អន្តរជាតិ
UN សរសើរកូរ៉េខាងត្បូង និងជប៉ុនចេះស្រុះស្រួលគ្នារកដំណោះស្រាយទាសភាពផ្លូវភេទ
× អគ្គលេខាធិការអង្គការសហប្រជាជាតិលោក បាន គីមូន (Ban Ki-Moon) បានសាទរមេដឹកនាំកូរ៉េខាង ត្បូង និងជប៉ុនដែលអាចស្រុះស្រួលគ្នាក្នុងការទៅសម្រេចបានកិច្ចព្រមព្រៀងមួយដ៏ចម្រូងចម្រាសអស់ រយៈពេលជាច្រើនទសវត្សរ៍។ កិច្ចព្រមព្រៀងនោះ គឺការផ្តល់ការអភ័យទោសចំពោះស្ត្រីជនជាតិកូរ៉េខាង ត្បូងដែលត្រូវបង្ខំធ្វើទាសករផ្លូវភេទរបស់កងទ័ពជប៉ុនក្នុងសម័យសង្គ្រាមលោកលើកទី២។
ថ្ងៃទី២៨ ខែធ្នូ ម្សិលមិញ អគ្គលេខាធិការអង្គការសហប្រជាជាតិ លោក បាន គីមូន បានស្វាគមន៍កិច្ច ព្រមព្រៀងដែលប្រកាសដោយរដ្ឋមន្ត្រីការបរទេសជប៉ុន និងកូរ៉េខាងត្បូងក្នុងក្រុងសេអ៊ូលស្តីពីការ ប៉ះប៉ូវស្ត្រីជនជាតិកូរ៉េខាងត្បូងដែលទាសភាពផ្លូវភេទដោយកងទ័ពជប៉ុន។
លោក បាន គីមូន អតីតរដ្ឋមន្ត្រីការបរទេសកូរ៉េខាងត្បូង បានសរសើរចំពោះភាពដឹកនាំ និងចក្ខុវិស័យ វែងឆ្ងាយរបស់លោកស្រីប្រធានាធិបតីកូរ៉េខាងត្បូងផាក ហ្គនហេ (Park Geun Hye) និងលោកនាយករដ្ឋមន្ត្រីជប៉ុនស្ហ៊ិនហ្សូ អាបេ (Shinzo Abe) ក្នុងការធ្វើឲ្យមានភាពល្អប្រសើរនៃទំនាក់ទំនងទ្វេភាគី។
សូមរម្លឹកផងដែរថា ទោះបីជាកូរ៉ខាងត្បូង និងជប៉ុន ជាប្រទេសជិតខាងគ្នាក៏ដោយ រដ្ឋទាំងពីរ មិនសូវ មានទំនាក់ទំនងល្អនឹងគ្នាប៉ុន្មាននោះទេ គិតចាប់ពីសង្គ្រាមលោកលើកទី២។ នោះក៏ព្រោះតែក្នុងអំឡុង ពេលសង្គ្រាមលោកលើកទី២ មានស្ត្រីជនជាតិកូរ៉េរាប់ពាន់នាក់បានក្លាយជាទាសករផ្លូវភេទដោយសារការបង្ខំពីកងទ័ពជប៉ុន។
ក្រោមកិច្ចព្រមព្រៀងថ្ងៃចន្ទ ជប៉ុននឹងផ្តល់សំណងជាទឹកប្រាក់ ១ពាន់លានយ៉េន ដែលស្មើ ៨.៧ លានដុល្លារសម្រាប់ស្រី្តកូរ៉េខាងត្បូងដែលត្រូវទាហានជប៉ុនធ្វើទុកបុកម្នេញបង្ខំឲ្យធ្វើជាទាសករផ្លូវភេទសម័យសង្គ្រាមលោកលើកទីនោះ។តាមពិតទៅស្ត្រីដែលត្រូវទាហានជប៉ុនបង្ខំឲ្យបម្រើជាទាសករផ្លូវភេទមកដល់ពេលបច្ចុប្បន្ននេះចាស់ៗណាស់ទៅហើយ ហើយមានអ្នកស្លាប់បាត់បង់ជីវិតច្រើនដែរ។ ដូច្នេះហើយទើបបានជារដ្ឋាភិបាលកូរ៉េខាងត្បូងប្រឹងប្រែងដើម្បីឲ្យការសម្រេចសងសំណងជំងឺចិត្តនេះឆាប់កើតឡើង។
គេរំពឹងថា កិច្ចព្រមព្រៀងប្រវត្តិសាស្ត្រនិងសកម្មភាពទន់ភ្លន់របស់ភាគីជប៉ុនប្រហែលជានឹងជួយដល់ការស្តារឡើងវិញនូវចំណងការទូតរវាងជប៉ុនជាមួយកូរ៉េខាងត្បូងផងដែរ។ កន្លងមកបញ្ហាប្រវត្តិសាស្ត្រនេះក្លាយជាបញ្ហាចម្រូងចម្រាសនិងក្តៅបំផុតសម្រាប់មិត្តជិតខាងទាំងពីរនេះ។ ជប៉ុនមិនដែរព្រមបន្ទន់ជំហរដោយព្រមទទួលស្គាល់កំហុសឆ្គងខ្លួនសម័យសង្គ្រាមលោកលើកទី២ ហើយនាយរដ្ឋមន្ត្រីអាបេ ក៏ឆ្លៀតបង្ករឿងក្តៅក្រហាយដល់ចិន និងកូរ៉េខាងត្បូងដោយទៅទស្សនកិច្ចនៅទីសក្ការៈ Yasukuni កាលពីឆ្នាំ២០១៣ ៕
© រក្សាសិទ្ធិដោយ thmeythmey.com