កីឡាជាតិ
ជាតិ
បាល់ទាត់នារីពានរង្វាន់ជើងឯកជាតិរកឃើញ ២ ក្រុមទៅវគ្គផ្តាច់ព្រ័ត្រហើយ
×
ការប្រកួតបាល់ទាត់នារីដណ្ដើមពានរង្វាន់ជើងឯកជាតិឆ្នាំ២០១៥ បានរកឃើញ២ក្រុម ដើម្បីប្រកួតប្រជែងដណ្តើមជើងឯកវគ្គផ្តាច់ហើយ បន្ទាប់ពីការប្រកួតវគ្គពាក់កណ្ដាលផ្ដាច់ព្រ័ត្រ បានបញ្ចប់កាលពីថ្ងៃទី២១ ខែធ្នូ។
ក្រុមមន្ទីរអប់រំ យុវជន និងកីឡាខេត្តបាត់ដំបង នឹងប្រកួតប្រជែងជាមួយក្រុមមន្ទីរអប់រំយុវជន និងកីឡាខេត្តស្វាយរៀង នៅវគ្គផ្តាច់ព្រ័ត្រដើម្បីដណ្តើមជើងឯកពានរង្វាន់បាល់ទាត់ស្ត្រីថ្នាក់ជាតិឆ្នាំ២០១៥។ ការជួបគ្នាក្នុងវគ្គផ្តាច់ព្រ័ត្រនេះបន្ទាប់ពីក្រុមមន្ទីរអប់រំ យុវជន និងកីឡាខេត្តបាត់ដំបង បានយកឈ្នះក្រុមសមាគមកីឡាបាល់ទាត់ខេត្តសៀមរាប នៅវគ្គពាក់កណ្តាលផ្តាច់ព្រ័ត្រក្នុងលទ្ធ ៨ ទល់នឹង ០។ ខណៈក្រុមមន្ទីរអប់រំ យុវជន និងកីឡាខេត្តស្វាយរៀងបានបំបាក់ក្រុមមន្ទីរអប់រំ យុវជន និង កីឡាខេត្តកំពង់ឆ្នាំង ដែលជាក្រុមជាប់ចំណាត់ថ្នាក់លេខ១ក្នុងពូល B ក្នុងលទ្ធផល ៦ ទល់នឹង ០។
ដោយឡែក ក្រុមសមាគមកីឡាបាល់ទាត់ខេត្តសៀមរាប នឹងត្រូវប្រកួតប្រជែងជាមួយក្រុមមន្ទីរអប់រំ យុវជន និងកីឡាខេត្តកំពង់ឆ្នាំង ដើម្បីដណ្តើមចំណាត់ថ្នាក់លេខ ៣ និងលេខ ៤។
គួរបញ្ជាក់ថា ក្រុមដែលត្រូវជួបប្រកួតក្នុងវគ្គផ្តាច់ព្រ័ត្រ ដណ្តើមយកចំណាត់ថ្នាក់ជើងឯកនោះ កាលប្រកួតជម្រុះក្នុងពូល ក្រុមមន្ទីរអប់រំ យុវជន និង កីឡាខេត្តបាត់ដំបង បានយកឈ្នះក្រុមមន្ទីរអប់រំ យុវជន និង កីឡាខេត្តស្វាយរៀង ក្នុងលទ្ធផល ៣ ទល់នឹង ០។
© រក្សាសិទ្ធិដោយ thmeythmey.com