ស្ថានកុងស៊ុលឥណ្ឌានៅអាហ្វហ្កានីស្ថានរងការវាយប្រហារក្រោយទស្សនកិច្ចលោកម៉ូឌី

អន្តរជាតិ

នយោបាយអន្តរជាតិ

ស្ថានកុងស៊ុលឥណ្ឌានៅអាហ្វហ្កានីស្ថានរងការវាយប្រហារក្រោយទស្សនកិច្ចលោកម៉ូឌី

04, Jan 2016 , 5:16 pm

រូបភាព

ដោយ: តន ចាន់រិទ្ធារ៉ា

ខ្មាន់កាំភ្លើងមួយក្រុមបានបើកការវាយប្រហារលើស្ថានកុងស៊ុលឥណ្ឌានៅទីក្រុងភាគខាងជើងអាហ្វហ្កានីស្ថាននៅថ្ងៃអាទិត្យ ទី៣ ម្សិលមិញ ហើយគេអាចលឺសំឡេងផ្ទុះនិងការប្រយុទ្ធគ្នារវាងកងសន្តិសុខនិងក្រុមខ្មាន់កាំភ្លើង ។ យ៉ាងណាក៏ដោយ មកទល់ពេលនេះ គេមិនទាន់កំណត់អត្តសញ្ញាណក្រុមនេះបាននៅឡើយទេ ។

ស្ថានកុងស៊ុលឥណ្ឌាប្រចាំទីក្រុង Mazar-i-Sharif បានរងការវាយប្រហារពីសំណាក់ខ្មាន់កាំភ្លើងមិនស្គាល់អត្តសញ្ញាណមួយក្រុមនៅថ្ងៃទី ៣ ខែមករា ម្សិលមិញ ។ ក្រុមខ្មាន់កាំភ្លើងបានបើកការវាយប្រហារលើស្ថានកុងស៊ុលដែលនៅភាគជើងប្រទេស ហើយគេក៏បានលឺសំឡេងផ្ទុះខ្លាំងផងដែរ ។ តែពេលនេះ មិនទាន់មានក្រុមណាចេញមកទទួលខុសត្រួវនៅចំពោះការវាយប្រហារឡើយទេ ។

យោងតាមសារព័ត៌មាន AFP មន្ត្រីកុងស៊ុលឥណ្ឌាបានថ្លែងថា៖«យើងកំពុងរងការវាយប្រហារ ហើយការវាយប្រហារកំពុងតែបន្តនៅឡើយ ។ មន្ត្រីរូបនេះដែលបាននិយាយចេញពីអាគារដែលត្រូវបានការពារយ៉ាងតឹងរ៉ឹងបន្តទៀតថា បុគ្គលិកក្នុងស្ថានកុងស៊ុលទាំងអស់មានសុវត្ថិភាព។

បើយោងតាមមន្ត្រីសន្តិសុខអាហ្វហ្កានីស្ថានវិញ ក្រុមខ្មាន់កាំភ្លើងបានលាក់ខ្លួនក្នុងអាគារមួយនៅក្បែរស្ថានកុងស៊ុលឥណ្ឌា ហើយបានបើកការវាយប្រហារមកលើអាគារកុងស៊ុល ។ ភ្លាមៗនោះ កងសន្តិសុខអាហ្វហ្កានីស្ថានដែលការពារនៅទីនោះក៏បានបាញ់តដៃវិញដែរ ។ លោក Shir Jan Durrani មន្ត្រីប៉ូលិសប្រចាំទីក្រុង Mazar-i-Sharif បញ្ជាក់ថា កងកម្លាំងសន្តិសុខបានព័ទ្ធតំបន់នោះអស់ហើយ ។ ចំណែកប្រតិបត្តិការបោសសំអាតកំពុងតែធ្វើឡើងយ៉ាងប្រុងប្រយ័ត្ន ។

ការវាយប្រហារនេះបានកើតឡើង ក្រោយក្រុមជ្រុលនិយមឥស្លាមមួយក្រុមបើកការវាយប្រហារដូចគ្នាលើមូលដ្ឋានទ័ពអាកាសឥណ្ឌា ដែលមានទីតាំងក្បែរព្រំដែនប៉ាគីស្ថាន ។ ទាហាន ៧នាក់និងខ្មាន់កាំភ្លើង៦នាក់បានស្លាប់នៅមូលដ្ឋានទ័ព Pathankot ក្នុងរដ្ឋPunjab ។

លើសពីនេះ ការវាយប្រហារនេះកើតឡើងត្រឹមមួយសប្ដាហ៏ប៉ុណ្ណោះ ក្រោយដំណើរទស្សនកិច្ចដ៏ភ្ញាក់ផ្អើលរបស់នាយករដ្ឋមន្ត្រីឥណ្ឌាលោក នារិន្ទ្រា ម៉ូឌី (Narendra Modi) ទៅកាន់អាហ្វហ្កានីស្ថាន និងប៉ាគីស្ថាន ។ លោក ម៉ូឌី បានទៅដល់ទីក្រុងកាប៊ុល ដើម្បីសម្ភោធអាគារសភាដែលឥណ្ឌាជួយកសាង និងប្រគល់ឧទ្ធម្ភាគចក្រផលិតនៅរុស្សី ៣គ្រឿងដល់រដ្ឋាភិបាលអាហ្វហ្កានីស្ថានថែមទៀត៕