ជាតិ
លោក រ៉ុង ឈុន៖ «លុយ និងតំណែង មិនអាចទិញខ្ញុំបានទេ»
× ៩ខែហើយដែលអតីតសកម្មជនសិទ្ធិមនុស្ស និងជាមេដឹកនាំសហជីពគ្រូបង្រៀន និងកម្មករ កំពុងអង្គុយនៅលើកៅអីគណៈកម្មាធិការជាតិរៀបចំការបោះឆ្នោត ដែលលោកនឹកស្មានមិនដល់។ ប៉ុន្តែបើតាមលោក រ៉ុង ឈុន តំណែងធំ ប្រាក់ខែច្រើន នៅតែមិនសំខាន់ដូចបញ្ហាសង្គម ដែលលោកចង់ចូលរួមដោះស្រាយនោះឡើយ។ អតីតសកម្មជនអ្នកការពារសិទ្ធិគ្រូបង្រៀនរូបនេះនៅតែទន្ទេញចាំមាត់ ថាលោកនឹងលាលែងចេញពីគណៈកម្មាធិការជាតិរៀបចំការបោះឆ្នោតនេះ បើសិនជាគណៈកម្មាធិការជាតិនេះ មិនឯករាជ្យ។
តួនាទី និងតំណែងថ្មីជាសមាជិកគណៈកម្មាធិការជាតិរៀបចំការបោះឆ្នោត (គ.ជ.ប) រយៈពេល៩ខែមកនេះ មិនបានធ្វើឲ្យលោក រ៉ុង ឈុន ផ្លាស់ប្តូររូបរាងខាងក្រៅច្រើនឡើយ។ លោក រ៉ុង ឈុន ដែលមានវ័យ៤៧ឆ្នាំ នៅតែបង្ហាញភាពសាមញ្ញ ដោយរស់នៅក្នុងផ្ទះល្វែងមួយនៅក្បែរមជ្ឈមណ្ឌលស្ប៉ាក ដែលប្រើជាការិយាល័យគ្រូបង្រៀនកម្ពុជាឯករាជ្យដែលលោកធ្លាប់ធ្វើជាប្រធានតាំងពីឆ្នាំ២០០០មក រហូតដល់លោកលាលែងនៅឆ្នាំ២០១៥ដើម្បីចូលបំពេញការងារនៅគ.ជ.ប។
គេហាក់មិនចម្លែកប៉ុន្មានឡើយនៅពេលដែលលោក រ៉ុង ឈុន នៅពេលនេះ កំពុងរស់នៅក្នុងទីស្នាក់ការនៃសមាគមនគ្រូបង្រៀនឯករាជ្យដែលលោកជាអ្នកបង្កើតឡើងដោយខ្លួនឯងកាលពី១៥ឆ្នាំមុន។ លោក រ៉ុង ឈុន ដែលបង្កើតសហជីពការពារកម្មករនៅឆ្នាំ២០០៥ថែមមួយទៀតនោះ ត្រូវបានគេមើលឃើញថា លោកមានសម្មានចិត្តទៅលើគណបក្សសម រង្ស៊ី និងក្រោយមកលើគណបក្សសង្គ្រោះជាតិនោះ រហូតដល់លោកបានចូលរួមក្នុងមហាបាតុកម្មរបស់គណបក្សសង្គ្រោះជាតិនៅក្រោយការបោះឆ្នោតនីតិកាលទី៥ទៀតផង។ ជាអ្នកកំណើតនៅក្នុងភូមិចុងតូច ស្រុកស្អាង ខេត្តកណ្តាល និងមានឯកទេសជាគ្រូបង្រៀនផ្នែកគណិតវិទ្យា លោក រ៉ុង ឈុន ត្រូវបានគណបក្សសង្គ្រោះជាតិដាក់ឈ្មោះស្នើជាសមាជិក គ.ជ.ប នៅក្នុងក្របខណ្ឌនៃវប្បធម៌សន្ទនារវាងគណបក្សជាប់ឆ្នោតទាំងពីរ (ប្រជាជនកម្ពុជា និងសង្គ្រោះជាតិ) ដើម្បីកំណែទម្រង់។
«ខ្ញុំមិនដែលគិតថា តំណែងធំ និងលុយកាក់ សំខាន់ជាងបញ្ហាសង្គមទេ»
នៅថ្ងៃទី១៣ មេសា ឆ្នាំ២០១៥ លោក រ៉ុង ឈុន ត្រូវបានគណៈកម្មាធិការរៀបចំការបោះឆ្នោត (គជប) តែងតាំងជាសមាជិក គ.ជ.ប។ តាមរយៈតួនាទីសមាជិក គ.ជ.បនេះ វាគឺជាការផ្លាស់ប្តូររបៀបតស៊ូមតិថ្នាក់ជាតិថ្មីមួយ សម្រាប់លោក រ៉ុង ឈុន ដែលមានមហិច្ឆតាចង់រកយុត្តិធម៌ក្នុងសង្គម និងចង់ការពារសេចក្ដីសុខប្រជាពលរដ្ឋនិងប្រទេសជាតិ។ តួនាទីសមាជិក គ.ជ.ប នេះ មិនមែនជាមហិច្ឆតាដែលលោក រ៉ុង ឈុន សម្លឹងឃើញនិងចង់បានដើម្បីប្រយោជន៍ខ្លួន នៅពេលដែលលោកចេញមុខតស៊ូមតិជាង២០ឆ្នាំនេះឡើយ។
«ខ្ញុំមិនមានអារម្មណ៍ត្រេកត្រអាលនិងតួនាទីគ.ជ.បនេះទេ។ ខ្ញុំដឹងថាអ្នកខ្លះឃើញខ្ញុំមកកាន់តួនាទីជាសមាជិក គ.ជ.ប នេះ ប្រហែលជាពួកគេវាយតម្លៃ ឬគិតថា ខ្ញុំតស៊ូមតិកន្លងមក គឺដើម្បីតែតួនាទី និងតំណែងហើយមើលទៅ។ តែខ្ញុំសូមបញ្ជាក់ថា តួនាទី តំណែង និងលុយកាក់មិនសំខាន់ទេ សម្រាប់ខ្ញុំទេ។ តំណែងធំៗ លុយកាក់ គឺមិនអាចចាប់ចិត្តខ្ញុំជាប់ មិនឲ្យខ្ញុំគិត មិនឲ្យខ្វល់ពីបញ្ហាសង្គមឡើយ។ ហើយអ្វីដែលសំខាន់សម្រាប់ខ្ញុំ គឺដោះស្រាយបញ្ហាសង្គម និងទាមទារឲ្យមានការផ្លាស់ប្ដូរ និងដំណើរការវិវត្តសង្គម»។ លោក រ៉ុង ឈុន ក៏បានយកថវិការ៣០ភាគរយ ដែលខ្លួនទទួលបានពីបៀវត្សប្រចាំខែ បរិច្ចាគទៅឲ្យសមាគម និងសហជីពដែលលោកជាស្ថាបនិក។
នៅពេលដែលសួថា បើមិនត្រូវការតំណែង និងលុយកាក់ តើលោកចង់បានអ្វីក្នុងការតស៊ូមតិជាងឆ្នាំ២០មកនេះ? សមាជិកគ.ជ.ប បានឆ្លើយថា ឲ្យតែការផ្លាស់ប្ដូរសង្គមឲ្យមានភាពសមរម្យ សង្គមមានភាពយុត្តិធម៌ ប្រជាពលរដ្ឋរស់នៅដោយភាពថ្លៃថ្នូរ គឺគ្រប់គ្រាន់សម្រាប់បុរសវ័យ៤៦ឆ្នាំនេះហើយ។
«បើ គ.ជ.ប មិនឯករាជ្យ និងអព្យាក្រឹតទេ ខ្ញុំនឹងលាលែងពីតំណែង»
បើទោះជាមិនមានពិសោធន៍ច្រើនក្នុងកិច្ចការបោះឆ្នោតក៏ដោយ វាគ្មានអ្វីដែលអតីតគ្រូបង្រៀនកម្ពុជាឯករាជ្យរូបនេះព្រួយបារម្ភ ថាគាត់ធ្វើមិនបាននោះទេ។ អ្វីដែលលោក រ៉ុង ឈុន ខ្វាយខ្វល់នោះគឺការរក្សាជំហររឹងមាំដើម្បីការពារភាពត្រឹមត្រូវ យុត្តិធម៌នៅក្នុងស្ថាប័ននេះ រហូតដល់លោកហ៊ានអះអាងប្រាប់សារព័ត៌មានថា បើ គ.ជ.ប មិនឯករាជ្យ និងមិនអព្យាក្រឹតទេ លោកនឹងលាលែងពីតំណែង។ សម្រាប់លោក រ៉ុង ឈុន ការមកដល់ស្ថាប័នថ្នាក់ជាតិដ៏ចម្រូងចសម្រាសនេះ វានឹងធ្វើឲ្យលោកបានរៀនសូត្របន្ថែមទៀតអំពីការងាររៀបចំការបោះឆ្នោត ដែលលោកធ្លាប់បានយកចិត្តទុកដាក់ និងធ្លាប់រិះគន់មិនសំចៃមាត់ កាលនៅអាណត្តិនៃសមាសភាពចាស់នៃគ.ជ.ប។
«ខ្ញុំអង្គុយនៅទីនោះជិត៩ខែ យើងបានធ្វើការងារច្រើន ការរៀបចំនីតិវិធីមួយចំនួន ការរៀបចំបញ្ជីចុះឈ្មោះសាកល្បង។ ហើយមកដល់ពេលនេះក៏វាមិនទាន់មានការខ្វែងគំនិតគ្នាលើកដៃជំទាស់ក្នុងដំណើរការរៀបចំការបោះឆ្នោតនេះឡើយ»។ នេះជាការបញ្ជាក់របស់លោក រ៉ុង ឈុន។
ការខ្វែងគំនិតបានមានតែមួយដងគត់ គឺនៅពេលដែលលោក រ៉ុង ឈុន ដែលបានក្លាយជាសមាជិកគ.ជ.ប ហើយនោះ ក៏ស្រាប់តែមានវត្តមាននៅក្បែរក្បួនដង្ហែតវ៉ារបស់គ្រូបង្រៀន និងសហជីពនៅក្នុងថ្ងៃទិវាពលកម្មអន្តរជាតិថ្ងៃទី១ឧសភាឆ្នាំ២០១៥។ កាលណោះ លោក រ៉ុង ឈុន ត្រូវបានប្រធានគ.ជ.ប កោះហៅដើម្បីសួរដេញដោលបញ្ហានេះ និងបានស្នើឲ្យលោក រ៉ុង ឈុន បញ្ឈប់សកម្មភាពដែលធ្វើឲ្យប៉ះពាល់ឯករាជ្យភាពនៃស្ថាប័នគ.ជ.ប។
ដើម្បីគ្រូបង្រៀនបានរស់នៅថ្លៃថ្នូរ
កើតនៅថ្ងៃ ទី១៥ ខែកក្កដា ឆ្នាំ១៩៦៩ លោក រ៉ុង ឈុន គឺជាកូនចៅកសិករនៅភូមិចុងតូច ឃុំតាលន់ ស្រុកស្អាង ខេត្តកណ្ដាល។ នៅក្នុងអំឡុងទស្សវត្សរ៍ ១៩៧០ នៅពេលដែលប្រទេសកម្ពុជាធ្លាក់ចូលក្នុងសង្គ្រាមជាបន្តបន្ទាប់នោះ ក្រុមគ្រួសាររបស់កុមារ រ៉ុង ឈុន បានស្ថិតនៅក្នុងចំណោមពលរដ្ឋខ្មែររាប់លាននាក់ដែលបានរស់នៅរងទុក្ខលំបាកដែរ មុនពេលរបបខ្មែរក្រហម ត្រូវបានផ្តួលរំលំក្នុង ឆ្នាំ១៩៧៩។ ក្រោយរបបអាវខ្មៅដួលរលំ ក្រុមគ្រួសារនេះ ក៏បានរស់នៅស្រុកកំណើតខ្លួនវិញ ហើយក៏ជាពេលដែលកុមារ រ៉ុង ឈុន បានចាប់ចូលរៀននៅសាលាបឋមសិក្សាតាលន់ រហូតដល់បញ្ចប់ការសិក្សានៅវិទ្យាល័យស្រុកកោះធំ ខេត្តកណ្ដាល និងបន្ដការសិក្សាដោយប្រឡងចូលសាកលវិទ្យាល័យភ្នំពេញនៅឆ្នាំ១៩៨៦។ ក្រោយពីបញ្ចប់ការសិក្សាឯកទេសគណិតវិទ្យានៅឆ្នាំ១៩៩៣ និស្សិត រ៉ុង ឈុន បាននាំយកជំនាញគណិតវិទ្យារបស់ខ្លួន ត្រឡប់ទៅវិទ្យាល័យស្អាងវិញ ដោយបង្រៀនផ្នែកគណិតវិទ្យា ចាប់ពីថ្នាក់ ទី១០ ដល់ថ្នាក់ ទី១២ ហើយក៏ជាពេលដែលគ្រូបង្រៀនរូបនេះ ចេញមុខតស៊ូមតិទាមទារប្រាក់ខែ និងភាពថ្លៃថ្នូររបស់គ្រូបង្រៀន និងកម្មកររោងចក្រដែរ ក្រោយពីខ្លួនបានមើលឃើញភាពអយុត្តិធម៌ និងអំពើពុករលួយក្នុងសង្គមតាំងពីរៀននៅសកលវិទ្យាល័យ។
លោក រ៉ុង ឈុន បានបញ្ជាក់ដូច្នេះថា៖«បន្ទាប់ពីខ្ញុំបង្រៀនជាហូរហែរមក តាំងពីរៀនសាកលវិទ្យាល័យមកខ្ញុំឃើញប្រព័ន្ធការងាររដ្ឋ មានអារម្មណ៍មិនសប្បាយចិត្តទៅនឹងការគ្រប់គ្រងបែបដាក់សម្ពាធទៅមន្ត្រីក្រោមឱវាទ។ ដូច្នេះហើយបានជានៅពេលខ្ញុំបង្រៀននៅវិទ្យាល័យស្អាង ខ្ញុំមានគំនិតតស៊ូមតិចេញពីវិទ្យាល័យស្អាងនេះ ពីបញ្ហាតម្លាភាព គណនេយ្យភាពនៃការគ្រប់គ្រងថវិការបស់សាលា និងការពារយុត្តិធម៌ដល់សិស្សានុសិស្ស»។
ស្របពេលដែលលោកកំពុងចេញមុខតស៊ូមតិយ៉ាងខ្លាំងក្លាដើម្បីទាមទារសិទ្ធិនិងការពារសេចក្ដីថ្លៃថ្នូរបស់គ្រូបង្រៀននេះ លោក រ៉ុង ឈុន ក៏បានមើលឃើញបញ្ហាប្រាក់ខែរបស់កម្មករមួយផ្នែកទៀត ដែលជំរុញចិត្តគ្រូបង្រៀនរូបនេះ ឲ្យបោះជំហានយ៉ាងជ្រៅ ចូលក្នុងការចូលរួមសកម្មភាពទាមទារសិទ្ធិសេរីភាព លក្ខខណ្ឌការងារ និងប្រាក់ខែកម្មករឲ្យបានសមរម្យ ជាមួយអតីតសហជីពសេរីកម្មកលោក ជា វិជ្ជា។
កាន់តែគំរាម កាន់តែមានទឹកចិត្ត
ជាសកម្មជនសិទ្ធិមនុស្ស ជាមេដឹកនាំបាតុកម្មតវ៉ា លោក រ៉ុង ឈុន បានទទួលការគំរាមកំហែងមិនតិចដងឡើយ។ នេះមិនរាប់ពីការបាញ់ប្រហារសម្លាប់លោក ជា វិជ្ជា អតីតប្រធានសហជីពសេរីកម្មករនៅក្នុងឆ្នាំ២០០៤ ដែលជាមិត្តភក្តិជិតស្និទ្ធរបស់លោកឡើយ។ ផ្ទុយទៅវិញ ការគំរាមកំហែងទាំងនោះ បានលើកទឹកចិត្តលោក រ៉ុង ឈុន ឲ្យរឹតតែតស៊ូមតិកាន់តែខ្លាំង និងហ៊ាននិយាយរិះគន់រដ្ឋាភិបាលដោយមិនសំចៃមាត់។
លោក រ៉ុង ឈុន ត្រូវសមត្ថកិច្ចចាប់ខ្លួននៅថ្ងៃទី១៥ តុលា ឆ្នាំ២០០៥ ហើយត្រូវបានឃុំខ្លួនរយៈពេល៩៦ថ្ងៃ ពាក់ព័ន្ធនឹងការចេញសេចក្ដីថ្លែងការណ៍បង្ហាញពីក្ដីព្រួយបារម្ភពីរឿងព្រំដែន។ តែឧបសគ្គទាំងនេះក៏មិនបំបាក់ស្មារតីលោក រ៉ុង ឈុន ដែលមានមហិច្ឆតាចង់ឲ្យមានការភាពយុត្តិធម៌ក្នុងសង្គមឡើយ។ លោកបញ្ជាក់ថា៖«វាអត់មានឧបសគ្គរារាំងទឹកចិត្តយើងទេ។ បើសិនជាយើងម្នាក់ៗគិតថាមានឧបសគ្គបន្ដិចបន្តួចគេចវេះ ហើយយើងទម្លាក់ចោលនូវការងារនេះ ខ្ញុំគិតថា វានឹងធ្វើឲ្យមនុស្សរាប់សែនលាននាក់រងគ្រោះដោយសារភាពអយុត្តិធម៌។ ដូច្នេះបើយើងជាអ្នកយល់ដឹងជាងគេ យើងត្រូវចូលរួមដើម្បីទាមទាររកភាពយុត្តិធម៌ ដើម្បីឲ្យប្រជាពលរដ្ឋចូលរួមជាមួយយើង»។
បុរសវ័យ៤៦ឆ្នាំរូបនេះ យល់ថា ដើម្បីដោះស្រាយបញ្ហាសង្គមឲ្យបានទទួលបានផ្លែផ្កានោះ មនុស្សគ្រប់រូបត្រូវចេញមុខតស៊ូមតិទាមទារ ដោយចិត្តស្មោះត្រង់នឹងប្រទេសជាតិ មិនមែនតស៊ូមតិ អួតខ្លួនថា ជាអ្នកការពារប្រជាពលរដ្ឋ ការពារផលប្រយោជន៍ជាតិ ដើម្បីសម្លឹងមើលតំណែងនិងទ្រព្យសម្បត្តិមានបាននៅពេលខាងមុខនោះទេ៕
© រក្សាសិទ្ធិដោយ thmeythmey.com