កីឡាជាតិ
ជាតិ
កីឡាករក្នុងលីករួមគ្នាលេងក្នុងព្រឹត្តិការណ៍សប្បុរសធម៌ Football for Kids ជាលើកដំបូង
× ការប្រកួតបាល់ទាត់សប្បុរសធម៌ដើម្បីកុមារ (Football for Kids) ក្លាយជាព្រឹត្តិការណ៍លើកដំបូងដែលផ្តល់ឱកាសដល់កីឡាករបាល់ទាត់អាជីព កម្ពុជា និងជប៉ុន បង្ហាញជំនាញ និងសកម្មភាពរបស់ខ្លួនដើម្បីគោលដៅសប្បុរសធម៌។ ក្រោមគំនិតផ្តួចផ្តើមរបស់គម្រោង KID Project រួមជាមួយដៃគូឧបត្ថម្ភ និងសហការផ្សេងទៀត ព្រឹត្តិការណ៍ Football for Kids ប្រព្រឹត្តទៅនៅវេលាម៉ោង៣រសៀលថ្ងៃអាទិត្យ ទី២៧ ខែធ្នូ ឆ្នាំ២០១៥ នៅលើទីលានកងយោធពលខេមរភូមិន្ទ (ស្តាតចាស់)។
«ក្រៅពីការប្រើប្រាស់ សមត្ថភាពប្រកួតប្រជែងគ្នាដើម្បីដណ្តើមពាន និងប្រាក់រង្វាន់ យើងចង់ឃើញកីឡាករខ្មែរ មានឱកាសប្រើប្រាស់ជំនាញរបស់ខ្លួនដើម្បីបុព្វហេតុសប្បុរសធម៌»។ នេះជាការលើកឡើងរបស់លោក សៀក វិសាល និស្សិតដែលរៀននៅវិទ្យាស្ថាន Cam Ed និងជាប្រធានគម្រោង KID Project ។
លោក វិសាល បានបញ្ជាក់ប្រាប់សារព័ត៌មានថ្មីៗតាមទូរសព្ទថា Football for Kids លេចជារូបរាងឡើង បន្ទាប់ពីលោក និងកញ្ញា រាម មុនីដែនដូណា ដែលជាអនុប្រធាន KID Project បានពិភាក្សាជាមួយលោក ភា សុភ័ត្រា ដែលជាគ្រូបង្វឹកម្នាក់កម្រិត A-License ។ «Beckham ឬ Messi ជាដើម បានប្រើប្រាស់ការប្រកួតកីឡាបាល់ទាត់ដើម្បីសប្បុរសធម៌ ដូច្នេះខ្ញុំជឿជាក់ថា គួច សុគម្ភៈ, ចាន់ ឫទ្ធី, ឈិន ឈឿន, ស៊ូ យ៉ាទី និងកីឡាករខ្មែរផ្សេងទៀត ក៏អាចមានឱកាសជួយដល់ជាតិរបស់ខ្លួនផងដែរ»។ នេះបើតាមការអះអាងរបស់លោក សៀក វិសាល។
ការប្រកួតបាល់ទាត់ សប្បុរសធម៌ដើម្បីកុមារ (Football for Kids) នាវេលាម៉ោង៣រសៀលថ្ងៃទី២៧ ខែធ្នូ ឆ្នាំ២០១៥ នៅកីឡដ្ឋានស្តាតចាស់ គឺជាជំនួបរវាងក្រុម Cambodian ALL Stars និងក្រុម Japanese ALL Stars។ Cambodian ALL Stars ប្រមូលផ្តុំទៅដោយកីឡាករកម្ពុជាឆ្នើមដែលលេងក្នុងក្របខណ្ឌកំពូល មិត្តហ្វូនខេមបូឌានលីក ដោយស្ថិតក្រោមការដឹកនាំបង្វឹករបស់លោក ភា សុភ័ត្រា ខណៈក្រុម Japanese ALL Stars មានការចូលរួមពីកីឡាករ មន្ត្រី និងអ្នកជំនាញបាល់ទាត់ជនជាតិជប៉ុននៅកម្ពុជា។
លោក សៀក វិសាល បានអះអាងថា ក្រុមលោកក៏បានអញ្ជើញកីឡាករអាហ្វ្រិកផងដែរ ប៉ុន្តែមិនមានការឆ្លើយ ដូច្នេះទើបសម្រេចឲ្យមានជំនួបតែរវាងក្រុមកម្ពុជា និងជប៉ុន។ លោកបានបន្ថែមថា៖ «ថ្វីត្បិតតែក្លិបមួយចំនួនមានការមមាញឹកខ្លាំង ជាពិសេសក្លិបបឹងកេតអង្គរ ប៉ុន្តែថ្នាក់ដឹកនាំ និងកីឡាករ បង្ហាញការគាំទ្រយ៉ាងពេញទំហឹងចំពោះព្រឹត្តិការណ៍ Football for Kids នេះ»។
ទឹកប្រាក់ដែលទទួលបានពីការលក់សំបុត្រ នឹងបែងចែកជាពីរផ្នែក ដោយមួយផ្នែកយកទៅបរិច្ចាគដល់ការសាងសង់ ការតុបតែង និងសម្ភារសម្រាប់បណ្ណាល័យមួយនៅសាលារៀនមួយក្នុងខេត្តកំពត ហើយមួយផ្នែកទៀត នឹងត្រៀមទុកសម្រាប់ជួយដល់កុមារនៅតាមបណ្តាខេត្តផ្សេងទៀត។
អ្នករៀបចំ ការប្រកួតបាល់ទាត់សប្បុរសធម៌ដើម្បីកុមារ (Football for Kids) រំពឹងថានឹងការចូលរួមគាំទ្រច្រើនពីសំណាក់ប្រជាពលរដ្ឋកម្ពុជា ជាពិសេសអ្នកស្រឡាញ់កីឡាបាល់ទាត់។ លោក វិសាល បានគូសបញ្ជាក់ថា «ខ្ញុំមិនហ៊ានរំពឹងខ្ពស់នោះទេ ប៉ុន្តែហោចណាស់ក៏អាចឈានដល់៧០ភាគរយផងដែរ ពីព្រោះព្រឹត្តិការណ៍នេះ មិនត្រឹមតែដើម្បីលើកស្ទួយវិស័យកីឡាបាល់ទាត់ប៉ុណ្ណោះទេ តែវាជាចំណែកមួយដើម្បីសកម្មភាពសប្បុរសធម៌ផងដែរ»។
សមាសភាព កីឡាករកម្ពុជាដែលស្ម័គ្រចិត្តចូលលេងក្នុងព្រឹត្តិការណ៍ Football for Kids រួមមានដូចជា ស៊ូ យ៉ាទី, ក្រូច ម៉ុល, នេន សុធារ័ត្ន, អូម ថាវរៈ, ប្រាក់ មុន្នីឧត្តម, ច្រឹង ពលរដ្ឋ, កែវ សុខងន, គួច សុគម្ភៈ, សួង វីរៈ, ណុប តុលា, សំអឿន ពិដោរ, សុក ច័ន្ទរស្មី, ឈុន សុធារ័ត្ន, ឈិន ឈឿន, ឃឹម បូរី, អ៊ុំ សេរីរ័ត្ន, ពៅ ភារិទ្ធ, ហុង ផេង, នួន បូរី។
សមាសភាព កីឡាករក្រុមជប៉ុនរួមមាន Yasuyuki Yoshida, Marin Takano, Takuya Watanabe, Taku Yanagidate, Kazuaki Ban, Takahito Ota, Shinya Yamamoto, Kazuki Tatsuta, Masahiro Fukasawa, Ryuto Kanemitsu, Junichi Ozawa, Naoki Nishiyama, Tomoyuki Sadakuni, Futa Hondo, Akira Higashiyama, Tatsuya Suzuki, Ippei Shimizu រួមទាំង Tetsu Karakida និង Taiichiro Saito ដែលធ្វើជាកីឡាករផង គ្រូបង្វឹកផង៕
ប្រភពរូបថតទាំងអស់៖ ហ្វេសប៊ុក KID Project
Tag:
បាល់ទាត់
Football for Kids
© រក្សាសិទ្ធិដោយ thmeythmey.com