លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា កាលពីថ្ងៃទី៤ ខែមករា ឆ្នាំ២០១៦ បានបង្ហាញពីសមិទ្ធផលសំខាន់ៗមួយចំនួនដែល NOCC សម្រេចបានប្រចាំឆ្នាំ២០១៥ ទាំងនៅលើឆាកជាតិ និងអន្តជាតិ។ ហើយលោកបានចាត់ទុកការសម្រេចនេះថា ជាសមិទ្ធផលមួយដ៏អស្ចារ្យគួរឱ្យកោតសរសើរ។
លោក វ៉ាត់ ចំរើន បានឱ្យដឹងថា ៖ «សមិទ្ធផលដែលសំខាន់ជាងគេដែលយើងសម្រេចបានសម្រាប់ឆ្នាំ២០១៥ គឺការទទួលបានជំនួយឥតសំណងពីរដ្ឋាភិបាលចិន ជាង ១០០ លានដុល្លារ ក្នុងការសាងសង់ពហុកីឡដ្ឋានជាតិមរតកតេជោ។ យើងបានទទួលចំណាត់ថ្នាក់ល្អពីការប្រកួតស៊ីហ្គេមលើកទី ២៨ នៅសិង្ហបុរី ទោះបីចំនួនមេដាយមានការថយចុះក៏ដោយ ប៉ុន្តែវាជាចំណារប្រវត្តិសាស្ត្រមួយរបស់កម្ពុជាដែលបានឈរលើប្រទេសចំនួន៣ ជាពិសេសប្រទេសឡាវ ដែលយើងមិនធ្លាប់ទទួលបានក្នុងប្រវត្តិកីឡា។ អ្វីដែលសំខាន់យើងត្រូវបានក្រុមប្រឹក្សាកីឡាអូឡាំពិកអាស៊ីអាគ្នេយ៍ប្រគល់សិទ្ធធ្វើជាម្ចាស់ផ្ទះស៊ីហ្គេម ឆ្នាំ២០២៣ ជាផ្លូវការ»។
លោកបានឱ្យដឹងទៀតថា ក្រសួងអប់រំ យុវជន និងកីឡា ព្រមទាំងគណៈកម្មការជាតិ សហព័ន្ធជាតិទាំងអស់បានរួមគ្នារៀបចំសេចក្តីព្រាងផែនការមេស៊ីហ្គេមបានសម្រេចជោគជ័យ។ ជាពិសេសផែនការនេះត្រូវបានដាក់ឱ្យពិភាក្សាក្នុងអង្គសិក្ខាសាលាដ៏ទូលំទូលាយមួយដែលមានការចូលរួមពីគ្រប់វិស័យឯកជន មន្ទីរក្រសួងពាក់ព័ន្ធ និងសាលារាជធានីភ្នំពេញ។
លោកបានបញ្ជាក់ផងដែរថា ផែនការមេស៊ីហ្គេមនេះធ្វើឡើងដោយមានការពិគ្រោះយោបល់ និងទទួលបានការណែនាំពីអ្នកមានបទពិសោធន៍ជាច្រើន ជាពិសេសទទួលបានការគាំទ្រ និងជួយពីអ្នកជំនាញការជនជាតិ ម៉ាឡេស៊ី ដែលជារៀបច្បង និងជាប្រធានសហព័ន្ធកីឡាអូឡាំពិកអាស៊ីអាគ្នេយ៍ ដែលពោពេញទៅដោយបទពិសោធន៍ក្នុងការរៀបចំស៊ីហ្គេមតាំងពីលើកទី២ ទី៣មកម្ល៉េះ។
ជាមួយគ្នានេះដែរ លោក វ៉ាត់ ចំរើន បានបញ្ជាក់ផងដែរថា៖ «យើងបានចូលរួមកិច្ចប្រជុំជាច្រើនជាពិសេសកិច្ចប្រជុំរបស់សមាគមកីឡាអូឡាំពិកក្រុងញូវយ៉ក ដែលធ្វើឱ្យយើងបាននូវរបត់ថ្មីពីចលនាអូឡាំពិកអន្តរជាតិ។ មិនត្រឹមតែប៉ុណ្ណោះយើងទទួលបានការកោតសរសើរពីចលនាអូឡាំពិកអន្តរជាតិថា មានសកម្មភាពច្រើនសម្រាប់ឆ្នាំ២០១៥ នេះ អ្វីដែលសំខាន់នោះគឺការធ្វើឱ្យវិស័យកីឡាមានភាពផុសផុល និងទទួលបានការគាំទ្រពីគ្រប់មជ្ឈដ្ឋាន ជាពិសេសទទួលបានអគារដ៏ស្រស់ស្អាតសម្រាប់ធ្វើការពីរាជរដ្ឋាភិបាល»។
ជាមួយគ្នានេះដែរក្នុងឆ្នាំ២០១៥ កំរិតបច្ចេកទេសរបស់កម្ពុជា មានការរីកចម្រើនយ៉ាងខ្លាំង ទាំងក្នុងព្រឹត្តិការណ៍ស៊ីហ្គេម ក៏ដូចជាក្នុងព្រឹត្តិការណ៍ពិភព។ NOCC សម្រេចបាននូវសមិទ្ធផលមួយចំនួនដូចជាការទទួលបានមេដាយមាសក្នុងការប្រកួតស៊ីហ្គេមលើប្រភេទកីឡាដែលមិនធ្លាប់ទទួលបានមេដាយកន្លងមក។
លោក វ៉ាត់ ចំរើន បានរៀបរាប់បន្ថែមថា៖ «យើងបានបង្កើតសហព័ន្ធកីឡាអូឡាំពិកថ្មីជាផ្លូវការចំនួន២ ក្នុងនោះមានសហព័ន្ធកីឡាទូកក្តោង និងសហព័ន្ធកីឡាបាញ់កាំភ្លើង។ ក្រៅពីនោះយើងបានធ្វើមហាសន្និបាតឡើងវិញរបស់សហព័ន្ធមួយចំនួនដែលបានបញ្ចប់អាណត្តិរបស់ខ្លួន និងបានពង្រឹងគោលការណ៍សហព័ន្ធជាតិក្នុងការគ្រប់គ្រង និងដឹកនាំអភិបាលកិច្ចល្អផងដែរ»។
លោកបានកត់សំគាល់ផងដែរថា ក្រោយពីធ្វើផែនការមេស៊ីហ្គេមរួច មានសហព័ន្ធមួយចំនួនបានស្វះស្វែងរៀបចំខ្លួនក្នុងការទទួលយកផែនការដើម្បីអភិវឌ្ឍន៍ ប៉ុន្តែក្នុងនោះក៏មានសហព័ន្ធមួយចំនួនតូចដែរនៅមានភាពអសកម្ម និងមិនទាន់មានស្មារតីភ្ញាក់រឮកនៅឡើយ៕