ជាតិ
រដ្ឋមន្ត្រី៣រូប និងលោក ហ៊ុន ម៉ាណែត នឹងចូលរួមសន្និបាតបញ្ញវន្តពិភពលោក
× រដ្ឋមន្ត្រី៣រូបនៃក្រសួងពាណិជ្ជកម្ម ក្រសួងអប់រំ និងក្រសួងអភិវឌ្ឍជនបទនឹងមានវត្តមានធ្វើជាអធិបតីនៅក្នុងកម្មវិធីសំខាន់ៗនៃសន្និបាតបញ្ញវន្តពិភពលោក (Global Alumni Convention) លើកទី២នៅចុងខែមករានេះ។ លើសពីនេះ លោក ហ៊ុន ម៉ាណែត ដែលទទួលបានសញ្ញាបត្របណ្ឌិតសេដ្ឋកិច្ចពីចក្រភពអង់គ្លេស ក៏នឹងធ្វើបឋកថាមួយនៅក្នុងព្រឹត្តិការណ៍នៃការជួបជុំនិស្សិត និងអតីតនិស្សិតមកពីបរទេសដែរ។
ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងពាណិជ្ជកម្ម នឹងថ្លែងសុន្ទរកថាស្វាគមន៍អ្នកចូលរួមក្នុងសន្និបាតបញ្ញវន្តពិភពលោក (GAC) ដែលនឹងចាប់ផ្តើមប្រព្រឹត្តទៅនាល្ងាចថ្ងៃទី២៩ខែមករានៅសណ្ឋាគារ Intercontinental។ លោក ហង់ ជួន ណារ៉ុន រដ្ឋមន្ត្រីក្រសួងអប់រំ នឹងធ្វើសុន្ទរកថាបើកសន្និបាតនេះនៅព្រឹកថ្ងៃទី៣០មករា។ លោក ហ៊ុន ម៉ាណែត គឺជាវាគ្មិនក្នុងកិច្ចប្រជុំពេញអង្គពិសេស (special plenary session) នៃសន្និបាតបញ្ញវន្តពិភពលោក ដែលនឹងត្រូវបិទបញ្ចប់ជាមួយនឹងសុន្ទរកថារបស់ រដ្ឋមន្ត្រីក្រសួងអភិវឌ្ឍជនបទ លោក ជា សុផារ៉ា។
សន្និបាតបញ្ញវន្តពិភពលោកលើកទី២ ដែលកំពុងត្រូវបានរៀបចំដោយ idp Education គឺជាព្រឹត្តិការណ៍នៃការជួបជុំអតីតនិស្សិតនៃបណ្តាប្រទេសជឿនលឿន មេដឹកនាំក្រុមហ៊ុន មន្ត្រីរដ្ឋាភិបាល មន្ត្រីស្ថានទូត សង្គមស៊ីវិលទាំងក្នុងប្រទេសកម្ពុជា និងនៅក្នុងតំបន់ ដែលអនុញ្ញាតឲ្យពួកគេចែករំលែកចំណេះដឹង ចំណេះធ្វើ និងបទពិសោធន៍ដែលគ្មានព្រំដែនលើវិស័យនានានៅកម្ពុជា។
អភិបាលនៃសន្និបាតបញ្ញវន្តពិភពលោក លោក ម៉ៅ ស្រេង បានបញ្ជាក់ប្រាប់សារព័ត៌មានថ្មីៗថា៖«យ៉ាងហោចណាស់ វានឹងមានអ្នកចូលរួមក្នុងព្រឹត្តិការណ៍នេះ៥០០នាក់។ តួលេខនេះលើសពីចំនួននៃអ្នកចូលរួមក្នុងឆ្នាំ២០១៤ ដែលមានប្រមាណ៤០០នាក់»។
គួរបញ្ជាក់ថា នៅមានមន្ត្រីជាន់ខ្ពស់រដ្ឋាភិបាល និងស្ថាប័នរដ្ឋជាច្រើនរូបទៀតដែលនឹងមានវត្តមានជាមួយវាគ្មិនជាតិ និងអន្តរជាតិទាំងអស់ប្រមាណ៦០រូប ដែលនឹងចែករំលែកបទពិសោធន៍លើវិស័យ១០សំខាន់ៗ ដូចជាអប់រំ សុខភាពសាធារណៈ សំណង់ អាជីវកម្ម ការបណ្តុះបណ្តាលវិជ្ជាជីវៈជំនាញជាដើម។
អគ្គនាយនៃសារព័ត៌មានថ្មីៗ លោក គី សុខលីម ក៏នឹងធ្វើវាគ្មិនជាមួយអ្នកជំនាញសារព័ត៌មានជាតិ និងអន្តរជាតិមួយចំនួនទៀតនៅក្នុងវគ្គពិភាក្សាស្តីពីសារៈសំខាន់នៃព័ត៌មាន និងប្រព័ន្ធផ្សព្វផ្សាយផងដែរ។
អ្នកដែលចាប់អារម្មណ៍ចូលរួមក្នុងវេទិកានេះ អាចចុះឈ្មោះអនឡាញបានតាមរយៈគេហទំព័រ www.cambodiaGA.org ៕
© រក្សាសិទ្ធិដោយ thmeythmey.com