កីឡាជាតិ
ជាតិ
សែន រ៉ាដេត ក្លាយម្ចាស់ខ្សែក្រវាត់ ណាហ្គាវើល ខណៈកម្ពុជា ២ រូបចាញ់បរទេស
×
កីឡាករ សែន រ៉ាដេត បានក្លាយជាម្ចាស់គ្រងខ្សែក្រវាត់ NAGAWORLD បន្ទាប់ពីយកឈ្នះកីឡាករមីយ៉ាន់ម៉ា ខណៈកីឡាករកម្ពុជា ២រូប បានចាញ់កីឡាករបរទេស ក្នុងការប្រកួតកីឡាប្រដាល់ក្បាច់បុរាណខ្មែរ លក្ខណៈមិត្តភាពអន្តរជាតិ ដើម្បីអបអរខួបអនុស្សាវរីយ៍លើកទី៣៧ ទិវាជ័យជំនះ៧មករា លើសង្វៀនអប្សរា នៅខេត្តព្រះសីហនុ នាថ្ងៃទី៧ ខែមករាម្សិលមិញនេះ។
កីឡាករជើងខ្លាំង សែន រ៉ាដេត ដែលជាប្អូនបង្កើតរបស់កីឡា សែន រ៉ាឌី បានក្លាយម្ចាស់គ្រងតំណែងខ្សែក្រវ៉ាត់ NAGAWORD ក្នុងទម្ងន់៥១ គ.ក្រ បន្ទាប់ពីយកឈ្នះកីឡាករ មីយ៉ានម៉ា Mong chhay den ដោយពិន្ទុ លើសង្វៀនអប្សរា កាលពីថ្ងៃទី៧ ខែមករា ម្សិលមិញនៅ ខេត្តព្រះសីហនុ ខណៈកីឡាករ កំផែង ខ្មៅ ចាញ់កីឡាករថៃ Phut Noy ដោយពិន្ទុ ចំណែកកីឡាករវ័យក្មេង រក្ស ជ័យ ចាញ់កីឡាករថៃ Sat Kat ដោយបោះបង់ការប្រកួតនៅក្នុងទឹកទី៣ ។
ដោយឡែកកីឡាករជើងខ្លាំងរបស់កម្ពុជា សែន រ៉ាឌី បានបំបាក់កីឡាករជនជាតិចិន Lee Kung ឱ្យសន្លប់ក្នុងទឹកទី១ ខណៈម្ចាស់ជើងឯកគ្រងខ្សែក្រវ៉ាត់ ៦ស្ថាប័ន ឡុង សុភី បានត្រឹមស្មើពិន្ទុ កីឡាករថៃ Jamlopphuphanourng។
ចំណែកកីឡាករមកពីក្លិបសម្រែករាជសីបង្ក្រាបគ្រឿងញៀន សារឿន ច័ន្ទ បានយកឈ្នះពិន្ទុអ្នកប្រដាល់អ៊ីតាលី Mayken ឬឯអ្នកប្រដាល់ដែលមានរហ័យនាមផ្តួលគូប្រកួតឱ្យសន្លប់មិនលើសពីទឹកទី៣ ឡៅ ចន្ទ្រា បានបំបាក់កីឡាករថៃ Bacjo Kietkampoune ឱ្យបោះបង់ការប្រកួតនៅក្នុងទឹកទី៤ ខណៈកីឡាករជើងខ្លាំង យ៉េន ឌីណា ឈ្នះកីឡាករជនជាតិ ជប៉ុន ដោយពិន្ទុ៕
© រក្សាសិទ្ធិដោយ thmeythmey.com