កីឡាជាតិ
ជាតិ
Football for Kids ទទួលបានថវិកា៤០០ដុល្លារអាមេរិក និងជាង២លានរៀល
× ព្រឹត្តិការណ៍ប្រកួតកីឡាបាល់ទាត់សប្បុរសធម៌ដើម្បីកុមារ (Football for Kids) នៅកីឡដ្ឋានកងយោធពលខេមរភូមិន្ទ កាលពីរសៀលថ្ងៃអាទិត្យ រកបានថវិកា៤០០ដុល្លារអាមេរិក និងជាង២,២លានរៀល តាមរយៈការលក់សំបុត្រ និងជំនួយសប្បុរសធម៌។
ក្រោមគំនិតផ្តួចផ្តើមរបស់គម្រោង KID Project រួមជាមួយដៃគូឧបត្ថម្ភ និងសហការផ្សេងទៀត ព្រឹត្តិការណ៍ Football for Kids បានទាក់ទាញអ្នកទស្សនាប្រមាណជាង៨០០នាក់ ក្នុងនោះមានរដ្ឋមន្ត្រីក្រសួងអប់រំ យុវជន និងកីឡាផងដែរ។
ជំនួបរវាងក្រុម Cambodian ALL Stars និងក្រុម Japanese ALL Stars បានបញ្ចប់ក្នុងលទ្ធផលស្មើ ១-១ ដោយខ្សែបម្រើក្លិបស៊ីម៉ាក Takahito Ota រកបានគ្រាប់បាល់នាំមុខឲ្យក្រុមជប៉ុននៅតង់ទី១ ហើយខ្សែប្រយុទ្ធភ្នំពេញក្រោន កែវ សុខងន វាយបកតាមស្មើសម្រាប់ក្រុមកម្ពុជានៅក្នុងតង់ទី២ ។
Cambodian ALL Stars ប្រមូលផ្តុំទៅដោយកីឡាករកម្ពុជាឆ្នើមដែលលេងក្នុងក្របខណ្ឌកំពូលមិត្តហ្វូនខេមបូឌានលីក ដោយស្ថិតក្រោមការដឹកនាំបង្វឹករបស់លោក ភា សុភ័ត្រា មានឱកាសស៊ុតបាល់ប៉េណាល់ទីចំនួន២លើក ប៉ុន្តែធ្វើមិនបានសម្រេច ខណៈក្រុម Japanese ALL Stars មានការចូលរួមពីកីឡាករ មន្ត្រី និងអ្នកជំនាញបាល់ទាត់ជនជាតិជប៉ុននៅកម្ពុជា ក៏បានបង្ហាញសមត្ថភាពដ៏ទាក់ទាញផងដែរ។
លោក សៀក វិសាល និស្សិតដែលរៀននៅវិទ្យាស្ថាន Cam Ed និងជាប្រធានគម្រោង KID Project បានបញ្ជាក់ប្រាប់សារព័ត៌មានថ្មីៗ នៅមុនការប្រកួតថា ទឹកប្រាក់ដែលទទួលបានពីការលក់សំបុត្រ នឹងបែងចែកជាពីរផ្នែក ដោយមួយផ្នែកយកទៅបរិច្ចាគដល់ការសាងសង់ ការតុបតែង និងសម្ភារសម្រាប់បណ្ណាល័យមួយនៅសាលារៀនមួយក្នុងខេត្តកំពត ហើយមួយផ្នែកទៀត នឹងត្រៀមទុកសម្រាប់ជួយដល់កុមារនៅតាមបណ្តាខេត្តផ្សេងទៀត៕
ប្រភពរូបថត៖ KID Project
Tag:
បាល់ទាត់
Football for Kids
© រក្សាសិទ្ធិដោយ thmeythmey.com