អន្តរជាតិ
មន្ត្រីជំនិតលោកគីម ជុងអ៊ុន ស្លាប់ក្នុងគ្រោះថ្នាក់ចរាចរណ៍
× លោក Kim Yang-Gon មនុស្សជំនិតរបស់មេដឹកនាំកូរ៉េខាងជើង បានបាត់បង់ជីវិតក្នុងគ្រោះថ្នាក់ចរាចរណ៍។ នេះបើយោងសារព័ត៌មានរដ្ឋកូរ៉េខាងជើង KCNA ចុះផ្សាយនៅថ្ងៃទី៣០ ខែធ្នូនេះ។
មន្ត្រីជាន់ខ្ពស់របស់កូរ៉េខាងជើងលោក Kim Yang-Gon ជាមនុស្សជំនិតប្រមុខរដ្ឋកូរ៉េខាងជើងបានបាត់បង់ជីវិតក្នុងគ្រោះថ្នាក់ចរាចរណ៍ ដែលបានកើតឡើងនៅថ្ងៃទី២៩ ខែធ្នូ។ ប៉ុន្តែសារព័ត៌មាន KCNA មិនបានផ្ដល់ព័ត៌មានជាក់លាក់ពីហេតុការណ៍នេះទេ។ ពិធីបុណ្យសពផ្លូវការរបស់លោក Kim Yang-Gon នឹងត្រូវធ្វើនៅថ្ងៃទី៣១ ខែធ្នូ ហើយមេដឹកនាំវ័យក្មេងលោក គីម ជុងអ៊ុន នឹងចូលរួមក្នុងកម្មវិធីនេះ។
លោក Kim Yang-Gon ជាមនុស្សជំនិតម្នាក់របស់មេដឹកនាំកូរ៉េខាងជើង និងមានតួនាទីជាលេខាបក្សពលករ ដែលកំពុងគ្រប់គ្រងប្រទេស។ ក្រៅពីនេះលោក Kim Yang-Gon ក៏មានតួនាទីជាប្រធានរណសិរ្សរួបរួម ដែលទទួលបន្ទុកការងារជាមួយភាគីកូរ៉េខាងត្បូង។ លោក Kim ក៏បានចូលរួមក្នុងការចរចាជាមួយកូរ៉េខាងត្បូងកាលពីខែសីហា ក្រោយការប៉ះទង្គិចគ្នាមួយប្រាវ ដែលធ្វើឲ្យកម្ដៅជម្លោះកើនឡើងខ្លាំង។
ជាមួយគ្នានេះ KCNA បានពិពណ៌នាថា ការស្លាប់របស់លោក Kim គឺជាការបាត់បង់យ៉ាងធំសម្រាប់ប្រជាជនកូរ៉េខាងជើង និងបានលើកសរសើរចំពោះការងារដែលលោកបានធ្វើក្នុងការរួបរួមកូរ៉េទាំងពីរ។ លើសពីនេះ បុរសវ័យ៧៣ឆ្នាំរូបនេះ ក៏ជាអ្នកផ្ដល់យោបល់ដល់មេដឹកនាំកំពូលកូរ៉េខាងជើងសម្រាប់ការងារការបរទេស ក៏ដូចជានយោបាយនៅឧបទ្វីបកូរ៉េផងដែរ។
អ្វីដែលគួរឲ្យកត់សម្គាល់នោះ លោក Kim Yang-gon បានដើរតួនាទីយ៉ាងសំខាន់ ក្នុងការរៀបចំជំនួបកំពូលរវាងអតីតមេដឹកនាំកូរ៉េខាងជើងលោក គីម ជុងអ៊ីល និងអតីតប្រធានាធីបតីកូរ៉េខាងត្បូងលោក រ៉ូ ម៉ូយុន (Roh Moo-Hyun) នៅឆ្នាំ២០០៧។ លោក Kim គឺជាមន្ត្រីជាន់ខ្ពស់កូរ៉េខាងជើងតែម្នាក់គត់ ដែលចូលរួមក្នុងជំនួបនោះ ដែលនេះ មានន័យថា ការស្លាប់របស់លោក Kim Yang-gon ពិតជាមានផលប៉ះពាល់ខ្លាំង ដល់ទំនាក់ទំនង និងការរួបរួមកូរ៉េទាំងពីរ។ លោក Kim ជាមនុស្សម្នាក់ ដែលមានបទពិសោធន៍ច្រើន ក្នុងទំនាក់ទំនងជាមួយកូរ៉េខាងត្បូង ហើយប្រហែលជាគ្មាននរណា អាចជំនួសតំណែងគាត់ ក្នុងការផ្ដល់យោបល់ក្នុងរឿងនេះ ដល់លោក គីម ជុងអ៊ុនឡើយ៕
Tag:
គីម ជុងអ៊ុន
កូរ៉េខាងជើង
© រក្សាសិទ្ធិដោយ thmeythmey.com