កីឡាជាតិ
ជាតិ
ភ្នំពេញក្រោនតែងតាំងគ្រូបង្វឹកអេស្ប៉ាញជំនួសលោក Sam ជាបណ្តោះអាសន្ន គ្រូបង្វឹកអេស្ប៉ាញ Oriol Mohedano ត្រូវបានតែងតាំងជាគ្រូបង្គោលឈុតធំភ្នំពេញក្រោន។ រូបថត ហ្វេសប៊ុកភ្នំពេញក្រោន
× ម្ចាស់ជើងឯកក្របខណ្ឌកំពូល ភ្នំពេញក្រោនតាមរយៈហ្វេសប៊ុករបស់ខ្លួននៅថ្ងៃទី៧ ខែមករា នេះ បានប្រកាសតែងតាំងគ្រូបង្វឹកអេស្ប៉ាញ Oriol Mohedano ជាគ្រូបង្គោលឈុតធំ ជំនួសលោក Sam Schweingruber គ្រូបង្វឹកជនជាតិស្វីស ដែលមានស្ថានភាពល្អប្រសើរក្រោយករណីគ្រោះថ្នាក់ចរាចរណ៍។
ក្លិបភ្នំពេញក្រោន បានសរសេរថា៖ «ដោយសារតែស្ថានភាពរបស់លោកគ្រូបង្គោល Sam Schweingruber មិនទាន់អាចចូលកាន់តំណែងវិញនៅឡើយជាមួយនឹងពេលមួយវេលាមួយមិនច្បាស់លាស់ ដូចនេះលោក Oriol Mohedano នឹងក្លាយជាគ្រូបង្គោលសម្រាប់ក្លឹបភ្នំពេញក្រោន ដើម្បីត្រៀមប្រកួតលីកកំពូលកម្ពុជារដូវកាល ២០១៦ (ការប្រកួតដំបូងនៅថ្ងៃទី ៧ កុម្ភៈ) និងពានរង្វាន់សម្តេច ហ៊ុនសែនផងដែរ»។
យោងតាមក្លិបភ្នំពេញក្រោន លោក Oriol Mohedano មានស្រុកកំណើតនៅឯទីក្រុង Barcelona ប្រទេសអេស្ប៉ាញ បច្ចុប្បន្នលោកមានវ័យ២៩ ឆ្នាំ និងជាគ្រូដែលកាន់ UEFA A-License ជាមួយនឹងបទពិសោធន៍ជាច្រើននៅប្រទេសរបស់លោកប្រទេសអេស្ប៉ាញ ប្រទេស ស្វីស និង ហ្វីនឡែនផងដែរ មុននឹងមកកាន់ដំណែងនៅអាស៊ីជាលើកដំបូងជាមួយនឹងកុងត្រារយៈពេល ១ ឆ្នាំ។
ក្នុងនាមជាកីឡាករដែលមានតួនាទីជាខ្សែការពារ លោកបានតំណាងឲ្យ junior club Penye Cornella មុននឹងចូលរួមជាមួយក្លឹប Atletic Roda de Bara នៅក្នុង Catalan First Division នៃប្រទេសអេស្ប៉ាញ (លីកលំដាប់ទី ៥ នៃប្រទេសអេស្ប៉ាញ) ប៉ុន្តែដោយសារតែមានបញ្ហារបួសបាក់ជើងត្រូវបង្ខំឲ្យលោកបញ្ជប់អាជីពជាកីឡាករនៅវ័យត្រឹមតែ ២៣ ឆ្នាំ។
លោកក៏ចាប់អារម្មណ៍ក្នុងការហ្វឹកហាត់កីឡាករ ដោយចាប់ផ្តើមពី UEFA C-License គ្រូបង្វឹងក្រុមយុវជន UE Cornella រយៈពេល ៣ ឆ្នាំ មុននឹងត្រលប់ទៅ CA Roda De Bara រយៈពេល ១ ឆ្នាំ ក្រោយមកក៏បន្តទៅ Segunga Division club, Club Gimnastic de Tarragona, (លីកលំដាប់ទី ២ នៃប្រទេសអេស្ប៉ាញ) រយៈពេល ៣ ឆ្នាំ ព្រមទាំងជួយឲ្យក្រុមយុវជនអាយុក្រោម ១៨ ឆ្នាំឈ្នះជើងឯក Catalan Championship។
លោកទទួលបាន UEFA A-License ជាមួយក្រុម Nastic នៅប្រទេសអេស្ប៉ាញ។ នៅខែ កក្កដា ២០១៤ លោកបានចូលរួមជាមួយក្រុម Servette FC នៅឯ Geneva ប្រទេសស្វីស ១ ឆ្នាំ និងជាគ្រូជំនួយក្រុមយុវជនអាយុក្រោម ១៨ ឆ្នាំដែលឈ្នះពាននៅប្រទេសស្វីសផងដែរ។ បច្ចុប្បន្ននេះលោកបានចំណាយពេលរយៈពេល ៣ ខែក្នុងនាមជាគ្រូជំនួយនៅ FC Legirus Inter នៅប្រទេស Finland មុននឹងចូលរួមជាមួយក្លឹបភ្នំពេញក្រោន។
លោក Oriol បាននិយាយថា៖ «ខ្ញុំបាននិយាយជាមួយ Sam ប្រហែលជា ៦ ខែមកហើយអំពីបាល់ទាត់ ក៏ដូចជាការធ្វើការជាមួយគ្នានៅក្លឹបភ្នំពេញក្រោន។ ខ្ញុំឃើញថានេះជាដំណើរវិវិត្តនៅក្នុងការបង្ហាត់របស់ខ្ញុំ ខ្ញុំតែងតែស្វែងរកភាពរីកចម្រើនសម្រាប់ខ្លួនឯង និងខ្ញុំត្រៀមខ្លួនរួចជាច្រេចក្នុងការទទួលតំណែងនេះ»៕
Tag:
ភ្នំពេញក្រោន
បាល់ទាត់
© រក្សាសិទ្ធិដោយ thmeythmey.com