អន្តរជាតិ
វៀតណាមនឹងសាកល្បងយន្តហោះឈ្លបយកការណ៍នៅសមុទ្រចិនខាងត្បូង
× រដ្ឋាភិបាលក្រុងហាណូយបានបញ្ចេញយន្តហោះឈ្លបយកការណ៍គ្មានអ្នកបើកសម្រាប់ល្បាតនៅសមុទ្រចិនខាងត្បូង។ យន្តហោះគ្មានអ្នកបើកនេះជាយន្តហោះផលិតក្នុងស្រុក ហើយវានឹងត្រូវបង្ហោះសាកល្បងនៅឆ្នាំ ២០១៦ខាងមុខនេះ។
ចុងឆ្នាំ ២០១៥ នេះរដ្ឋាភិបាលវៀតណាមបានបញ្ចេញយន្តហោះគ្មានអ្នកបើកឈ្លបយកការណ៍របស់ខ្លួនដែលប្រើប្រាស់សម្រាប់ល្បាតនៅសមុទ្រចិនខាងត្បូង។ យន្តហោះនេះជាផលិតផលក្នុងស្រុក ហើយវាជាសមិទ្ធផលនៃគម្រោងរួមមួយរវាងស្ថាប័នវិទ្យាសាស្ត្រនិងឧស្សាហកម្មវៀតណាម និងក្រសួង សន្តិសុខសាធារណៈ។
បើតាមរបាយការណ៍របស់ប្រព័ន្ធផ្សព្វផ្សាយវៀតណាម យន្តហោះគម្រូរបស់វៀតណាមត្រូវបានគេផលិតរួចរាល់នៅក្នុងខែវិច្ឆិកា ហើយរដ្ឋាភិបាលក្រុងហាណូយនឹងរៀបចំបង្ហោះសាកល្បងយន្តហោះរបស់ខ្លួននៅរដូវក្តៅឆ្នាំក្រោយនេះ។ គេមិនបានដឹងច្បាស់ថាវៀតណាមផលិតបានសម្រេចយន្តហោះគ្មានអ្នកបើកប៉ុន្មានគ្រឿងឡើយ ប៉ុន្តែយន្តហោះម៉ាកនេះអាចប្រើប្រាស់បានទាំងកិច្ចការស៊ីវិលនិងយោធា ហើយវាអាចហោះបានរយៈកម្ពស់៤គីឡូម៉ែត្រ។
ការផលិតបានយន្តហោះគ្មានអ្នកបើកសម្រាប់ប្រើប្រាស់ឈ្លបយកការណ៍នៅតំបន់ជម្លោះសមុទ្រចិនខាងត្បូងនេះជាជោគជ័យធំសម្រាប់វៀតណាម ហើយវៀតណាមនឹងប្រើប្រាស់សម្ភារៈទាំងនេះដើម្បីសម្រួលដល់ការប្រមែរប្រមូលរបាយការណ៍ចារកម្មនិងល្បាតនៅតំបន់ជម្លោះសមុទ្រចិនខាងត្បូងនៅពេលខាងមុខនេះ។
រយៈពេលប៉ុន្មានឆ្នាំចុងក្រោយនេះ វៀតណាមហាក់បីដូចជាព្យាយាមពង្រឹងអំណាចយោធារបស់ខ្លួនកាន់តែខ្លាំង តាមរយៈការផលិតអាវុធផង នាំអាវុធចូលផង។ ហើយប្រទេសនេះក៏ប្រឹងអែបមហាអំណាចធំៗដើម្បីទុកជាខ្នងបង្អែកដើម្បីប្រឆាំងក្រុងប៉េកាំងផងដែរ។
ក្នុងឆ្នាំ ២០១៤ វៀតណាមបាននាំចូលនាវាមុជទឹកជាច្រើនគ្រឿងពីរុស្ស៊ីដើម្បីពង្រឹងយុទ្ធសាស្ត្រការពារដែនសមុទ្រ។ ហើយរដ្ឋាភិបាលនេះក៏បញ្ជាទិញយន្តហោះគ្មានអ្នកបើកជាច្រើនគឿងពីប្រទេសបេឡារ៉ុស។ ហើយចន្លោះឆ្នាំ ២០១៤ ដល់ ២០១៥ គេក៏ឃើញវៀតណាមបញ្ជាទិញយន្តហោះគ្មានអ្នកបើកជាច្រើនគ្រឿងផងដែរពីប្រទេសអ៊ីស្រាអែលដែរ៕
© រក្សាសិទ្ធិដោយ thmeythmey.com