ព័ត៍មានសុខភាព
ញ៉ាំទឹកពីរកែវមុនញ៉ាំអាហារគ្រប់ពេលរយៈពេលបីខែ លទ្ធផលមិនគួរឱ្យជឿ
× ទឹកអាចជាគន្លឹះដ៏សំខាន់មួយដើម្បីឈានទៅរកការសម្រកទម្ងន់យ៉ាងជោគជ័យ។ យោងទៅតាមការស្រាវជ្រាវមួយដែលធ្វើក្នុងប្រទេសអង់គ្លេសបានឱ្យដឹងថា បើសិនជាអ្នកញ៉ាំទឹក ៥០០មីលីលីត្រមុនពេលញ៉ាំអាហារគ្រប់ពេលនោះ អ្នកនឹងស្រកទម្ងន់យ៉ាងអស្ចារ្យ។
ការស្រាវជ្រាវដែលបានធ្វើទៅលើមនុស្សវ័យកណ្តាលចំនួន ៨៤នាក់ ដែលត្រូវបានគេតាមដានរយៈពេល ១២សប្តាហ៍។ មនុស្សម្នាក់ៗត្រូវបានណែនាំឱ្យញ៉ាំ និងរបៀបញ៉ាំ និងរបៀបបង្កើនសកម្មភាពរាងកាយ។
បន្ទាប់មកពួកគេត្រូវបានបែងចែកជាពីរក្រុម ដោយមួយក្រុមមានគ្នា ៤១នាក់ តម្រូវឱ្យញ៉ាំទឹក ៥០០មីលីលីត្រមុនពេលញ៉ាំអាហារ ចំណែកឯមួយក្រុមទៀតមានគ្នា ៤៣នាក់ ត្រូវស្រមើស្រមៃថាពួកគេឆ្អែតហើយមុនពេលញ៉ាំអាហារ។
អ្នកដែលញ៉ាំទឹកមុនពេលញ៉ាំអាហារឃើញថាអាចស្រកទម្ងន់ជាមធ្យមបាន ១,៣៦គីឡូក្រាម។ ជាមួយគ្នានេះដែរ អ្នកដែលញ៉ាំទឹកអាចសម្រកទម្ងន់បានច្រើនជាងអ្នកដែលមិនបានញ៉ាំទឹក។
ក្នុងរយៈពេល ១២សប្តាហ៍ អ្នកចូលរួមអាចសម្រកទម្ងន់បាន ៤,៥គីឡូក្រាម។
វេជ្ជបណ្ឌិត Helen Pareti ដែលបានចូលរួមក្នុងការពិសោធន៍នេះ និយាយថា ការញ៉ាំទឹក ៥០០មីលីលីត្រមុនពេលញ៉ាំអាហារថ្ងៃត្រង់តែមួយមុខអាចបង្កើនការសម្រកទម្ងន់យ៉ាងអស្ចារ្យ។ បើសិនជាអ្នកធ្វើបែបនេះរយៈពេលពេញមួយឆ្នាំ អ្នកនឹងស្រកទម្ងន់បានច្រើនយ៉ាងងាយដោយមិនឃ្លានអាហារ និងហាត់ប្រាណខ្លាំងក្លាទៀត៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com