កីឡាជាតិ
ជាតិ
×![]()
ឆ្នាំ២០១៦ ជាឆ្នាំដំបូងក្នុងការអនុវត្តជាបណ្តើរៗនូវផែនការមេស៊ីហ្គេម ឆ្នាំ២០២៣ ដែលបានកំណត់រួចរាល់កាលពីឆ្នាំ២០១៥។ គណៈកម្មាធិការជាតិអូឡាំពិកកម្ពុជា (NOCC) បានកំណត់គោលដៅសំខាន់ៗ ដែលត្រូវបំពេញ និងអនុវត្តលើសកម្មភាពកីឡា ក្នុងឆ្នាំ ២០១៦ នេះរួចរាល់ហើយ។
លោក វ៉ាត់ ចំរើន បានចាត់ទុកឆ្នាំ២០១៦នេះថា ជាឆ្នាំមួយដ៏សំខាន់ និងជាការចាប់ផ្តើមអនុវត្តបណ្តើរៗនូវផែនការមេស៊ីហ្គេមឆ្នាំ២០២៣ ហើយអ្វីដែលសំខាន់នោះធ្វើយ៉ាងណារៀបចំផែកមេនោះឱ្យបានល្អ ដើម្បីដាក់ជូនរាជរដ្ឋាភិបាលអនុម័តឱ្យរួចរាល់ក្នុងឆ្នាំ២០១៦ នេះ។
លោក វ៉ាត់ ចំរើន អគ្គលេខាធិការ NOCC បានថ្លែងប្រាប់សារព័ត៌មានថ្មីៗថា៖«ឆ្នាំ២០១៦ ជាឆ្នាំចាប់ផ្តើមអនុវត្តបណ្តើរៗនូវផែនការមេរបស់ស៊ីហ្គេមឆ្នាំ២០២៣ អ្វីដែលសំខាន់ត្រូវរៀបចំឲ្យបានល្អ ដើម្បីបញ្ជូនឲ្យរាជរដ្ឋាភិបាលធ្វើការអនុម័តឱ្យរួចរាល់ក្នុងឆ្នាំនេះ»។
ជាមួយគ្នានេះដែរ អគ្គលេខាធិការ NOCC នឹងរៀបចំការប្រកួត National Games 2016 នាពេលខាងមុខនេះ ដើម្បីវាស់ស្ទង់កម្រិតបច្ចេកទេសមន្ត្រីគ្រប់គ្រង មន្ត្រីរៀបចំការប្រកួត និងសមត្ថភាពកីឡាករកីឡាការិនី។ ការប្រកួត National Games នេះ វាជាគោលនយោបាយអនុវត្តផ្ទាល់ និងជាបទពិសោធន៍ដើម្បីឆ្ពោះទៅរកការប្រកួតស៊ីហ្គេមឆ្នាំ២០២៣។
លោក វ៉ាត់ ចំរើន បានបញ្ជាក់ថា៖«NOCC នឹងត្រៀមខ្លួនចូលរួមប្រកួតក្នុង Games ធំៗចំនួន២ គឺការប្រកួតកីឡាអូឡាំពិក នៅប្រទេសប្រេស៊ីល ក្នុងខែសីហា និងការប្រកួតកីឡាលើឆ្នេរខ្សាច់អាស៊ី Asian Beach Games 2016 នៅប្រទេសវៀតណាម ក្នុងខែកញ្ញា»។ ក្រៅពីនេះក៏មានការរៀបចំការប្រកួតលក្ខណៈអន្ដរជាតិកីឡាចំបាប់ជើងឯកអាស៊ីអាគ្នេយ៍ ដែលកម្ពុជាធ្វើជាម្ចាស់ផ្ទះ និងការត្រៀមខ្លួនធ្វើជាម្ចាស់ផ្ទះការប្រកួតអន្ដរជាតិលើប្រភេទកីឡាផ្សេងៗជាច្រើនទៀត។ NOCC បាននិងកំពុងជំរុញឱ្យសហព័ន្ធជាតិនីមួយៗឱ្យធ្វើជាម្ចាស់ផ្ទះនៃការរៀបចំការប្រកួតអន្តរជាតិ ជាលក្ខណៈមិត្តភាព និងលក្ខណៈជើងឯកប្រចាំតំបន់ជាបណ្តើរៗ ដើម្បីដកស្រង់នូវបទពិសោធន៍ កម្រិតបច្ចេកទេសធៀបទៅនឹងប្រទេសនៅតំបន់អាស៊ី។
បន្ថែមលើនេះ NOCC ត្រៀមបញ្ជូនកីឡាករកីឡាការិនីវ័យក្មេង ដើម្បីធ្វើការហ្វឹកហាត់នៅក្រៅប្រទេសរយៈពេលវែង ជាពិសេសប្រទេសចិន និងត្រៀមបណ្តុះបណ្តាលគ្រូបង្វឹកផ្នែកភាសាអង់គ្លេស ដើម្បីឱ្យគ្រូបង្វឹកតាមសហព័ន្ធមួយចំនួនធំនោះអាចចាប់យកបទពិសោធន៍ថ្មីៗ កម្រិតបច្ចេកទេសថ្មីៗពីប្រទេសខាងក្រៅដែលមានការរីកចម្រើនខាងផ្នែកវិស័យកីឡា។
លើសពីនេះទៅទៀត NOCC នឹងស្វែងរកប្រទេសសំខាន់ៗមួយចំនួនដើម្បីចុះ MoU រួមគ្នាក្នុងនោះ សិង្ហបុរី ឡាវ នឹងចុះហត្ថលេខាក្នុងពេលឆាប់ៗខាងមុខនេះ ចំណែក ម៉ាឡេស៊ី និងរុស្ស៊ី នឹងចុះហត្ថលេខានៅពេលខាងមុខ។ ហើយការចុះ MoU នេះដែរ ក្នុងគោលបំណងដើម្បីទទួលបានបទពិសោធន៍ក្នុងការរៀបចំការប្រកួតស៊ីហ្គេមឆ្នាំ២០២៣ ៕
Tag:
កីឡា
© រក្សាសិទ្ធិដោយ thmeythmey.com
