កីឡាជាតិ
ជាតិ
អ្នកជំនាញ នឹងផ្លាស់ប្តូរយោបល់គ្នាស្តីពី «គុណតម្លៃល្បុក្កតោក្នុងសង្គមវប្បធម៌ខ្មែរ»
×
«គុណតម្លៃល្បុក្កតោក្នុងសង្គមវប្បធម៌ខ្មែរ» ជាប្រធានបទដែលអ្នកជំនាញ និងអ្នកស្រាវជ្រាវផ្នែកវប្បធម៌សិល្បៈ កីឡា និងប្រវត្តិសាស្ត្រ ព្រមទាំងអ្នកឯកទេសមកពីអង្គការយូណេស្កូ និងព្រឹទ្ធាចារ្យកីឡាមួយចំនួន លើកយកមកពិភាក្សានៅក្នុងសិក្ខាសាលានៅទីស្នាក់ការគណៈកម្មាធិការជាតិអូឡាំពិកកម្ពុជា ( NOCC) រយៈពេល២ថ្ងៃ ចាប់ពីថ្ងៃទី១៨ ដល់ថ្ងៃទី១៩ ខែមករា ខាងមុខនេះ។
សិក្ខាសាលានេះតម្រូវឱ្យ វាគ្មិនទាំងអស់ដែលចូលរួមត្រូវធ្វើការបកស្រាយ និងបញ្ចេញ មតិយោ បល់រៀងៗខ្លួនតាមអ្វីដែលខ្លួនយល់ឃើញ និងបានដឹងចំពោះប្រធានបទ «
គុណតម្លៃល្បុក្កតោក្នុងសង្គ មវប្បធម៌ខ្មែរ» ដើម្បីស្វែងរកគំនិតរួមមួយដ៏ល្អ សម្រាប់ចងក្រងទុកជាឯកសារ ក្នុងការអភិរក្ស និងអភិវឌ្ឍន៍ក្បាច់គុនក្បុក្កតោដែលជាកេរិ៍ដំណែលរបស់បុព្វបុរសខ្មែរបន្សល់ទុកឱ្យមួយនេះ។
គួរបញ្ជាក់ថា វាគ្មិនទាំងនោះរួមមាន លោក រស់ ចន្ទ្រាបុត្រ ទីប្រឹក្សារាជរដ្ឋាភិបាល និងជាសាស្ត្រាចារ្យប្រវត្តិសាស្ត្រ លោក វ៉ាត់ ចំរើន អគ្គលេខាធិការ NOCC អ្នកសម្របសម្រួល លោក ហាប់ ទូច អគ្គនាយកក្រសួងវប្បធម៌ និងវិចិត្រសិល្បៈ លោក រ័ត្ន សណ្តាប់ អ្នកស្រាវជ្រាវ និងនិពន្ធវប្បធម៌ និងកីឡា លោក ឯក ប៊ុនថា អគ្គនាយករងបច្ចេកទេសក្រសួងវប្បធម៌ លោក សាន គឹមស៊ាន ប្រធានបណ្ឌិតសភាល្បុក្កតោ លោក ហុក ឈាងគីម គ្រូក្បាច់គុនចម្រុះ លោក Phillippe Delanghe មកពី UNESCO និងលោកជំទាវ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ។
លោក ថោង ខុន រដ្ឋមន្ត្រីក្រសួងទេសចរណ៍ និងជាប្រធាន NOCC រួមទាំង លោក ហ៊ុន ម៉ាណែត មេបញ្ជាការកងកម្លាំងពិសេសប្រឆាំងភេរវកម្ម មេបញ្ជាការរងកងទ័ពជើងគោក និងជានាយរងសេនាធិការចម្រុះនៃកងយោធពលខេមរភូមិន្ទ ក៏នឹងមានវត្តមានក្នុងសិក្ខាសាលាដ៏សំខាន់នេះផងដែរ៕
សារព័ត៌មានថ្មីៗ ជាដៃគូរៀបចំសិក្ខាសាលានេះ ជាមួយ NOCC ក្រសួងទេសចរណ៍ ក្រសួងអប់រំ យុវជន និងកីឡា ក្រោមការឧបត្ថម្ភរបស់មូលនិធិវប្បធម៌អរូបីយ៍សាធារណៈរដ្ឋកូរ៉េ និងលោក គួច ម៉េងលី ប្រធានកិត្តិយសសហព័ន្ធកីឡាល្បុក្កតោកម្ពុជា ៕
© រក្សាសិទ្ធិដោយ thmeythmey.com