អន្តរជាតិ
ចិន ក្តៅស្លឹកត្រចៀកក្រោយពលរដ្ឋហ្វីលីពីនទៅបាតុកម្មដល់តំបន់ជម្លោះសមុទ្រចិនខាងត្បូង
× រដ្ឋាភិបាលក្រុងប៉េកាំង កំពុងក្តៅក្រហាយខ្លាំង បន្ទាប់ពីពលរដ្ឋហ្វីលីពីន បានចូលទៅក្នុងតំបន់ជម្លោះ សមុទ្រចិនខាងត្បូង ដែលចិនតែងតែអះអាងថាខ្លួនជាម្ចាស់កម្មសិទិ្ធ។ រដ្ឋាភិបាលក្រុងប៉េកាំង បាន ទទូចឲ្យហ្វីលីពីន បញ្ឈប់បង្កបញ្ហានៅក្នុងតំបន់ជម្លោះទៀតផង។
នៅថ្ងៃច័ន្ទ ទី២៨ ធ្នូនេះ អ្នកនាំពាក្យក្រសួងការបរទេសចិន លោក លូ កាំង ( Lu Kang ) បានចេញមុខ ប្រតិកម្មនឹងពលរដ្ឋហ្វីលីពីនដែលបានចូលទៅក្នុងតំបន់កោះស្ព្រាតលីដែលចិនបានអះអាងថាខ្លួន ម្ចាស់កម្មសិទ្ធិ។ នេះបើយោងតាមសារព័ត៌មាន Channel News Asia។
សូមរម្លឹកផងដែរថា កាលពីថ្ងៃសៅរ៍ ទី២៦ ធ្នូ កន្លងទៅ ក្រុមបាតុករហ្វីលីពីនប្រមាណ៥០នាក់ ភាគច្រើនជានិស្សិត បានទៅដល់កោះ Pagasa ដែលស្ថិតនៅក្នុងបណ្តុំកោះ Spratly ដើម្បីប្រឆាំងការបំពានរបស់រដ្ឋាភិបាលចិនលើតំបន់សេដ្ឋកិច្ចផ្តាច់មុខរបស់ហ្វីលីពីនក្នុងតំបន់ជម្លោះសមុទ្រចិនខាងត្បូង។ ក្រុមបាតុករបានអះអាងថា ការទៅដល់តំបន់ដែលកំពុងតែមានជម្លោះនេះ គឺជានិមិត្តសញ្ញាមួយ នៃការប្រឆាំងការបំពានរបស់រដ្ឋាភិបាលក្រុងប៉េកាំង។
ជុំវិញបញ្ហានេះ លោក លូ កាំង អះអាងថា ចិន ពិតសោកស្តាយចំពោះសកម្មភាពនៃពលរដ្ឋហ្វីលីពីន នៅក្នុងតំបន់ជម្លោះ។ លោក បានបញ្ជាក់ជាថ្មីថា ចិន មិនដែលមានជម្លោះនៅក្នុងតំបន់កោះស្ព្រាតលី នោះទេ។
បន្ថែមពីនេះ លោក លូ កាំង ក៏បានទទូចឲ្យហ្វីលីពីន ដកចេញរាល់សំណង់ទាំងអស់ពីកោះស្ព្រាតលី ដោយចិនបានចោទពលរដ្ឋហ្វីលីពីន ថាចូលទៅកាន់កាប់ដោយខុសច្បាប់។ លោក ថា សកម្មភាពនេះនឹងធ្វើឲ្យប៉ះពាល់ដល់សន្តិភាព និងស្ថិរភាពនៅក្នុងតំបន់ និងទំនាក់ទំនងរវាងចិន និងហ្វីលីពីនផងដែរ ។
សូមបញ្ជាក់ផងដែរថា ជម្លោះសមុទ្រចិនខាងត្បូង គឺជាជម្លោះដែនអធិបតេយ្យរវាងរដ្ឋអាស៊ានបួន ដូចជាព្រុយណេ ម៉ាឡេស៊ី ហ្វីលីពីន និងវៀតណាមជាមួយនឹងចិន។ ចិន គឺជាភាគីតែមួយគត់ដែល បានទាមទារស្ទើរតែតំបន់ទាំងស្រុងនៃតំបន់ជម្លោះ។ ហើយការទាមទារនោះ បានបំពានទៅនឹងតំបន់ សេដ្ឋកិច្ចផ្តាច់មុខរបស់រដ្ឋអាស៊ាន។ ក្នុងចំណោមរដ្ឋអាស៊ានទាំងបួន មានតែហ្វីលីពីនប៉ុណ្ណោះ ដែលហ៊ានចេញមុខតវ៉ាប្រឆាំងជាមួយចិនតាមរយៈភាពការទូត និងការពង្រឹងវិស័យយោធា។
កន្លងមកចិន បានប្រើប្រាស់ភស្តុតាងប្រវត្តិសាស្ត្រក្នុងការទាមទារលើតំបន់ជម្លោះ។ ការសម្អាងនេះ ហើយដែលធ្វើឲ្យចិន តែងតែចាត់ទុកតំបន់ជម្លោះសមុទ្រចិនខាងត្បូងស្ទើរតែទាំងស្រុងថាស្ថិតនៅក្នុង កម្មសិទ្ធិរបស់ខ្លួន។ តែរដ្ឋពាក់ព័ន្ធនៃអាស៊ានវិញ បានទាមទារតំបន់សេដ្ឋកិច្ចផ្តាច់មុខនៃតំបន់ជម្លោះ សមុទ្រចិនខាងត្បូង តាមអនុសញ្ញាស្តីពីច្បាប់សមុទ្រ ដែលចិន ចាត់ទុកថាបានរំលោភនឹងការទាមទារ របស់ខ្លួន៕
© រក្សាសិទ្ធិដោយ thmeythmey.com