អន្តរជាតិ
នយោបាយអន្តរជាតិ
លោក អូបាម៉ា ស្រក់ទឹកភ្នែកពេលរំលឹកពីហិង្សាប្រដាប់អាវុធនៅក្នុងសង្គមអាមេរិក
×![]()
នៅថ្ងៃអង្គារទី ៥ខែមករាម្សិលមិញ លោក បារ៉ាក់ អូបាម៉ា បានបង្ហាញផែនការថ្មីសំដៅរឹតបន្តឹងការប្រើប្រាស់អាវុធដែលវាជាវិធានការមួយដែលដាក់ចេញដោយស្ថាប័ននីតិប្រតិបត្តិឬប្រធានាធិបតីផ្ទាល់។ តែក្នុងពេលថ្លែងសុន្ទរកថា លោក អូបាម៉ាស្រក់ទឹកភ្នែក ពេលលោករំលឹកពីការសម្លាប់រង្គាលក្មេងៗមិនដឹងអ្វីសោះនៅសហរដ្ឋអាមេរិក ព្រោះការគ្រប់គ្រងអាវុធមានលក្ខណៈធូររលុងពេក។
ចុងក្រោយប្រធានាធិបតី បារ៉ាក់ អូបាម៉ា បានបង្ហាញផែនការរឹតបន្តឹងការប្រើប្រាស់អាវុធនិងឈានទៅកាត់បន្ថយហិង្សាប្រដាប់អាវុធនៅអាមេរិកនៅថ្ងៃអង្គារទី ៥ខែមករានេះ។ លោក អូបាម៉ា បានថ្លែងអំពាវនាវឲ្យមានការគាំទ្របទបញ្ជាថ្មីរបស់លោកដែលដាក់ចេញក្នុងតំណែងជាប្រធានាធិបតីអាមេរិក ហើយលោកបានសង្កត់ធ្ងន់ថាវាជាពេលត្រូវចាត់វិធានការមួយដើម្បីដោះស្រាយហិង្សាប្រដាប់អាវុធនេះ។
ក្នុងពេលថ្លែងសុន្ទរកថា លោកបានលើកយកបញ្ហាហិង្សាប្រដាប់អាវុធដែលកើតឡើងក្នុងឆ្នាំ ២០១២ ដោយមានការសម្លាប់រង្គាលក្មេងៗនៅសាលា Sandy Hook នៅក្នុងរដ្ឋ Connecticut។ លោកថា ៖« គ្រប់ពេលដែលខ្ញុំគិតដល់ក្មេងៗទាំងនោះ ខ្ញុំចាប់ផ្តើមច្របូកច្របល់ក្នុងចិត្តភ្លាម»។ ប៉ុន្តែពេលកំពុងនិយាយ លោក អូបាម៉ា មិនអាចទប់របស់ខ្លួនបានរហូតដល់ហូរទឹកភ្នែកថែមទៀតផង។ លោកបានផ្អាកនិយាយបន្តិចហើយយកដៃជូតភ្នែក ហើយបន្តនិយាយថា៖«ហើយរឿងបែបនេះកើតឡើងនៅតាមផ្លូវនៅស៊ីហ្កាកូ រៀងរាល់ថ្ងៃ»។ ការលើកឡើងរបស់លោក អូបាម៉ាបែបនេះ សំដៅដល់ទីកន្លែងដែលលោកចាប់ផ្តើមអាជីពជាអ្នកនយោបាយកន្លងមក។
លោក បារ៉ាក់ អូបាម៉ា តាំងពីដើមមកបានព្យាយាមធ្វើយ៉ាងណាតស៊ូមតិឲ្យសភាសម្រេចអនុម័តបទបញ្ញត្តិថ្មីដែលអាចរឹតបន្តឹងការប្រើប្រាស់អាវុធនៅសហរដ្ឋអាមេរិក។ ប៉ុន្តែគោលនយោបាយរបស់លោកមិនបានទទួលការគាំទ្រពីសភាអាមេរិកនោះឡើយ។ ប្រធានាធិបតីអាមេរិកជិតផុតអាណត្តិរូបនេះបានទិតៀនសភាដែលតែងបដិសេធគម្រោងឈានទៅរឹតបន្តឹងការប្រើប្រាស់អាវុធនេះ។ នេះក៏ដោយសារទង្វើរបស់សភាផ្ទុយឆន្ទៈប្រជាជន ព្រោះដូចឃើញហើយ ករបាយការណ៍ស្ទង់មតិផ្លូវការក្នុងចំណោមប្រជាជនអាមេរិក បង្ហាញថា ប្រជាជនជាង៨០ភាគរយ គាំទ្រឲ្យមានការត្រួតពិនិត្យប្រវត្តិរូបអ្នកដែលប្រើប្រាស់អាវុធដើម្បីកាត់បន្ថយហិង្សា។
យ៉ាងណាក៏ដោយ លោក អូបាម៉ា ក៏ឆ្លៀតអំពាវនាវទៅកាន់សភាអាមេរិកជាថ្មីឲ្យអនុម័តច្បាប់គ្រប់គ្រងអាវុធថ្មី ដោយលោកពន្យល់ថា រាល់វិធានការនីតិប្រតិបត្តិដែលលោកដាក់ចេញអាចបង្ខំឲ្យគេអនុវត្តតាមបានដរាបណាស្ថាប័ននីតិបញ្ញត្តិធ្វើសកម្មភាពដែរ។ កាលពីឆ្នាំ ២០១៣ សេចក្តីស្នើច្បាប់របស់លោក អូបាម៉ា ត្រូវសភាទាត់ចោលម្តងមកហើយ។ ទាក់ទងការទាត់ចោលសំណើររបស់លោកពីសំណាក់សភាកន្លងមក លោក អូបាម៉ា បានអះអាង ក្រុមអ្នកបញ្ចុះបញ្ចូលសភានិងជាអ្នកគាំទ្រការប្រើប្រាស់អាវុធ អាចយកសភាជាចំណាប់ខ្មាំងបាន ប៉ុន្តែមិនអាចយកប្រជាជនអាមេរិកជាចំណាប់ខ្មាំងនោះឡើយ។
ដោយឡែក ចំណាត់ការថ្មីរបស់ប្រមុខស្ថាប័ននីតិបញ្ញតិ្តនេះដែរ នឹងទាមទារឲ្យក្រុមហ៊ុនលក់អាវុធត្រូវចុះបញ្ជីដើម្បីបានអាជ្ញាប័ណ្ណពីអាជ្ញាធរនិងត្រូវពិនិត្យឲ្យបានដិតដល់នូវប្រវត្តិរូបរបស់អ្នកទិញអាវុធ បើមិនដូច្នេះទេក្រុមហ៊ុនទាំងនោះនឹងទទួលខុសត្រូវចំពោះមុខច្បាប់។ តាមពិតទៅមិនមែនជាលើកដំបូងទេ ដែលលោក អូបាម៉ា ប្រើអំណាចប្រតិបត្តិដែលកំណត់ដោយរដ្ឋធម្មនុញ្ញដាក់ចេញចំណាត់ការបែបនេះ។ នេះក៏ដោយសារតែណាត់ការរឿងរឹតបន្តឹងការប្រើអាវុធនេះមិនមានអនុភាពគតិយុត្តិឡើយ ហើយការប្រើប្រាស់អាវុធជារឿងរសើបបំផុតក្នុងឆាកនយោបាយអាមេរិកដែរ។ដូច្នេះចាំបាច់មានការសហការពីស្ថាប័ននីតិបញ្ញត្តិដើម្បីឈានទៅអនុវត្តនិងបង្កើតឲ្យមានអនុភាពចាប់បង្ខំ៕
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
1 សប្តាហ៍
