ព័ន្ធនឹងរឿងក្តីក្តាំជាមួយលោក ហោ ណាំហុង ក្តី។
គិតត្រឹមថ្ងៃទី ១៧ ខែធ្នូ មានរយៈពេល ១ ខែ ១ ថ្ងៃហើយ ដែលឯកឧត្តម សម រង្ស៊ី ប្រធានគណបក្សសង្គ្រោះជាតិ បានប្តូរចិត្តពន្យារពេលត្រឡប់មកកម្ពជា។ ឯកឧត្តម សម រង្ស៊ី ដែលមានរឿងក្តីក្តាំជាមួយរដ្ឋមន្ត្រីក្រសួងការបរទេសកម្ពុជា លោក ហោ ណាំហុង ហើយត្រូវតុលាការ សម្រេចឲ្យជាប់ពន្ធនាគារ ២ ឆ្នាំ នោះ កំពុងរស់នៅក្រៅប្រទេស ដើម្បីគេចវេះពីការចាប់ខ្លួនរបស់អាជ្ញាធរខ្មែរ។
សូមរម្លឹកថា នៅថ្ងៃទី ១៤ ខែវិច្ឆិកា ឆ្នាំ ២០១៥ ឯកឧត្តម សម រង្ស៊ី បានប្រកាសពីប្រទេសកូរ៉េថា ខ្លួននឹងវិលត្រឡប់មកកម្ពុជាវិញនៅថ្ងៃទី ១៦ ខែវិច្ឆិកា តាមការកំណត់ បើទោះជានឹងត្រូវអាជ្ញាធរចាប់ខ្លួនក៏ដោយ។ តែដល់ថ្ងៃកំណត់មេដឹកនាំបក្សប្រឆាំងរូបនេះ បានប្រកាសពន្យារពេលត្រឡប់មកកម្ពុជា ក្រោមហេតុផលថា ដើម្បីកុំឲ្យមានហិង្សាកើតឡើងជាយថាហេតុ ហើយម្យ៉ាងទៀតសហការីខ្លួននៅក្នុងប្រទេស និងសហគមន៍អន្តរជាតិ ក៏ស្នើឲ្យខ្លួនពន្យារពេលដែរ។
កន្លងមកអ្នកវិភាគនយោបាយនៅកម្ពុជា ចាត់ទុកថា មូលហេតុដែលឯកឧត្តម សម រង្ស៊ី ពន្យល់ពីការពន្យារពេលរបស់ខ្លួនចូលស្រុក គ្រាន់ជាលេសតែប៉ុណ្ណោះ។ ពួកគេយល់ថា អ្នកនយោបាយជើងចាស់រូបនេះ មិនហ៊ានប្រឈមនឹងពន្ធនាគារឡើយ។ អ្នកវិភាគទាំងនោះថែមទាំង ហ៊ាននិយាយថា ឯកឧត្តម សម រង្ស៊ី នឹងមិនវិលត្រឡប់មកកម្ពុជាវិញ បើគ្មានការសម្រុះសម្រួលនយោបាយជាមុននោះទេ៕
© រក្សាសិទ្ធិដោយ thmeythmey.com