ថៃ បានបំបាក់ម្ចាស់ផ្ទះ កម្ពុជា ធ្វើឱ្យបាត់បង់មេដាយមាស ៣គ្រឿងលើកទឹកដីរបស់ខ្លួន ដោយខ្លួនទទួលបានមេដាយមាស៤គ្រឿង ខណៈកម្ពុជាទទួលបានមេដាយមាសតែ ១គ្រឿង ក្នុងការប្រកួតកីឡាប៉េតង់ជើងឯកអាស៊ីលើកទី១៩ ឆ្នាំ២០១៥ ។ អគ្គលេខាធិការសហព័ន្ធកីឡាប៉េតង់ថៃ លោក Churin Pataradilok បានប្រាប់ពីមូលហេតុមួយចំនួនដែលខ្លួនទទួលបានមេដាយមាស៤គ្រឿងផងដែរក្រោយចប់ការប្រកួតកាលពីថ្ងៃទី១៩ ខែឆ្នូ។
លោក Churin Pataradilok អគ្គលេខាធិការសហព័ន្ធកីឡាប៉េតង់ថៃ ការទទួលបានមានមេដាយមាស៤គ្រឿងនេះ ដោយសារឆ្នាំនេះថៃបានធ្វើជាម្ចាស់ផ្ទះនៃការប្រកួតកីឡាប៉េតង់ជើងឯកពិភពលោក ហើយក្រោយចប់ការប្រកួតជើងឯកពិភពលោក កីឡាករកីឡាការិនីទាំងនោះបានបន្តការហ្វឹកហាត់របស់ខ្លួនយ៉ាងខ្លាំង ដើម្បីត្រៀមខ្លួនចូលរួមប្រកួតជើងឯកអាស៊ីនេះ។
លោក Churin Pataradilok បញ្ជាក់ដូច្នេះថា៖«ការទទួលបានមេដាយ៤គ្រឿងនេះ ដោយសារឆ្នាំនេះយើងបានធ្វើជាម្ចាស់ផ្ទះនៃការប្រកួតកីឡាប៉េតង់ជើងឯកពិភពលោក ហើយក្រោយពីចប់ការប្រកួតជើងឯកពិភពលោក យើងនៅតែបន្តហ្វឹកហាត់យ៉ាងខ្លាំងដើម្បីត្រៀមខ្លួនប្រកួតជើងឯកអាស៊ីនេះ»។
គួរបញ្ជាក់ថា ការប្រកួតកីឡាប៉េតង់ជើងឯកអាស៊ីលើកទី១៨នៅឡាវ កាលពីឆ្នាំ ២០១៤ កម្ពុជា ទទួលបានមេដាយមាស ៤គ្រឿង និងប្រាក់ ១គ្រឿង លើវិញ្ញាសាវាយពិន្ទុ, វិញ្ញាសាប្រកួតជាក្រុម(នារី-យុវជន) និងវិញ្ញាសាវាយពិន្ទុបុរស ខណៈថៃទទួលបានមេដាយមាសតែ១ប៉ុណ្ណោះ។
ប៉ុន្តែការប្រកួតកីឡាប៉េតង់ជើងឯកអាស៊ីលើកទី១៩ឆ្នាំ២០១៥លើកនេះ កម្ពុជា ទទួលបានមេដាយមាសតែ ១ ប៉ុណ្ណោះ ដែលរកបានដោយកីឡាករ សុខ ច័ន្ទមាន លើវិញ្ញាសាវាយយកពិន្ទុបុរស។ ដោយឡែកម្ចាស់ជើងឯកមេដាយមាសលំដាប់ពិភពលោក កីឡាការិនី កែ ឡេង មិនបានទទួលមេដាយមាសនោះទេ ទាំងលើវិញ្ញាសាវាយយកពិន្ទុ និងប្រកួតជាក្រុមនារី។ ដូច្នេះមានន័យថា កម្ពុជា បានបាត់បង់មេដាយមាសលើទឹកដីរបស់ខ្លួនរហូតដល់ទៅ ៣ គ្រឿង ខណៈថៃបានកើនមេដាយមាសចំនួន ៣ គ្រឿង។
ម្ចាស់មេដាយមាសលើវិញ្ញាសាវាយយកពិន្ទុបុរសកីឡាករ សុខ ច័ន្ទមាន បាននិយាយក្រោយបញ្ចប់ការប្រកួតថា «ការប្រកួតក្នុងស្រុកវាល្អ ដោយសារយើងមិនចាំបាច់ធ្វើដំណើរវែងឆ្ងាយ ទោះបីជាយ៉ាងនេះក្តីការប្រកួតយើងមិនអាចរំពឹងថាឈ្នះរហូតនោះទេ ធម្មតាការប្រកួតត្រូវតែមានអ្នកឈ្នះ និងអ្នកចាញ់ ប៉ុន្តែខ្ញុំទទួលស្គាល់ការលេងរបស់យើងមានការធ្លាក់ចុះបន្តិច»។
កីឡាកររូបនេះ បានសម្តែងអារម្មណ៍សប្បាយរីករាយក្នុងការទទួលបានមេដាយមាសរបស់ខ្លួន ដោយសារកាលពីការប្រកួតជើងឯកអាស៊ីលើកទី១៨ឆ្នាំ២០១៤នៅ ឡាវ ខ្លួនទទួលបានតែមេដាយប្រាក់ប៉ុណ្ណោះ។ កីឡាករ ច័ន្ធមាន ក៏បានសម្តែងការសោកសា្តយផងដែរចំពោះកីឡាករកីឡាការិនីកម្ពុជាដែលមិនបានមេដាយក្នុងការប្រកួតនេះ។ ហើយការទទួលបានមេដាយមាសនេះក៏ជួយលើកស្ទួយមុខមាត់របស់កម្ពុជាផងដែរក្នុងនាមជាម្ចាស់ផ្ទះ។
គួរបញ្ជាក់ផងដែរថា ការប្រកួតកីឡាប៉េតង់ជើងឯកអាស៊ីលើកទី១៩ ឆ្នាំ២០១៥ កម្ពុជាទទួលបានមេដាយសរុបចំនួន ៩គ្រឿង(មាស១ ប្រាក់៣ និងសំរឹទ្ធ៥) ឬឯ ថៃ ទទួលបាន ៧គ្រឿង(មាស៤ សំរឹទ្ធ៣) ខណៈឡាវ ទទួលបាន៣គ្រឿង(ប្រាក់១ និងសំរឹទ្ធ២) ចំណែក វៀតណាម ២ គ្រឿង(ប្រាក់១ និងសំរឹទ្ធ១) ខណៈ ចិន តៃប៉ិ មាស១គ្រឿង និងឥណ្ឌូណេស៊ី ទទួលបានមេដាយសំរឹទ្ធ១គ្រឿង។ ដោយឡែកប្រទេស ម៉ាឡេស៊ី ឥណ្ឌា ជប៉ុន ប្រ៊ុយណេ និងម៉ុងហ្គោលី មិនទទួលបានមេដាយនោះទេ។