កីឡាជាតិ
ជាតិ
លោក ឌៀប សីហា សាកលវិទ្យាធិការនៃសាកលវិទ្យាល័យបៀលប្រាយ និងជាប្រធានក្លិបបៀលប្រាយយូណាយធីត
×![]()
គ្មានឡើយការប្រកួតរបស់ក្លិបបៀលប្រាយយូណាយធីត (BBU) នៅក្នុងក្របខណ្ឌកំពូលមិត្តហ្វូនខេមបូឌានលីក និងពានរង្វាន់សម្តេច ហ៊ុន សែន ឆ្នាំ២០១៦ ។ នេះបើតាមការបញ្ជាក់របស់លោក ឌៀប សីហា សាកលវិទ្យាធិការនៃសាកលវិទ្យាល័យបៀលប្រាយ និងជាប្រធានក្លិបបៀលប្រាយយូណាយធីត។ លោកបានអះអាងប្រាប់សារព័ត៌មានថ្មីៗថា ថ្នាក់ដឹកនាំកំពុងសិក្សាមើលចំណុចខ្វះខាតកន្លងមក ជាពិសេសបញ្ហាហិរញ្ញវត្ថុ ដើម្បីរៀបចំក្លិបឲ្យបានល្អនាពេលអនាគត ខណៈសកលវិទ្យាល័យបៀលប្រាយកំពុងត្រៀមសាងសង់កីឡដ្ឋានមួយនៅទីតាំងសាខាថ្មីក្នុងក្រុងតាខ្មៅ ខេត្តកណ្តាល។
បៀលប្រាយយូណាយធីតគឺជាក្លិបតែមួយគត់ដែលមានប្រភពចេញពីសាកលវិទ្យាល័យ ហើយឈរជើងយូរជាងគេនៅក្នុងក្របខណ្ឌបាល់ទាត់កំពូលរបស់កម្ពុជាបើគិតចាប់តាំងពីឆ្នាំ២០០៧មក។ កាលពីថ្ងៃទី៥ ខែមករា អ្នកតាមដានកីឡាបាល់ទាត់កម្ពុជា មានការស្រងាកចិត្តជាខ្លាំង បន្ទាប់ពីបានឃើញមន្ត្រី និងកីឡាករនៃក្លិបមួយនេះ បង្ហោះរូប និងសំណេរតាមហ្វេសប៊ុក ដែលបង្ហាញពីការជប់លៀងលាគ្នា ដោយសារក្លិបត្រូវបានរំសាយ។
បញ្ហាហិរញ្ញវត្ថុត្រូវបានលើកឡើងទាក់ទងនឹងការរំសាយក្លិបដែលបានសាងកេរ្តិ៍ឈ្មោះជិត១០ឆ្នាំកន្លងមកនេះ។ ថ្លែងប្រាប់សារព័ត៌មានថ្មីៗ តាមទូរសព្ទ លោក ឌៀប សីហា សាកលវិទ្យាធិការនៃសាកលវិទ្យាល័យបៀលប្រាយ និងជាប្រធានក្លិបបៀលប្រាយយូណាយធីត ទទួលស្គាល់ថា ក្លិបរបស់លោកពិតជាជួបបញ្ហាហិរញ្ញវត្ថុ ប៉ុន្តែក្លិបគ្រាន់តែផ្អាកសកម្មភាពមួយឆ្នាំប៉ុណ្ណោះ មិនមែនជាការរំសាយនោះឡើយ។
លោក ឌៀប សីហា បានពន្យល់ថា៖ «ក្លិប និងសាកលវិទ្យាល័យបៀលប្រាយ តែងតែចូលរួមសកម្មភាពដើម្បីលើកតម្កើងវិស័យកីឡានៅកម្ពុជា ជាពិសេសបាល់ទាត់។ ប៉ុន្តែពេលនេះ យើងត្រូវធ្វើកំណែទម្រង់ឡើងវិញលើគម្រោងថវិការបស់យើងដើម្បីកសាងក្លិបមួយឲ្យខ្លាំងនាពេលអនាគត។ មកដល់ពេលនេះ យើងមិនទាន់ទទួលចំណូលអ្វីនោះឡើយពីវិស័យកីឡា» ។
សាកលវិទ្យាធិការ និងជាប្រធានក្លិបរូបនេះ បានអះអាងថា ថ្នាក់ដឹកនាំកំពុងពិភាក្សាគ្នាលើគម្រោងសាងសង់កីឡដ្ឋានមួយនៅលើទីតាំងសាខាថ្មីរបស់សាកលវិទ្យាល័យបៀលប្រាយដែលស្ថិតនៅក្នុងក្រុងតាខ្មៅ ខេត្តកណ្តាល។
លោកបានលើកឡើងថា៖ «បើយើងចង់កសាងក្លិបឲ្យខ្លាំង យើងត្រូវមានការពិភាក្សាឲ្យបានច្បាស់លាស់ជាមុនសិន»។ តើក្រុមគ្រូបង្វឹក មន្ត្រី និងកីឡាករ ពិតជាត្រូវរំសាយមែនទេ? លោក ឌៀប សីហា មិនបានផ្តល់ចម្លើយជាក់លាក់ឡើយ ដោយលោកគ្រាន់តែបញ្ជាក់ថា កិច្ចប្រជុំពិភាក្សាកំពុងដំណើរការ។
លោក លាស់ សាឡាក់ខាន់ គ្រូបង្វឹកក្លិបបៀលប្រាយយូណាយធីត ក៏បានអះអាងផងដែរពីការដកខ្លួនរបស់ក្លិបសម្រាប់ការប្រកួតធំៗនៅឆ្នាំ២០១៦នេះ ប៉ុន្តែលោកបានចាត់ទុកថា វាជារឿងធម្មតា។
«ខ្ញុំទើបតែទទួលដំណឹងពីការផ្អាកនេះ តែខ្ញុំមិនដឹងពីហេតុផលពិតប្រាកដនោះឡើយ។ ប្រសិនបើជាបញ្ហាថវិកាមែននោះ ខ្ញុំគិតថា វាជារឿងដែលត្រូវយោគយល់ ព្រោះខ្ញុំក៏ធ្លាប់ដឹកនាំក្លិបច្រើនដែរ។ បើគ្មានថវិកាទ្រទ្រង់ទេនោះ យើងមិនអាចរៀបចំក្លិបឲ្យខ្លាំងនោះឡើយ»។ នេះជាបញ្ជាក់របស់លោក លាស់ សាឡាក់ខាន់ ដែលធ្លាប់មានបទពិសោធន៍លើបញ្ហាថវិកា នៅពេលដែលលោកធ្វើជាម្ចាស់ក្លិបខេមរាកីឡា។
តើលោក លាស់ សាឡាក់ខាន់ មានគម្រោងយ៉ាងណាទៀតសម្រាប់អាជីពរបស់លោក? គ្រូបង្វឹក និងជាថ្នាក់ដឹកនាំកីឡាដ៏មានបទពិសោធន៍រូបនេះ មិនទាន់គិតអ្វីនោះឡើយ ដោយលោកបញ្ជាក់ថា រង់ចាំជានិច្ចក្នុងការបន្តជួយបៀលប្រាយយូណាយធីត។
មន្ត្រីសហព័ន្ធកីឡាបាល់ទាត់កម្ពុជា (FFC) មួយរូប បានបញ្ជាក់ពីការសុំដកខ្លួនរបស់បៀលប្រាយយូណាយធីតពីការប្រកួតក្របខណ្ឌមិត្តហ្វូនខេមបូឌានលីកឆ្នាំ២០១៦ តាមរយៈលិខិតមួយកាលពីថ្ងៃទី៣០ ខែធ្នូ ឆ្នាំ២០១៥ ។ លោក ខៀវ សាម៉េត អនុប្រធាន FFC មិនទាន់បានឃើញលិខិតដោយផ្ទាល់ភ្នែកនោះឡើយ ប៉ុន្តែលោកបានបង្ហាញពីការសោកស្តាយចំពោះអវត្តមានបៀលប្រាយនៅក្របខណ្ឌកំពូលនាឆ្នាំក្រោយ។
លោកបានគូសបញ្ជាក់ថា៖ «វាជារឿងល្អដែលបៀលប្រាយងាកទៅពង្រឹកសមត្ថភាព និងរចនាសម្ព័ន្ធរបស់ខ្លួន ប៉ុន្តែការផ្អាកសកម្មភាពមួយឆ្នាំ គឺជារឿងដ៏គួរឲ្យសោកស្តាយ។ ពេលបៀលប្រាយចូលខ្លួនសារជាថ្មី FFC ត្រូវសិក្សាមើលលក្ខណៈបច្ចេកទេសរបស់ក្លិបមួយនេះឡើងវិញផងដែរ»។
សាកលវិទ្យាល័យប្រៀលប្រាយ បានប្រឡូកខ្លួនក្នុងក្របខណ្ឌបាល់ទាត់កំពូលចាប់ពីឆ្នាំ២០០៧មក ដោយបានទទួលចំណាត់ថ្នាក់លេខ៥នៅក្នុងលីក និងចំណាត់ថ្នាក់លេខ៤ក្នុងពានរង្វាន់សម្តេច ហ៊ុន សែន។ ចាប់ពីឆ្នាំ២០០៨ ក្លិបនេះ បានប្រើឈ្មោះថា «បៀលប្រាយយូណាយធីត» ។
លោក មាស សំអឿន បានធ្វើជាគ្រូបង្វឹករបស់បៀលប្រាយចាប់ពីឆ្នាំ២០០៧ដល់ឆ្នាំ២០១៣ ហើយលោក លាស់ សាឡាក់ខាន់ បានបន្តកាន់កាប់តំណែងមួយនេះ ចាប់ពីពីការប្រកួតជើងទីពីរនៃក្របខណ្ឌមិត្តហ្វូនខេមបូឌានលីកឆ្នាំ២០១៣ ។
នារយៈពេល៩ឆ្នាំកន្លងមក បៀលប្រាយយូណាយធីត បានចំណាត់ថ្នាក់លេខ៣ក្របខណ្ឌខេមបូឌានលីកឆ្នាំ២០១០ ហើយតែងតែឈានដល់វគ្គ១/៤ផ្តាច់ព្រ័ត្រនៃពានរង្វាន់សម្តេច ហ៊ុន សែន ដោយឆ្នាំ២០១១ និងឆ្នាំ២០១៤ ពួកគេទទួលបានចំណាត់ថ្នាក់លេខ២ ។
បៀលប្រាយធ្លាប់ឈ្នះជើងឯកផងដែរនាការប្រកួតដណ្តើមពានរង្វាន់កម្រិតសាកលវិទ្យាល័យអាស៊ាននាឆ្នាំ២០០៧នៅប្រទេសថៃ និងឆ្នាំ២០១៣ នៅប្រទេសឡាវ។ កីឡាករ និងអតីតកីឡាករឆ្នើមៗមួយចំនួនដែលឆ្លងកាត់ក្លិបបៀលប្រាយរួមមានដូចជា ស៊ូ យ៉ាទី, ហែម ស៊ីម៉ៃ, នុត ស៊ីនួន, ឈុន សុធារ័ត្ន, រ៉ឹង ប៊ុនហៀង, ញឹម សុវណ្ណារ៉ា, ហេង សុខលី, ចាន់ វាសនា, ព្រំ ពុទ្ធសិទ្ធី, អ៊ុំ ចាន់តារា ជាដើម៕
Tag:
បាល់ទាត់
BBU
© រក្សាសិទ្ធិដោយ thmeythmey.com
