ជាតិ
នយោបាយជាតិ
ព្រះអង្គ ប៊ុត ប៊ុនតិញ ចង់ឲ្យលោក ខឹម វាសនា ឡើងតុមូល ជជែកជាមួយព្រះសង្ឃ
× ព្រះតេជគុណ ប៊ុត ប៊ុនតិញ ស្ថាបនិកបណ្តាញព្រះសង្ឃឯករាជ្យ ដើម្បីយុត្តិធម៌សង្គម ស្នើឲ្យក្រសួងធម្មការ និងសាសនា រួមទាំងមន្ត្រីសង្ឃជាន់ខ្ពស់ អញ្ជើញលោក ខឹម វាសនា ប្រធានគណបក្សសម្ព័ន្ធដើម្បីប្រជាធិបតេយ្យ (LDP) ឡើងតុមូល ដើម្បីសួរដេញដោល ជុំវិញចលនានយោបាយរបស់លោក ដែលត្រូវបានចោទថាជាសកម្មភាពបំផ្លាញព្រះពុទ្ធសាសនា។ ព្រះអង្គមានសង្ឃដីកាបែបនេះ ក្រោយពីបានស្តាប់លោក ខឹម វាសនា ប្រតិកម្មចំពោះព្រះសង្ឃ ដែលចោទថា លោកមានចេតនាបំផ្លាញព្រះពុទ្ធសាសនា ដោយគ្មានវត្តមានរបស់ខ្លួន ហើយមានបំណងចង់ចូលខ្លួនទៅបកស្រាយពីអ្វីដែលោកបានធ្វើកន្លងមក។
ថ្លែងក្នុងអនុសំវច្ឆរមហាសន្និបាតលើកទី២៤ នាថ្ងៃទី៣០ខែធ្នូ ព្រះអង្គ ប៊ុត ប៊ុនទិញ បានយល់ស្របនូវសំណើរបស់ លោក ខឹម វាសនា ដែលចង់ចូលខ្លួនមកបំភ្លឺ ជុំវិញការចោទប្រកាន់ថា លោកចង់ផ្តួលរំលំព្រះពុទ្ធសាសនា។
ព្រះអង្គបានបញ្ជាក់ថា៖«រដ្ឋមន្ត្រី គួររៀបចំគណៈកម្មការមួយ ហើយហៅលោក ខឹម វាសនា មកសួរដេញដោល ព្រោះគាត់ថា បើគណៈសង្ឃនិងក្រសួងធម្មការ ហ៊ានហៅគាត់នៅទីណាក៏បាន ក៏គាត់មកដែរ។ ឥឡូវឲ្យគាត់ត្រៀមខ្លួនឡើងមក ព្រះសង្ឃយើងពេញប្រទេសចាំសួរគាត់»។
មិនមែនត្រឹមតែព្រះអង្គ ប៊ុត ប៊ុនតិញ មួយអង្គទេ សូម្បីតែព្រះសង្ឃមួយចំនួនទៀត ក៏សម្តែងការគាំទ្រដែរ ចំពោះការអនុញ្ញាតឲ្យប្រមុខបក្សរូបនេះ ចូលខ្លួនមកបកស្រាយ។ ប៉ុន្តែ ការលើកឡើងខាងលើនេះ ក៏មានព្រះសង្ឃផ្សេងទៀត បដិសេធដែរ ដោយហេតុផលថា ករណីរបស់ លោក ខឹម វាសនា គួរធ្វើទៅតាមវិធានការនៃច្បាប់ទើបប្រសើរជាង។ យ៉ាងណាក៏ដោយ សេចក្តីសម្រេចចុងក្រោយ ដែលត្រូវចាត់វិធានការចំពោះលោក ខឹម វាសនា នោះ នឹងត្រូវបានប្រកាសនៅពេលបិទអង្គប្រជុំមន្ត្រីសង្ឃទូទាំងប្រទេស នារសៀលថ្ងៃទី៣០ ខែធ្នូនេះ។
កាលពីថ្ងៃទី២៩ ខែធ្នូ លោក ខឹម វាសនា បានសម្តែងការមិនពេញចិត្ត ចំពោះមន្ត្រីសង្ឃទូទាំងប្រទេស ដែលលើកករណីររបស់លោកមកពិភាក្សា ដោយគ្មានវត្តមានរបស់ខ្លួន និងចោទប្រកាន់ថាលោក ចង់ផ្តួលរំលំព្រះពុទ្ធសាសនាថែមទៀត។
ប្រធានបក្សរូបនេះ បានមានប្រសាសន៍ថា ប្រសិនបើព្រះសង្ឃច្បាស់ថា លោកពិតជាចង់បំផ្លាញព្រះពុទ្ធសាសនាមែន គួរតែអញ្ជើញលោកឲ្យចូលរួម ដើម្បីវែកញែក និងទទួលកំហុស។
លោក ខឹម វាសនា បានបញ្ជាក់បែបនេះថា៖«ប្រសិនបើព្រះសង្ឃច្បាស់ក្នុងចិត្តថា អ្វីដែលខ្ញុំនិយាយក្នុងវត្ថុបំណងដើម្បីផ្តួលរំលំព្រះពុទ្ធសាសនាមែន អ៊ីចឹងព្រះសង្ឃគួរតែហៅខ្ញុំទៅជជែកវែកញែក និងទទួលកំហុសលើអ្វីដែលខ្ញុំបាននិយាយ នៅចំពោះមុខព្រះសង្ឃទាំងអស់អង្គ»៕
Tag:
ព្រះសង្ឃ
ខឹម វាសនា
© រក្សាសិទ្ធិដោយ thmeythmey.com