ជាតិ
សង្គមជាតិ
អ្នកស្រី មឿន ថារី ៖«ខ្ញុំរំភើប និងមានកិត្តិយសណាស់ ពេលឃើញរូបខ្ញុំគូរលើជញ្ជាំងប៊ិលឌីង» លោក Miles "El Mac" MacGregor នៅខាងឆ្វេង អ្នកស្រីមឿន ថារី នៅខាងស្តាំ
×
លោក Miles "El Mac" MacGregor បានគូររូបអ្នកស្រី មឿន ថារី ដែលជាមន្ត្រីផ្នែកដេរប៉ាក់សម្លៀកបំពាក់របាំបុរាណ នៃក្រសួងវប្បធម៌ និងវិចិត្រសិល្បៈ នៅលើជញ្ជាំងនៃអាគារប៊ូលឌីង។ អ្នកស្រី មឿន ថារី បានបញ្ជាក់ថា មុននឹងគូររូបខ្លួននៅលើជញ្ជាំង វិចិត្រករអាមេរិករូបនេះ បានទិញស្បៃដេរប៉ាក់បុរាណដែលអ្នកស្រីបានប៉ាក់រួចនោះយកទៅជាមួយដែរ ដោយលោក Miles "El Mac" MacGregor ប្រាប់ថា នឹងយកស្បៃដេរប៉ាក់នេះ ទៅផ្សព្វផ្សាយពីវប្បធម៌ដេរប៉ាករបស់ខ្មែរ នៅក្រៅប្រទេស។អ្នកស្រី ថារី ដែលត្រូវបានវិចិត្រករដ៏ល្បីឈ្មោះរបស់អាមេរិករូបនេះ គូររូបលើជញ្ជាំងនោះ បានបន្ថែមថា ខ្លួនរំភើប និងកិត្តិយសខ្លាំងណាស ព្រោះរូបគំនូរដេរប៉ាក់នេះគឺបង្ហាញពីវប្បធម៌របស់ស្ត្រីខ្មែរ ហើយអ្នកស្រីក៏មានការសោកស្ដាយដែរ ដែលអាជ្ញាធរលុបរូបគំនូរដេរប៉ាក់របស់ស្ត្រីខ្មែរនេះចេញ។
សូមស្ដាប់សំឡេងរបស់ស្ដ្រីម្ចាស់រូបនៅលើជញ្ជាំងអាគារប៊ូឌីង៖
គួរបញ្ជាក់ថា លោក Miles "Mac"MacGregor អាយុ៣៥ឆ្នាំ ជាវិចិត្រករដ៏ល្បីឈ្មោះម្នាក់របស់អាមេរិក។ បើតាមគេហទំព័រ elmac.net លោក Mac ដក់ជាប់លើជំនាញគូររូបតាំងពីកុមារភាពមកម្ល៉េះ ដោយយកគំរូតាមលោក Caravaggio និង Vermeer ជាដើម។លោកបានចាប់ផ្តើមគូររូបតាមជញ្ជាំងចាប់ពីអំឡុងពាក់កណ្តាលទសវត្សរ៍ឆ្នាំ១៩៩០ មក។ នៅឆ្នាំ១៩៩៩ លោកបានគូររូបមិត្តភក្តិរបស់ខ្លួន និងជនជាតិម៉ិចស៊ិកមួយចំនួននៅតាមជញ្ជាំង និងទីសាធារណៈ ទាំងមានច្បាប់អនុញ្ញាត និងគ្មានច្បាប់អនុញ្ញាត។
គេសង្កេតឃើញផ្ទាំងគំនូររបស់លោក Mac មាននៅតាមជញ្ជាំងនានានៅសហរដ្ឋអាមេរិក ម៉ិកស៊ិក ដាណឺម៉ាក ស៊ុយអែត គុយបា កាណាដា កូរ៉េខាងត្បូង បែលហ្ស៊ិក អ៊ីតាលី ហូឡង់ ព័រតូរីកូ អេស្ប៉ាញ បារាំង សឹង្ហបុរី អាល្លឺម៉ង់ អៀរឡង់ អង់គ្លេស និងវៀតណាម ជាដើម៕
© រក្សាសិទ្ធិដោយ thmeythmey.com